Kalay Peng, Nat Chaung Khua Kahdohnak Ah SAC Ralkap 5 An Thi + Thawngpang Dang, Sagaing ramṭhen, Kalay peng thlanglei, Nat Chaung(နတ်ချောင်း) khua pawng ah rallam a sialtu SAC ralkap hna cu mizapi vengtu ralkap VAKOK (CNDF) le Pah-Kah-Phah phufonh hna nih April 24 zinglei Sml 10:30 hrawng ah a thli tein an bawh hna i an kah hna caah SAC Ralkap 5 an thi, tiah theih a si.
“Nat Chaung khua chaklei ah Warpukgyi Chaung ( ဝါးပုတ်ကြီးချောင်) ti mi hmun a um i SAC ralkap hna cu rallam hmunthum in an ra. Warpukgyi Chuang lei ah a ra mi hi minung 25 an si. Kan bawh hna i kan kah hna caah SAC ralkap 5 an thi. SAC ralkap cu hnu an tolh ṭhan. Kanmah lei hliam tuar mi aho hmanh kan um lo,” tiah VAKOK (CNDF) hruaitu Aa Lian nih yangon khit thit ah a chim. SAC ralkap hna cu bomb puahhnawh kan tong sual lai ti phang in mawṭaw lampi zul ngam loin ramlak in an ra i, a thli tein kan bawh i kan kah hna hi a si, tiah a chim chap.
Magwe ramṭhen, Pauh peng Nyaung Yin khua pawng ah Thazaang 70 hrawng a si mi SAC ralkap hna cu nizan April 23 zinglei Sml 10:00 hrawng ah mizapi vengtu ralkap nih bomb an puah hna i SAC ralkap 2 an thih lengah tampi hliam an tuar, tiah theih a si. Cu SAC ralkap hna cu Yee Pia khua lei ah rallam an sial lio ah Nyaung Yin khua pawng ah bomb puahhnawh an tong cang. Kaphnih kahdohnak cu suimilam 1 hrawng a rau i SAC ralkap hna cu Myiang peng mizapi vengtu ralkap le Pauh tlanglei Tinghlua phu hna i bawm in an kah hna i mizapi vengtu ralkap lei in hliam tuar um lo tein hnu an tolh kho, tiah theih a si.
April 23 zong ah Pauh peng Sating khua ah thazaang 80 hrawng SAC ralkap hna cu Pakokku mizapi vengtu ralkap PRF, Pakokku Generation Z, Pauh peng mizapi vengtu ralkap, Myaing peng mizapi vengtu ralkap, Pauh hriamtlai ṭangrual phu hna i bawm in an kah hna. Kahdohnak cu Sml 6 hrawng a rau i SAC ralkap 5 an thi. Mizapi vengtu ralkap hna cu hliam tuar um lo tein hnu an tolh kho, tiah Pouh peng mizapi vengtu ralkap nih cathanh an chuah.
Karenni Ramkulh Kahdohnak Ah SAC Ralkap 16 An Thi, 17 An Zaam: Karenni (Kayah) ramkulh chung, April zarhthumnak chung i a chuak mi kahdohnak ah SAC ralkap 16 an thi i, tamlakte hliam an tuar, tiah Karenni mizapi vengtu ralkap nih cathanh an chuah. Pruso peng Htalay(ထားလဲ) le Naan Phe ( နန်းဖဲ) karlak ah rallam a sialtu SAC ralkap hna cu tualchung mizapi vengtu ralkap nih an kah hna i SAC ralkap 17 cu an zaam, SAC ralkap a zaam mi cheukhat cu Karenni mizapi vengtu ralkap sin ah an i fonh ṭhan, tiah theih a si.
Cu kahdohnak ah cun KNDF lei in ralkap 2 an nunnak a liam, tiah KNDF nih cathanh an chuah. April zarhthumnak chung ah Moebe, Wari Su Plai( ဝါရီဆူးပလိုင်) le Wari Kaw Khu (ဝါရီကောခူ) khua, Demohso peng, Dawkami le Oo Khu Ri( ဥခူရီ) khua, Pruso le Baw – La – Khe ramri um Htalay (ထားလဲ) le Naan Phe khua tibantuk hna ah kahdohnak a chuak. Demoso peng Dawkami khua pawngkam hrawng ah April 14 in April 23 tiang kahdohnak a fak i, cu bantuk in Moebe peng Wari Su Plai khua pawng zong ah April 15 in kahdohnak a chuak cang.
April 15 ah Loikaw khuapi Htee Tta Mah (ေထးတမ) veng chung ah SAC ralkap le mizapi vengtu ralkap hna kahdohnak a rak chuak i SAC ralkap lei nih mipi umnak hmun cu hriamngan in an kah hna i, April 16 ah Loikaw khuapi Chike ( ချိကယ်) sang ah kum 8 ngakchia pakhat zong an kahthah tiah, KNDF nih cathanh an chuah. Cu pinah SAC ralkap hna nih zarhkhat chung ah Loikaw le Demoso peng chung ah inn 14 an khangh i hriamngan kahnak ruang ah Demoso, Pruso le Loikaw peng ah inn 8 an rawk, tiah an langhter. (Mai Flowery Par, TCP Journalist)
Thawngdang, Tatmadaw lutlai Min Aung Hliang sawmnak cungah Welcome Kan Si Tiah Daw Saw Mya Yaza Linn nih a chim, Myanmar ram a tu lio boruak cu ram daih biaruahnak a herh caah Tatmadaw lutlai Min Aung Hliang sawmnak cungah Welcome kan si tiah Rakhine ram ramkhel Party (ALP) President Daw Saw Mya Yaza Linn nih a chim. Myanmar a tu caan hi ram daihnak biaruah aherh i, Mipi hna nih ram daihnak theihpar kan zuun khawh nak hnga ding caah a tu sawmnak hi ram daihnak lam thar pakhat a si kho mi a si ti zong in a chim.
” A tu Myanmar ram mipi hna nih kan ton cuah mah hi thinphan harnak cu kan phisin khawh nak hnga ding caah biaruahnak ngeih lo cu a si kho lo. Kan mah lei zong nih ram daihnak lei kan phak khawh nak hnga ding caah mi pi thinhunnak kan phisin khawh in tlangcung mi hna nawl ngeih nak cu, a tu ah kan sersiam khawh cun miralttha taktak kan si” ti zongin a chim.
” Tlangcungmi hriamtlai hna nih zei ruangdah dah dohthlennak kan tuah timi hi kan mah i kan vawlei sersiam khawhnak caah a si. Miphun phun khat nih aa timhmi cu mah ram, mah vawlei sersiam khawh nak, mah vawlei in a chuakmi thilri pawl hmangin, mah le vawlei, mah le ram thanchonak caah timhlmahnak ngeih a si.
Cu cu Federal ram sersiam timi cu a si. Mah sersiamnak caah tatmadaw leiin zei tluk in dah an kan ruah piak, zeitluk in dak pek chanhnak an kan ngeih , kan mah lei nih kan hmuh ning , an mah lei nih an hmuh ning tiin kal a si lai. Kap khat lei lawngin teinak hmuh in va kal a si lai lo. Kap hnih in Win Win policy si dingah, aa zuam kho mi dirhmun a si kho.
Tandor nun ngeih in kap khat le kap khap in chim a si lai, kan tuah mi rian hi kan umnak ram thlenkhawhnak caah a si lai timi ruahnak , ceihmainak hmun ah a phan kho mi zapi cungah ruahchan nak ngeih in ruah mi pakhat cungah a muti a si. Federal system kan phak khawh lai timi hi ka hmuh khawh.
Kan ram pi zoh zongah a tu caan ah hin thinphan tuk dir hmun kan phan i, a har tuk mi dirhmun in a tha tuk mi dir hmun akan phan kho lai lo timi hi ho hmanh nih chim khawh a si lo” ti zong in a chim.
Leave a Reply