Kawl ralkap khi Chinram in kan thawl dih hmasa hna lai i Chinram cu mah tein kan uk khawh tikah ralzam an kir te lai tiah fawi ngai in a chim rih Ramtha ah ralzam an kal ding a duh lonak a chim chih

A dik lomi ruahchannak ’false hope’ pek in kan mino forh hram ti hlah u, Tuzing kha biaruahnak pakhat ka zoh ve, ka upat ngaimi pakhat nih ‘MAH phu cu raltuk vanlawng 7 lawng an ngei i pakhat cu a mei ah an kah cang, chikhat ah an dih ko lai’ tiin a chim. A ngaitu zong nih an zum dih ve ko, mah vialte minung nih a dik lomi bia kha fawi tuk in an zumh ka hmuh tikah ka khuaruah a har, Laimi kan vanchia tuk hi ta ka ti.

A ngaingai ti ah cun MAH ralkap nih raltuk vanlawng 300 deng an ngei. Van ralkap 20,000 leng an ngei fawn. Atu cu ram pumpi phaisa vialte le leitang chuak mansung vialte khi an duhnak poah ah hman khawhnak power an ngei rih. Fawi ngai in Russia le China ah raltuk vanlawng an cawk kho fawn. Kawl ralkap khi Chinram in kan thawl dih hmasa hna lai i Chinram cu mah tein kan uk khawh tikah ralzam an kir te lai tiah fawi ngai in a chim rih.

Ramtha ah ralzam an kal ding a duh lonak a chim chih. Khua thuk piin ruat lem lo ahcun a chimmi uar tuk ding a si, ‘pasal taktak biachim a si’ tiin thangthat len awk khi a phu. A ngaitu 2k leng zong nih an zumh caah an thangthat, an uar taktak. Nain, Yangon hmanh lak dih a rak timhtu KNU nih kum 70 leng an doh nain Karen ram 0.2% hmanh thathi in an control kho ti lo.

Kachin zong nih kum 60 leng an doh nain Kachin ram 0.1% hmanh an control kho ve lo. Rakhine zong mah thiamthiam. Mino pazeizat dah an thi cang? An miphun zeitluk in dah an temtuar? Fiang tuk in kan pawngkam miphun kan hmuh khawh ko hna. Ai dang tukmi Israel he i tah chunh khi cu ngol rih ko u sih. Miphun ralkap nih Kawl ralkap khi Hakha le Thantlang in thawl dih (kan mino nunnak 500 cung a liam lai) kho hmanh hna sehlaw,.

Naypyidaw ah MAH a lal rih ko ahcun Hakha le Thantlang cu rial bang bomb le kuanpi nifatin an tlaknak hmun ah ai cang lai. An lak than khawh hlan lo vanlawng he vawlei he an miakmi an testnak hmun ai cang lai i kan khuaram a rawk dih cikcek te lai. Ralzam kir cu chim lo, chizawh hmanh an um ngam lai lo.

Cu caah, kan bochanmi kan pale nih a thilin cangmi kan mino thazaang nan pek hna tikah a dikmi information he thazaang pe hram u. A dik lomi ruahchannak ’false hope’ pek in kan mino nunnak kha computer games bang i celh hlah u sih, game chung bantuk in a liam cia mino nunnak thar hmuh khawh than a si ti lo.Salai Lungthli Tum