Kawlram Chung Siangcachimtu Singkhat le Cheu Hrawng Rianphuah An Si Cang

February 1 ralhrangbu nih nawlngeihnak a lak hnuah ralhrangbu doin CDM a lut mi Siangcachim Saya/Sayama singkhat le cheu deng cu ralhrangbu nih an rian in a phuah hna tiah Reuter nih a thanh.

Sianginn hon lai ah atu bantukin an rian in an phuah hna mi a si. “May 22 tiangah rianphuah mi Saya/sayama 125,900 an si tiah Siangcachimbu chimhnak nawlngeitu pakhat nih a chimh.

An dihlak jn pohmah 505(A) in tlaih dingah nawl chuah an si caah an min cu ka chim kho lo” tiah a chim.

“A tu ralhrangbu nih rianphuah mi cazin an thanh mi zong rian ah lut than hnaseh ti an duh caah an kan thihpheihnak a si. Rian an kan phuah taktak a si ahcun Fimcawnnak cu a tlu ko lai. Rian nan luh than ahcun Order kan chuah mi zong kan hnawh than hna lai a kan ti” tiah a ti.

Ralhrangbu uknak duhlo in fimcawnnak, Ngandamnak lei cozah le pumpak riantuan le company riantuan pawl tampi cu CDM an tuah, Sianghleirun riantuan minung 19500 zong rianphuah an si.

A tu ah Ralhrangbu nihcun Sianginn hon ding le CDM a lut mi zong rian ah lutthan dingin an thanh nain Nu le pa cheukhat nih an fale sianginn luhter cu an ruat lemlo tiah theih a si.

Kum 42 mi sianghngakchia pa nih “ralhrangbu kuttang ah zeitik hmanh ah ka fanu sianginn ka kai ter lailo, a himnak phan a um” tiah a chim.

Sianghleirun a kai lio mi pakhat zong nih “Democracy kan ngah tikah ka kai than te lai” tiah a chim ve.

Kawlram cacawnnak cu ASEAN zong ah a niam ngai mi a si, 2020 kum chuahmi cazin ah vulei cungah 92 nak a si. Kum 2019 cazin ah Kawlram Siangcachim dihlak 43000 an um tiah theih a si.

The Chin Post

Be the first to comment

Leave a Reply

Your email address will not be published.


*