Pathein khualai ah Motor PK buuk an kah, Senthum le Senhnih thi, Nizaan October 28, Ayeyarwaddy Ramthen, Pathein khualai, chunlai ah Motor PK (Traffic Police) buuk an kah i pahnih an thi. Athi mi hna hi Senthum (Sergeant) Zaw Min Htet le Senhnih (Corporal) Myat Min Oo hna an si i ahote an si hngalhlo mi hna nih an kah hna, tiah KTM nih a tial.
NUG nih ram pumpi huap dothlennak ni (D-Day) a thanh hnu thla hnih ah NUG le tlangcung hiramtlaibu (EAO) cheukhat i bawm in ral lei i funtomnak committee Central Command and Coordination Committee kan dirh cang tiah NUG upa pakhat nih a chim (Central Command and Coordination Committee cu a tawinak in C3C tiah an auh).
C3C tangah a chang-chang tein i ukhruaining (Chain of Command) a um lai. Hi committee an dirhnak cu hmualngei tein ralhrangbu kan doh khawhnak dingah a si tiah NUG Defense Ministry Secretary U Naing Htoo Aung nih cun Oct 28, nizan ah khan a chim. U Naing Htoo Aung nih cun “Committee ah NUG in runvennak le ralkap lei tuanvo ngeitu hna an i tel bantukin tlangcung hriamtlaibu hna chungin ralkap lei hotu hna an i tel ve.
Kan dihlak thazaang fonh in rian kan tuan lai” tiah a chim. Asinain C3C ah aa tel cangmi tlangcung hriamtlaibu hna le raldohnak lei tlangtla/nawl petu ding hna i an min cu NUG nih a langhter rih lo. C3C ah aa tel rih lomi EAO (tlangcung hriamtlaibu) hna he zong tonbiaruahnak an ngei peng ko tiah theih a si. “Aa tel dingmi zeimawzat an i tel cang bantukin midang zong an i tel khawh nakhnga kan i zuam cuahmah ko.
Thanchonak tete a um ko” tiah U Naing Htoo Aung nih a chim. Tlangcung hriamtlaibu hruaitu hna bawmhnak le an ruahnak hna kha lak in ral a do dingo ralkap hotu hna cu hmuhton le thiamnak a ngeimi hna kha khanh an si lai. Cu lawng si loin CDM a tuahmi ralkap hna zong tlamtling chinchin in an i tel khawhnak dingah tuanvo ngeitu hna nih an i zuam cuahmah tiah theih a si. Source: Myanmar Now
Vawleicung minung tampi nih hmanmi Facebook cu min cu Meta tiah thlen a si cang. Company dirhtu le CEO a simi Mark Zuckerberg nih cun “Facekbook min Meta tiah kan thlenmi cu hmailei ah online chung i kan hmuhmi kha a taktak bantukin hmuh khawhmi phun kha ser kan duh caah a si” tiah a chim.
Naihrawng in Facebook soiselnak tete a tam ngai, culio ah company min cu Metaverse tiah an thleh hi a si. Naite ah khan Facebokok ruangah a hmangtu hna sunghnak an tonmi kongah company chung ralrin peknak hna cu zei ah a rel lo tiin Facebook company ah rian a rak tuan balmi Frances Haugen nih vawleipi theih in a phuan. Mark Zuckerberg nih chimning ah cun Metaverse hi a tha deuh i screen chung i kan hmuhmi kha a taktak bantukin ruahnak 3D fimthiamnak in tuah a si lai.
Screen chung ta kan zohmi bantuk kha si loin screen i kan hmuhmi chungah a ummi bantukin i ruah a si cang lai ti a si. Min an thlenmi kongah cheukhat nih cun a herh lomi a si tiah an soisel len ve. Chawkhel thiamsang pakhat a simi Laura Ries nih cun “Facebook kha Metavserse ah an thlenmi cu hlanlio i rili cungah meikangh in a rawkmi Britain Petrol company kha soisel thangchiatnak in luatter duh ruangah Beyond Petroleum tiin a min an thlenmi bantuk a si” tiah a chim. Ref: VOA
Leave a Reply