Timit Hlei Dawn Ding In A Kalmi SAC Ralkap Pawl Cu Chin Zapi Ralkap Nih An Kah Hna I, SAC Ralkap 3 An Thi!
=====================================
Nihin August 3 ah Timit hlei dawn ding in a kal mi SAC ralkap 80 hrawng cu Chin zapi ralkap phufonh nih voi hnih tiang an rak kah hna i, kahdohnak ah SAC ralkap 3 an thi, hliam tuar zong an um, tiah CDF-Zophei nih cathanh an chuah. An cathanh ning ah nihin August 3 chung ah a pikpak tete in suimilam 1 hrawng kahdohnak a chuak i, voi hnih cu faak ngai in an i kap. Nihin zanlei zong ah kahdohnak a chuak i, kahdohnak ah a thi le hliam an um le um lo fiang in theih khawh a si rih lo.
SAC ralkap lei nih hriamngan an hman caah CDF lei nih an naih kho hna lo i, SAC ralkap lei zong an umnak in an chuak ngam lo, tiah CDF-Zophei nih an thanh. SAC ralkap lei nih Timit kuangah umhmun khuar an timh caah July 31 khan SAC ralkap le Chin zapi ralkap hna cu an i kap cang. Kahdohnak ah cun SAC ralkap pawl cu CNA, CJDC ralkap, CDF-Zophei, CDF- Hakha, CDF-Thantlang le CDF- Lautu hna nih an kah hna, tiah theih a si.
Yekyi Peng Ah SAC Nih Rohingya 22 Tlaih Hna, Mawtaw Cung In Pahnih An Tla I Pakhat A Nunnak A Liam! Ayeyarwaddy ramṭhen Yekyi(ရေကြည်) peng Kuah – Ngatanchaung (ဂွ-ငါးသိုင်းချောင်း) mawtaw lampi ah Rohingya mi minung 22 cu SAC ralkap nih an tlaih hna, tiah theih a si. Kuah (ဂွ) peng Beda (ဗေဒါ) Check Gate ah Rohingya mawtaw citmi cu SAC ralkap nih an kham hna i, an dir duh lo caah an dawi hna.
Rohingya pawl nih cun mawtaw cu chiah ta in ramlak ah an zaam, tiah theih a si. A zaammi Rohingya pawl cu SAC ralkap nih an kawl hna i pa 9, nu 10 le ngakchia 3 an tlaih hna, tiah Ayeyarwaddy ramṭhen palik he aa naihniammi pakhat nih a chim. Mawtaw in an zaam lio ah nu pahnih cu mawtaw cung in an tla i pakhat cu a tlaknak hmun ah a nunnak a liam, pakhat cu hliamhma a tuar tiah a chim chap. An tlaihmi Rohingya pawl cu atu hi Yekyi palik sakhan ah bia an ceih lio hna, tiah theih a si.
Relchap; Tuanbia A Duhdawttu Hna Caah; Hlanlio piah Israelram ah Siang pahrang Solomon a rak um. Amah cu Pathian nih, Zeidah na duh bik?,” tiah a hal. “Ka mi hna ttha tein ka uk khawhnak hna hnga le an caah thil ttha ka tuah khawh nak hnga fim ka duh bik,” tiah a rak ti. A hal bantukin Pathian nih fimnak cu a pek i Siangpahrang fim ngaingai ah a cang.
Ni khat cu a sinah biahar ngaingai an rak chuahpi. Nu pahnih nih fate pakhat an i cuhnak bia a si. Cu nu pahnih hna cu inn khat ah an riak tti i, pakhatnu nih cun zan i an i hngilh karah a fate cu a hnet i a thi. A fate a thih cu a hnu hngalh tikah a thli tein a tho riangmang i a hawinu fa a nungmi kha a lak i a thimi amah fa ruak kha a thlen.
A thaizing an thawh tikah pakhatnu fa cu a thi. ttha tein a zoh i amah fa a si lo kha a hngalh. Cucaah a hawinu cu, “Zeicadah a nungmi ka fa kha naa lak i a thimi na fa tu ka sinah na ihter?,” tiah a ti. Pakhatnu nih cun, “A thimi hi na fa a si ko, a nungmi hi ka fa a si,” tiah a leh ve.
A fa a nungmi nu cu umtu awk a hngal lo i siangpahrang Solomon sinah cun a va phan. Siangpahrang Solomon nih cun bia ca a hal cikcej hna i, “A nungmi nan fate cu rak pu tuah u, cheu hnih ah ka cheu lai i ahohmanh i uhnak lo tein a cheu veve in kan pek hna lai,” tiah a ti hna.
Cu tikah a nu taktak a simi nih cun, Maw ka bawipa, ngakchiate cu cheu hin sawh hlah. A lu a nun paoh ah cun a za ko. Amah nih cun i lak ko seh,” tiah a ti. Pakhatnu tu nih cun, cheu ko, a cheu veve in ting ko u sih,” tiah a ti. Siangpahrang nih cun aho hi dah a nu taktak a si ti cu a hngalh caah a nungmi ngakchiate cu a nu taktak kha a pek. Mi vialte nih siangpahrang Solomon cu an thangthat.
Leave a Reply