CDF- Kanpatlet le SAC Ralkap An I Kap, SAC Ralkap 4 An Thi
===================================
SAC nih ramkhel thingtla Ko Jimmy, Ko Phyo Zeyar Thaw, Ko Aung Thura Zaw le Ko Hla Myo Aung phung ning lo in an thah mi hna caah teirul chamnak ah CDF-Kanpelet nih phuh an hlam i SAC ralkap 4 an thi tiah theih a si. CDF-Kanpalet cu rallam hmun 3 in an sial i Kanpalet Aministration zung, Township Education Office le Basic Educattion High School ah umhmun a khuar mi kan kah hna i palek 2 le ralkap 2, an dih lak 4 an thi i ralkap pakhat hliam a tuar tiah CDF-Kanpalet nih nihin (July 27) ah thawng an thanh.
SAC nih a tu bantuk in hri thlai in thihdantatnak le lainawnnak an tuah peng rih ah cun CDF-Kanpalet nih NUG Ministry of Defense le CJDC hruainak in khuachung ah fak chin lengmang mi kahdohnak kan tuah lai tiah CDF-Kanpelet nih ralrin pek nak cathanh an chuah. Nihin kahdohnak cu chun Sml 12:25 in Sml 1:20 tluk tiang a rau i CDF-Kanpelet lei a thi le hliam tuar an um lo tiah theih a si.
Yesagyo Peng Ah SAC Ralkap PDF Nih Bomb An Puah Hnawh Hna I 3 An Thi, Magway ramtțhen, Yesagyo peng Kyaukhlekha(ကျောက်လှေခါး) khua pawng Government Tecnological college (GTC) ah umhmun a khuar mi SAC ralkap check gate pakhat cu July 27 chun Sml 2:00 tluk ah tualchung PDF hna nih cycle ah bomb kan hmanh i kan puah hnawh hna i ralkapb 3 an thi tiah Yesayo Revolution Group-YRG sin in theih a si.
Tualchung PDF hna cu SAC ralkap check gate yard 100 aa hlatnak in bomb(mine) an hmanh mi cycle an dir ter i minutes 35 tluk a rauh hnu ah khin palek pakhat a ra i gate chung ah a kal mi. Tool box a hun tik ah a puah hnawh i a. thi colh. Cun a dang ralkap 2 siizung ah an thi tiah theih a si.
Cu dohnak cu Yesagyo Revolution Group-YRG, Urban Underground Revolution Force-UURF, Shwe Nyar Myae-PDF le Zarmani Blood Guerilla Army-Myaing i bawm in an tuah mi a si tiah theih a si.
India Ram Bihar Ramkulh Ah Țek A Tlak Ruang Ah Nikhat Chung Lawng Ah Minung 20 An Thi, India ram nichuahlei, Bihar ramkulh chung pengkomh 8 ah țek tlak ruang ah nikhat chung lawng ah minung 20 an thi tiah theih a si. July 27 le 28 ah Bihar ramkulh chaklei kap zong ah thlichia le ruah a fak kho mi a si tiah khuacaan lei zohthaim hna nih an ruahdamh.
Tualchung mi hna nih ramkulh pawngkam zohkhenhnak lei rian ngeitu nih zulhphung an sermi zulh cio ding in State Chief Minister Nishikuma nih forhfialnak a chim. A thi mi chungkhar hna caah Lu man rupees 40000 cio pek an si tiah chief minister nih July 26 ah a chim. India ram ah thlichia hran i ruah a sur lio caan i țek a tlak nih tlak ruang ah kum tin minung a za leng in an thi tawn tiah theih a si. Țek tlaknak ruang ah a thi mi an tamnak a ruang pakhat cu ramdang nak in buliding leng ah rian a țuan mi an tam deuh caah a si tiah thiamsang hna nih an chim.
Misual Phu Khat Nih Ko Jimmy le Ko Pyyo Zeya Thaw Inn Lung In An Cheh, SAC ralkap nih an thahmi Ko Phyo Zeya Thaw le Ko Jimmy hna an inn hmai ah Light Truck mawtaw in minung a phu in an rak phan i biachia holhchia he au khuan buin an inn hna cu lung in an cheh hna. Yangon khuapi Kyauk Tahta ( ေကျာက်တံတား) peng Bo Aung Kyaw lampi cung um Ko Phyo Zeya Thaw i a inn cu misual phu pakhat nih Nihin July 27 chun ah lung in an rak cheh tiah tualchung mi hna sin in theih a si.
” Light Truck mawtaw pakhat in minung 20 hrawng an rak phan i Ko Phyo Zeya Thaw te inn cu lung in an cheh. Biachia phunkip an chimmi hna kan theih. Inn tang ah a dir mawtaw hna zong lung nih an kan khen sual lai tiah a kal dih ” tiah tualchung mi pakhat nih a chim. Ko Jimmy te an inn hmai zong ah Light Truck mawtaw 5, Daina mawtaw 2 in thingtam , hriamnam tling he misual phu pakhat nih lung an rak cheh ve tiah theih a si.
Hi misual phu hna cu khoikaa in an rak chuah ti kan thei lo nain SAC ralkap hna an kuttang rianțuan tu pawl an si lai tiah vengchung mi pakhat nih a chim. ” Palik le SAC ralkap zong nih an rak tlai hna lo. A tu bantuk in an um ngam nak le an tuah ngam nak cu SAC ralkap nih tangka 5000 pek mi fual mi pawl a si lai ” tiah a chim. SAC ralkap Telegram Channel ah an thlah colh tiah theih a si.
KNU Brigade 5 Ah SAC Ralkap Pyi Phyo Aung Cu Hriamnam He A Lut, KNU Brigade 5 hmunram Hpapon(ဖာပွန်) pengkomh chung ah a ummi SAC ralkap Kha La Ya 405 in ralkap Pyi Phyo Aung cu, July 9 zinglei ah KNLA sinah hriamnam he a zam, tiah theih a si.
Pyi Phyo Aung cu Khu Tu Htar, May Way( ခူသူးထာ၊ မယ်ဝေ) hmun ah a ummi SAC ralkap riahcaw a phortu a si i, meithal MA3 zunkhat le a kuan 70 he KNLA sinah a lut, tiah MuTaw thawngpang nih a langhter. Kha Ma Ya 405 cu Tanintharyi ramṭhen, Tayatchaung khua ah umhmun khuar mi an si i HtarWay(ထားဝယ်) Battalion 1 kuttang an si.
India Ram Ah Zu Chia An I Din Sual Caah Minung 28 An Thi, India ram nitlaklei ah Chemical in sermi zu an din ruang ah minung 28 an thi i minung 60 leng cu fahtuar in an um tiah țuanvo ngeitu hna nih July 26 ah an chim. Hi bantuk in thihnak cu Gujarat ramkulh Ahmedabad le Botad khuapi hna ah a cangmi a si i cu ramkulh ah zu chuan le zuar an khap nak hmun a si.
Tu bantuk in thil a cangmi ah hin zu an serchuah nak ah hin zei bantuk chemical thilri a hman ti cu fiang in kan thei kho rih lo tiah nawlngeitu Mukesh Parmar nih a chim. Gujarat ramkulh, Palik bawi Ashish Gupta nih a tu bantuk in thli tein zu an zuarnak kong he pehtlai in lunghrinh mi hna cu kan tlaih hna i kan hren ko hna tiah a chim.
Phungning lo in zu chuanmi an din ruangah an thih nak cu India ram ah a cang bik mi man fawi tein a tha a pin nak caah zu chung in rungrul thahnak sii hna le Chemical thilri hna an cawh tiah theih a si. Phungning lo in zu a zuar mi hna zong ngunkhuai pek lo in sifak mi hna cu zu manfawi tein an zuarh hna i cu bantuk in phungning lo in zu a chuangmi le a zuarmi hna cu India ramchung ah tangka tampi a chuahpi kho tu sehzung riantuan nak a si tiah theih a si. 2020 kum ah India ram chaklei Punjab ramkulh ah a thianghliam lo mi zu an din ruang ah minung 120 leng an thi bal cang .
Leave a Reply