Kachin ramkulh le Sagaing ramtthen chung i ni 5 chung kahdohnak ah SAC ralhrang lei in minung 180 leng an thi, tiah Katha-PDF nih thawngpang an chuah.
Kachin ramkulh, Shweku peng le Sagaing ramtthen, Katha peng ah July 5 thawk KIA-PDF (Kathar) i bawm in in SAC ralhrang an doh hna i, ralhrang 180 leng an thih hi a si.
KIA Brigade No. 8 tang ah a ummi Battalion No. 5 hruainak in PDF nih SAC ralhrang Battalion No. 304 le 309 cu July 5 thawk in Myohlah khua pawng ah an kah hna.
July 5 kahdohnak ah SAC ralhrang 10 hrawng an thi. A thaizing July 6 ah Koh Kwai timi Tiva ah SAC ralhrang tilawng pahnih tichung ah pil lak in KIA-PDF nih RPG in an kah i, ralhrang 60 hrawng an thi.
July 7 ah KIA-PDF nih SAC ralhrang pawl voi 4 tiang Landmine in an puah hna i, SAC ralhrang bawi pakhat telh in minung 30 hrwang an thi tthan.
July 9 ah SAC ralhrang nih Fighter Jet le kee ralkap hmang in KIA-PDF cu an kal hnawh tthan i, kahdohnak a fak ngaingai.
July 9 kahdohnak ah SAC ralhrang 50 nak tlawm lo an thi i, a dang 70 hrawng hliamhma an pu hna.
Katha-PDF nih thawngpang an chuah ning in July 5 in aa thawkmi kahdohnak ah SAC ralhrang lei in minung 180 leng an thi tiah an langhter.
Kap hnih kahdohnak ah KIA-PDF lei in minung pathum an thi i, a dang minung 3 an tlau, tiah PDF he aa naihniammi khuami pakhat nih Myanmar Now ah a chim.
The Chin Journal
Leave a Reply