A zam le zamlo karlak theihthiamnak um seh! By Salai Ceu Bik Thawng Tulio ah a tlizam lomi cheukhat nih “Lairam kan zamtak lailo” timi hla isak in a tlizammi hna kha “khuaram dawt lo, ralchiat” phun dedeng in hmuh le chimrel kha– capo zongin hrial hna usih. Cun, a tlizammi zong nih tantakmi kan unau pawl an thlakaam ding le ningtih ding kha zawnruah thiampiak cikcek hna usih. Asi khawh ahcun tlikzam lo khawh kha kan duh bikmi cu a si ko. Khua ah a taangmi hna cungah kan ilawm tuk. Asinain Kawl rallokap sahngar ttih ruangah khua chuahtak in himnak a kawlmi kha khua dawtlo le ralchiat puh hna hlah usih.
Khua le sang zamtak loin mipi nih hriamnam loin kan hngah i kan runven khawhmi a um pah kho men. Nain atulio ahcun CNF le CDF dah tilo nihcun, kanmah tein rallokap le sahngar-ar irunven ding cu a fawi lo (tampi a um lem lo). Cucaah “nan zamtakmi khua/sang le nan inn-lo vialte kan rak in humhim piak dih hna” ti awk a um lem tuk lo. Cucaah a tlizammi le khua ah a taangmi karlak ah cupi-khate iti le imawhchiat awk a um ding a si lo (a um tinak zong cu a silo fawh). Itheithiam cikcek ko hna usih. Tii zut loin mipi ifuntom a herh bik lio can a si. Crd: Salai Ceu Bik Thawng
“Dothlennak Rian Ah Pastor Dirhmun” By Tluang Hre. Ral doh kal lai thlacampiak dingah kaa thawh! – Duhdawtmi hna he țian-zairel thlahnak thlacamnak ka hmang bal tawn – Mithi thlahnak ruakvuinak caan ka hmang bal tawn – Ramdang kal ding pawl khuachuah hauka in thlacamnak ka tuah bal tawn – Lai ser meithal i put in ramriah kal lai (Tho ramriah + … ) ah khuachuah hauka in thlacamnak ka ngei bal tawn …
A cunglei tonmi pawl ah ngaih a chiat caan a um pah tawn nain thinlung tawne tiang ngaingai a runh bal lem lo … tonkel an si ko. 2021 April 28 Cacawn Nithum ni (chunhnu) ka tonmi cu a phun aa dang rumro ko. Ram mizapi nawlngeihnak hramhram in a chuttu rallokap doh dingin le kan Chinram mizapi runven dingah kan ralkap le kan mino (CNA + CDF) hna cu miphun le ram caah pumpek nunthap in Camp Victoria in sianghnuai meithal put in ral ram ah kal ding an si cang, thin le lung a cawlcang ngaingai …
Ral doh ding ah ralkap cu an si ko nain ral ram kal ding ni caan taktak vun phanh hi cu aa phundang ngaingai ko … ramriah kal lai i meithal i bei sawhsawh bantuk men a si tilo, a herh ahcun ram ca’h nunnak tiang pek dingin i timhtuah a si …. hi raldohnak ah mah chungchuak fale hna an vun i tel ve tikah tuahkel thlacamnak bantuk cu a lo ruam ti lo. UCCF Biakinn chungah ralram umkalning le thawhdir dingning a herhmi biacahnak tete hruaitu upa hna nih ngeih an si hna hnu ah,.
Salm 33:12., “An Pathian ah Bawipa a simi miphun cu thluachuakmi miphun an si ..” timi UCCF tlaangtar te hi nan umkalnak kip ah i ken ding lamhruaitu siseh mu tiah biacah tawi ka chim hnu ah Zingnu Pathian sin Thlacamnak kan vun ngeih cu hnarno ruh a țam, hrom a pit, aw-chuah aa phundang … pacancuh bu in le kamseh hacang rial buin thlacamnak lim a si hnu ah zațial kuttlai in raldohnak ah i thawh a si.
Bawipa fial rian kum 22 chung țuan ka relnak ah hi nicaan hi cu ka caah aa phun dang ngaingai, philhkhawhlo ding tuanbia pakhat a si tiin ka thinlung ah tlah-hna in fek taktak in țemchih bantukmi ko a lo. Pathian thimmi Chin miphun vialte hna tuanbia thar kan țial cuahmah lio a si … Khrihfabu le chungțuan hna nih țih a nung deuh i nga tam deuh an umnak ti sor/hrah lei ti thuh deuhnak lei ah kan lawng mer a herh caan a si … kan lo-hmun (mission field) kongkau ruah nolh a herh ko cang.
“ Dinnak & Dinlonak … karlak ral dohnak a si i Khrihfami hna cu dinnak a țanhmi kan si bantuk in hi ral dohnak ah Pastor le Khrihfabu hna nih kan sikhawhnak lam cio in hma kan lak a herh. Miphun dawtu ram hrin fadawt zeimawzat nih a nungin pekchanhmi raithawinak bantuk in ram caah an thisen le an nunnak in rai an i thawi cang i an bau riangmang cang. Cheukhat nih mit an pek i mit lo in an um,
cheukhat nih kut le ke an thap i kut ke lo in an um cang … thisen nih a kan auh, kan liang cungah tuanbia aa khiing … kan celh lo,kan țihtuk tiawk a țha ti lo … kan hmaika chuak a si … hi lio ah vawlei puulrai nih a hun ithuat i nun a kan lak cuahmah hawi … hmanhseh ralțha tein kan doh ți hna lai … kan lung țhawng ko seh … “Kan tei hrimhrim lai”. Him-dam thluachuah Pathian nih kan țhumhthlak sehlaw zalen ram (Federal Democracy) ah nuam tein tlonlen caan kan serpiak ko seh.
Leave a Reply