Kan Chinram Tualchung Thawngpang Vun Theih Cudah!!

KNDO Nih Mipi Sinah Nawlnak cathanh A Chuah (Tialhanwh Chanmi Chimram Thawngpang)
-===========================================
A tu lio ah a cang cuahmah mi KNDO le a phufonh ralkap hna ii kahdohnak kong he pehtlai in kan mah KNDO (centre) nih ka chuuah mi thawngpang lawng hi a a dikmi a si. A tu lio ah a cang cuahmah mi social media ah thlah le langhter a si mi hmanthlak le zukcaawl paawl cu kan mah lei in biachah, hnatlak mi a si rih lo. Kahdohnak thawngpang cu kan mah lei nih pehzulhin kan rak thanh peng lai ii hnatlak a si lomi thawngpang pawl thlah le zamh lo ding in mipi kan i nawl ko hna.” tiah KNDO nih nawlnak cathanh a chuah.

Chinram thawng; June 29, zinglei Suimilam 11:00 hrawngah SAC Ralkap motor 24 cu Kalaymyo in Chinram lei ah an kal tiah theih a si. Chinram lei a kal mi SAC Ralkap hi motor lian 23 le motor fami 1 an si. Motor 4 chungah thing le rua an phurh. A dang motor 3 chungah SAC Ralkap pawl khatte in an i cit, motor dang ah cun eidin tirawl an phurh tiah mithmutu nih an chim. June 27 zing zong Kalaymyo in ralkap motor 5 cu Chinram ah an rak kai i, Nihin tiangah Falam-Kalay kar Zawngkawng khua ah an cam tiah theih a si.

Falam-Kalay lampi cu mizapi nih umkal rih lo dingin CNDF nih theihternak zong an rak tuah. SAC lei nih Mandalay in vanlawng in Kalaymyo ah Ralkap thazang a chap chin langmang. June 29 zing SAC Ralkap motor a rak kai mi cu thawng kantial tiangah an phaknak hmun fiangin theih khawh a si rih lo.

Paletwa ah June 8 in Fuel (Diesel) kuat khawh a si ti lo caah June 27 thok in khuachung mei peknak dirter a si tiah mei zung bawi U Win Nyunt nih Western News ah a chim. “Kan sin ah Fuel a um ti lo. Fuel a phor tawnmi tilawng cu Fuel khat te he Kyaukdaw in Paletwa ah a raa i June 8 lampi ah tlaih/chuh a tong. Zeiruangdah chuh a si ti cu a fiang in theih a si lo. Cucaah kan sin ummi tein ni 10 leng hrawng kan pek. June 26 tiang.

June 27 thok in Fuel a um ti lo caah peng uknak zung le pengkomh uknak zung sin ah kan chimh hna. Tulio ah tilawng zong a chuah khawh lo caah Fuel phorhnak a um lo. Tinbaw in phorh khawhnak ding cun a cunglei kan chimh hna. Fuel a phak lawng ah mei pek khawh ding a si caah ni zeizahdah a rauh lai ti cu theih a si lo” tiah a chim.

Paletwa khua ah 2021 August thok in mei pek ningcang voi 8 ṭhen in nikhat ah voi 4 pek a si. Atu bantuk in mei a rat lo caah pehtlaihnak le rianṭuantu pawl caah harnak tampi a um i hlan chan a phan ṭhanmi kan lo tiah Paletwa khuami pakhat nih Western News ah a chim. “A hlan tein Internet an kan phihpiak. Atu ṭha tein a raa ti lomi mei zong a mih caah hlan chan phak he aa khat ko. Fur caan a si caah Solar pawl zong ṭha tein a ngah lo. Phone pakhat battery ca hman a har” tiah a chim. Paletwa ah Disel seh 2 in nikhat ah zaan 6:00pm in 11:00pm tiang sml 5 lawng pek a si. Ref/Western News

Paletwa le Matupi pehtlaihnak lam cu fur caan ah umkal a har bantuk in hramhram in uknak lak a sihnu ah CDF he a cangmi kahdohnak ruangah cu lam cu hman khawh a si ti lo. Cucaah Kaladan tiva in kal khawh a simi Rakhine ram cu Paletwa peng ah hngatchan bik a si.
A luancia May 26, Paletwa peng ah AA le SAC ralkap karlak ah kahdohnak a chuak hnu in Kaladan tiva hmang in umkalnak cu SAC nih a phih tiah khuami hna nih an chim. Ti lam in kal kan duh a si ahcun, SAC le mipi nawl ngeitu sin ah zarhkhat tuan in nawl hal cia hnu lawngah kal khawh a si tiah an chim.

Paletwa in Rakhine ram Kyaukdaw khua hi a hlan ahcun zarhkhat ah voihnih tilawng a kal kho nain atu zarhhnih chung cu kal khawh a si rih lo tiah min langhter a duh lomi pakhat nih RFA ah a chim. SAC nih nawl a awn lawngah ti lam hi kal khawh a si caah Paletwa khua ah chiti, Facang, cite man a kai tuk i harnak kan tong. A hlan ah facang tun khat ah 50,000/- a simi kha atu ahcun 80,000/- a phan cang tiah min langhter a duh lomi nih RFA ah a chim.

Facang man a kai bantuk in Fuel man zong 1 liter ah 4,000/- tiang a phan tiah a chim. SAC nih ti lam an phih caah eidin a har, khuakhat le khuakhat i tlawn a har tuk cang caah ngandamnak le chiatni ṭhatni a um tikah a har ngaingai tiah Paletwa khuami pakhat nih RFA ah a chim. Milu 60,000 hrawng an umnak Paletwa peng ah minung 700 leng cu Paletwa khuachung pumpululh certual ralzaam camp ah ralzaam dirhmun in an um tiah theih a si.

SAC nih ti lam a phih caah ralzaam pawl zong eidin harnak an tuar chih tiah theih a si. Khuami hna caah vawlei tang phummi bom pawl zong ṭih a nun tuk caah harnak ton chin a si. Riikhiahmi hmunhma pawl le bom puah te pawl hna a um caah lo zong zalong tein kal ngam a si lo tiah Paletwa ralzaam pakhat nih RFA ah a chim. Paletwa pumpululh certual ralzaam camp ah aa dormi nu pahnih cu eidin a har i mehhang an kawlnak ah bom an i lamh sual caah fak ngai in hma an pu tiah a chim.

Khuami hna nih an i hngatchan bikmi lam a phihmi hi SAC nih nuhrin covo a buar a si tiah Chin Human Rights Organization (CHRO) Director Za Uk Ling nih a chim. A luancia May thla dongh lai hrawngah AA le SAC ralkap karlak kahdohnak a chuah hnu in atutiang kaphnih kar entainak a fak i a pawngkam khua ah kaphnih nih hmunhma an khuar tiah RFA nih a langhter. SAC nih ti lam a phih ruangah Paletwa mipi hna harnak an tong.

Chin ramkulh, Falam khua peng sakhaan ah June 28 zaan sml 11:00pm hrawng ah kahdohnak hmete a chuak tiah theih a si. Kahdohnak chungah a thimi le aa hliammi theih an si rih lo. Kahdohnak ruangah palik sakhaan pawng mipi inn cheukhat le palik sakhaan kulhnak hna ah kuan hmuh an si. Kahdohnak a tuahtu hi zeibantuk phu dah an si ti zong a fiang in theih a si lo tiah theih a si.

Karen peng, Myawaddy thlanglei, Walemyaing peng ah a ummi SAC nih hmunhma an khuarnak Ukaritha sakhaan cu June 28 zaanlei sml 6:30pm hrawng ah kan lak khawh cang tiah KNLA nih a thanh. Ukaritha sakhaan cu KNLA,KNDO commando phu VENOM le Cobra telhmi phufonh nih lak an i timh caah SAC nih vawlei lei he van lei he kah a bawmh i lak khawh a rak si lo nain June 28 ah cun teinak kan hmuh cang tiah a thanh.

NUG Ministry of Defense nih hriam le mipi sin aa rak fonhmi CDM Major, Captain telh in ralkap 18 cu lawmhnak laksawng sing 344 a pek tiah theih a si.CDM Major, Captain telh in hriam he mipi sin aa rak fonhmi ralkap 18 cu an rak putmi hriam le raltuknak thilrii pawl cung hngat in tangka sing 344 pek an si i NUG Ministry of Defense nih hriam he mipi sin aa rak fonhmi cu phungning tein himnak pek nan si lai i laksawng zong pek chih nan si lai tiah NUG nih a thanh. Mipi sin aa rak fonhmi ralkap le palik 10,000 leng an si cang tiah NUG nih a thanh.

Kan Chinram Tualchung Thawngpang Vun Theih Cudah!!

Be the first to comment

Leave a Reply Cancel reply