Daw Aung San Suu Kyi Cu A Dam Lo Caah Thonginn Sibawi Nih A Thlopbul
===============================================
Naypyidaw thonginn ah a ummi rampi ruahnak petu Aung San Suu Kyi cu a dam set lo caah thonginn siibawi sinah zohter a si, tiah NLD party hna he naihniam in ummi pakhat nih media ah a chim. Suu Kyi konglam a chimtu nih cun, “Suu Kyu cu rawl a ei huaha lo i, ti-hang lawng a ding, a sam zong a tlong ngai, nai ahkhan a tha um lo caah tluk ai tim i, a zohkhenhtu hna cu an thin a phan caah siibawi an auhpiak, atu cu a dam deuh cang,” tiah a chim.
Daw Aung San Suu Kyi cu a luancia June 22 ahkhan Naypyidaw thonginn, amah lawng a ummi inn dang ah SAC ralkap nih an chiah. SAC ralkap chimphuannak nawlngeitu general Zaw Min Htun nih cun Daw Aung San Suu Kyi thonginn ṭhial a si nak a ruang cu sualphawtnak upadi ning bantuk in a si i, ṭha tein zohkhenh a si ko, tiah ah a chim.
Kum 77 a si cangmi Daw Aung San Suu Kyi cu SAC ralkap nih nawlngeihnak an lak hnu in SAC ralkap nih sualpuhnak phun 19 in taza an cuai. Sualpuhnak case phun 6 caah kum 11 thong thlak ding in biakhiahnak an tuahpiak i, a taangmi case phun 13 ca ah biaceihnak tuah ding a si rih.
ASEAN Special Representative for Myanmar le Cambodia ramleng palai Prak Sokhonn cu Naypyidaw a tlawn ṭhan tik ah Aung San Suu Kyi he ton khawh nakding nawl a hal i, hmai thla chung a khualtlawnnak ah cun tonnak nawl a ngei ṭheo lai ruahchannak a um.
Tuanbia a duhtu hna caah rel chap, “Ngunnu Le A Nau(Tuanbia)” A hlan lio ah Ngunnu le a nau an rak um. Voikhat cu Ngunnu nih, “Kanau, lo kan kal lai,” a ti i a nau he cun lo an kal. Chun ni linh silingpi ah khin, “Kanau a lin tuk, zil kan kawl lai,” a ti i zil cu an kawl. A nau nu nih cun zil sairaang a hmuh i a u tu nih cun zil a kermite lawng a hmuh. A u nu nih a zil cu a ei i a dih colh.
A nau nu zil sairaangte cu a zoh i a mit a thi tuk, ” Kanau, na zil ka cheu ve,” tiah a hal. A nau nih cun a siang lo. ” Kanau, na zil na ka cheuh lo ahcun chuntlung kaa senghter lai,” a ti. A nau nu nih cun, “Na duh le i senghter ko,” a ti. A u nu nih cun, “Chuntlung aw, ka seng, ka seng, ka nau nu nih zil a ka cheu duh lo e ka seng, ka seng,” a ti i a kerek tiang a sengh,” tiah a nau nu cu a ti. A nau nih cun a siang hlei lo.
A u nu nih cun, “Chuntlung aw, ka seng, ka seng, ka naunu nih zil siaraang a ka cheu duh lo e ka seng, ka seng” a ti tthan. Chuntlung nih cun a khuk tiang a hun sengh. “Ka nau, ra ka cheu ko, ka khuk tiang a pil cang hih,” a ti tthan. Asinain a nau nu nih cun a cheu siang hlei lo.
“Chuntlung aw, ka seng, ka seng, ka nau nu nih zil sairaang a ka cheu duh lo e ka seng, ka seng,” a ti tthan. Chuntlung nih cun a tai tiang a phum cang. “Kanau, rak ka cheu cang,” a ti i tlawmpalte khi a hei cheuh. “Ka nau, rak ka cheu rih,” a ti tthan. A nau nih cun a cheu siang ti lo. A u nu nih cun, ” Chuntlung aw, ka seng, ka seng, ka nau nu nih zil sairaang a ka cheu duh lo e, ka seng, ka seng,” a ti tthan. Chuntlung nih cun a thin tiang a sengh cang. “Ka nau, na zilte cu ka cheu ko mu,” a ti. A nau nih cun a cheu siang hlei lo.
A u nu nih cun, “Chuntlung aw, ka seng, ka seng,” a ti tthan i a hngawng tiang a dolh cang. “Kanau, ka cheu ko,” a ti nain a siang hlei lo. Chuntlung cu a auh tthan i a kha be tiang a dolh. “Kanau, rak ka cheu cang,” a ti. A nau nih cun a pelte a hei cheuh tthan. A unu cu aa za hlei lo, a vun hal tthan. A naunu nih cun a siang ti lo. “Chuntlung aw, ka seng, ka seng, ka nau nih zil sairaang a ka cheu duh lo e, ka seng, ka seng,” a ti i a pumpuluk in chuntlung nih a sengh dih i vawlei chungah a pil. A naunu cu aa ngaichih tuk i a lunglen in a ttap zungzal.
Voi khat cu a ttah lio ah a cung in vaca an ra zuang. A nau nu te nih cun, “Ka cung i va ca zuang… ka u Ngunnu nan hmu lo maw?” a hei ti hna. Vaca run nih cun, “A hmuh cu kan hmuh nain tlang ah caw-ek, na-ek a thai lio ee,” an ti. A dang run khat an ra tthan i, “Ka cung i vaca zuang, ka u Ngunnu nan hmu lo maw?” a hun ti tthan hna.
” A hmuh cu kan hmuh ko nain, thlang ah, thlang ah caw-ek, na-ek a thai lio,” an run ti. Tlawmpal ah vaca run dang an ra tthan. “Ka cung i, ka cung i caca zuang zuang, ka u Ngunnu nan hmu lo maw?” tiah a auh tthan hna. Cu vial ahcun “Ei! ka nau awte a lo ko e” a ti i tangah an run ning in an ttum.
Ngunnu nih cun a hawile pawl kha, “Nan thla i phawi cio u law ka nau hi thla kan bunh lai,” a ti hna. An thla an phawi cio i Ngunnu a nau cu an bunhter i an zuan pi. A u nu nih cu, “Khah, ka nau, kan thla kan pharh lai i kan umnak lei ah kan zuang lai, kan zuan pah i tivapi na hmuh ahcun ei, cu tivate cu na ti lai. Tivate na hmuh ahcun ei, cu tivapi cu na ti lai,” tiah bia a cah. A u chimningte in tivapi a hmuh caan ah a thin a phan i, ” Ei! a cu tiva te cu,” a vun ti. Tivate a hmuh caan ah, “Ei! a cu tiva pi cu,” a ti.
Sau nawn an zuan ah khin a u chimh mi kha a philh i tiva pi cung i an zuan lio ah a thin a phang tuk i, “Ei!, cu tiva pi cu…..” a ti sual i tiva chungah cun a tla i ngapi nih a rak dolh. (Tuanbia Dang Ka Vun Pehchap Te Lai)
Leave a Reply