Ka Dawt rak kir than cang law, Ka sinah na rak kir than a si ah cun!!

Ram Le miphun Caah A Nunnak A Liam Mi David A Dawt, “Ka Dawt Kan Auh Piak Than Uh”
======================
Tantak mi A dl Alice July nih ” Ka Dawt ka auh piak than uh ka hrut cang lai. Ka dawt lawng ngah than ka duh. Ka dawt a rak kir than a si ah cun zei poah ka tuah piak dih lai. Nan nunnak in rak thleng ka ti hna hmanh sehlaw, ka nunnak in ka thlen ko lai. Zei ruangah ka dawt cungah vanchiatnak a tlun hnga.” tiah a hoi le sinah a chim.

20.8.2022, Memoso pengkulh, ခြေတော်ရာဘုရား tlang pawng kahdohnak ah a nunnak a liam mi KNDF B-19 in Sniper tlaitu David cu August ni 22 ah ruak thlah nak an tuah tiah kan theih. Pasaltha uptatnak sang bik kan peek e. Tantak mi a dawt a tuar kho hrimhrim lo e.

Gangaw Peng Kahdohnak Kong CDF-KKG Nih Cathanh An Chuah! Gangaw peng thlanglei ah rallam sialtu SAC ralkap 60 hrawng cu CDF-KKG battalion 6, CDF-Zotung, Naga Ngyi Naung, YPDF, YDF, Nah-pah-ṭah le PDF Gangaw thlanglei tualchung hriamtlai phufonh hna nih nihin August 22 ah Shoutpin(ရှောက်ပင်) khua le Lungchung(လုံခြုံ) khua pawng ah an kahdoh hna, tiah theih a si. Kahdohnak cu zinglei suimilam 8:00 hrawng in an thawk i, suimilam pakhat tluk hrawng an rau. Cu kahdohnak ah cun SAC ralkap 2 an thi, tualchung hriamtlai phufonh lei hliamhme tuar an um, tiah theih a si.

SAC ralkap hna nih khuami Caw 4 an thahpiak hna leng ah, Shoutpin(ရှောက်ပင်) khua inn 3 an khanghpiak hna. SAC ralkap nih Shoutpin (ရှောက်ပင်) khua i nu hna cu an tlaih hna i, Shoutpin (ရှောက်ပင်) khua le Pia(ပျား) khua kar hlei an tan lio ah, ralphaw ah an hman hna i an thlah ṭhan hna, tiah CDF-KKG nih cathanh an chuah. Kanbalu Peng Nyaungkone Khua Cu SAC Ralkap Nih An Khangh!: Sagaing ramṭhen Kanbalu peng, Nyaungkone khua cu SAC ralkap nih nihin August 22 zaanlei suimilam 4 hrawng ah a khua ning in an khangh, tiah tualchungmi hna nih an chim.

SAC ralkap pawl cu zing suimilam 10 hrawng ah kahdohnak zei hmanh um loin Nyaungkone khua ah an lut i khuachung ah duhpoh in meithal an puah, inn an baoh i an duhmi thilri poh an lak dih hnu, zaanlei suimilam 4 hrawng ah an khangh, tiah theih a si. Nihin tiang ah Kanbalu pengchung in SAC ralkap nih khua 30 leng an khangh cang i umnak ngei lo mi nikhat hnu nikhat in an karh chin lengmang, tiah theih a si.

Karenni Ramkulh In August Thla Zarh Thumnak Chung Ah Kahdohnak Voi 10 A Chuak, Karenni ramkulh, August zarh thumnak chung ah Shataw peng, Demoso peng, Hparuso peng le Loikaw pengchung ah kahdohnak pehtlai in a chuak, tiah KNDF nih nihin August 22 ah cathanh an chuah. August 20 ah, Shadaw peng Shan-Kaya ramri SAC ralkap sakhan; Tangusu(တငူးဆိုး) sakhan cu Karenni ralkap phufonh nih an kah i, cu sakhan cu an lak khawh, tiah theih a si.

August 15 in August 20 tiang Karenni ramkulh Loikaw, Demoso, Hparuso le Shadaw pengchung ah SAC ralkap le Karenni ralkap phufonh kar kahdohnak voi 10 hrawng a chuak. August 15 kahdohnak ah SAC ralkap pakhat a thi i, August 20 kahdohnak ah SAC ralkap 2 an thi. August 20 kahdohnak ah KNDF B-19 in sniper tlaitu ralkap David cu a nunnak a liam i, nihin August 22 ah ruak vuinak kan tuah, tiah battalion 19 nih cathanh an chuah.

Progressive Karenni People Force (PKPF) nih August 15 tiang cathanh an chuahmi ah SAC nih nawlngeihnak an lak thla 18 chung ah voi 420 tiang kahdohnak a chuak i, Karenni ralkap phufonh lei in ralkap 149 nunnak a liam. SAC ralkap lei 1306 an thi cang, tiah an langhter. Yangon Ramṭhen Twantay Peng Ah SAC Ralkap le Palik Kah An Tong 7 An Thi: Yangon ramṭhen, Twantay(တွံတေး) khua ah nihin August 22 zaanlei sumilam 6 hrawng ah ralveng ding in a kalmi SAC ralkap le palik pawl cu kah an tong i SAC palik le khuabawi chungtel 7 an thi, tiah tualchungmi hna sin in theih a si.

Twantay peng le Maubin (မအူပင်) kar, Tha Win Taw (သဝင်းတော) khua pawng ah pengkomh palik bawi, khuabawi hna le ralvengtu phu hna cu kah an ton hnu in kaphnih kar kahdohnak a chuak, tiah tualchungmi nih an chim. SAC ralkap le Palik hna cu zei bantuk phu nih an kah hna ti cu theih a si rih lo, tiah a chim chap. A thimi hna cu khuabawi chungtel hna le palik an si, tiah theih a si.

Saw Khua Ah Hriamtlai Phu Nih Minung 6 An Thah Hna I PDF Phufonh Nih Duhlonak Cathanh An Chuah! Magway ramṭhen, Saw khua ah chawlettu U Khin Maung Lin inn cu August 21 zaan ah YDF(Saw) hriamtlai phu nih meithal he an luhhnawh hna i, inn ngeitu U Tin Maung Lin, a tu nu kum 13 pakhat telh in minung 6 an thah hna, tiah theih a si. August 21 zaan ah Saw khua, Zaeya sang um mi chawlettu U Khin Maung Lin le a chungkhar cu TV in pumpululh chuih an zoh lio ah YDF(Saw) nih luhhnawh in an kah hna i, an chungkhar mi 4 leng ah an hawileng 2 zong an thah ve hna, tiah tualchung mi nih an chim.

Hriamtlai phu kahnak ruang ah nunnak liammi hna cu inn ngeitu U Khin Maung Lin, a nupi Daw Yin Ngway, a fapa nupi Daw Khin Ma That le kum 13 tluk simi Daw Khin Ma That leng ah an mileng U Aung Thein Win le U Zaw Htay hna an si. U Khin Maung Lin chungkhar thah an ton hnu ah an motor 2 le phaisa hna cu hriamtlai phu nih an i kalpi, tiah tualchung mi nih an chim. U Khin Maung Lin cu Saw ah SAC ralkap hna he a pehtlaimi chawlehnak a tuahtu a si i, SAC ralkap sin “thawngpetu” le “dalan” tiah a min a lang bal lo, tiah tualchung mi nih an chim.

“Dalan a si tiah thawngpang a lengmi cu a um lo nain, chawlehnak a tuahmi hi SAC ralkap he pehtlaihnak a ngei. Amah cu Saw ah mi tampi nih theihmi chawlettu pakhat a si. Dalan a si caah thah a tong tiah thawngpang a leng,” tiin Saw khuachung ummi pakhat nih a chim. Chawlettu U Khin Maung Lin cu SAC ralkap kuttang um pyusawhti hruaitu a si caah Yaw hriamtlai phu YPDF nih an fimhlawm hna, tiah thawngpang a leng fawn.

U Khin Maung Lin innchung in meithal kah thawng a than hnu ah Saw khua um SAC ralkap hna nih hriamngan an thlah, tiah tualchung mi nih an chim. Hi kong he pehtlai in Saw zatlang uktu phu le tualchung hriamtlai phu 6 fonh nih YDF(Saw) tuahsernak cu an duhlonak kong cu nihin August 22 ah cathanh an chuah colh.

YDF(Saw) phu nih dalan tiah min putter in chungkhar pakhat cu an chungkhar ning in an thah hna, an thahmi hna ah hin kumtling lo ngakchia pakhat zong aa tel. Hi thahnawnnak an tuahmi kong le an thil an chuh hna nak kong ah YDF(Saw) lei an palh, tiah tualchung hriamtlai phu 6 fonh nih cun an langhter. YDF(Saw) nih biahalnak le fehternak zei hmanh tuah hmasa loin, atu bantuk in mi nunnak an laak caah duhlonak kan langhter, tiah PDF phufonh nih cun an langhter.

Hriamtlai phu hna meithal kahnak ruang ah sangchung ummi pahnih U Khin Maung Kyi le Maung Myat Bune Khant Naing, kum 17 zong hliamhma an tuar. YDF cawlcanghnak dohkalh in cathanh a chuahtu hna cu; Saw peng zatlang uktu phu, Laungshe(လောင်းရှည်) tualchung hriamtlai phu( LSR PDF), Saw tualchung hriamtlai phu (Saw PDF), The Youth Force (Saw le Kyaukhtu), Kyaukhtu tualchung hriamtlai phu ( KTU Region) le Korea um Yaw miphun hna i fonh in an si.

KIA Phufonh Nih SAC Ralhrang 34 An Thah Hna Pinah! Sagaing ramthen, Kathar pengkulh, BanhBoigone khuate ah kahdohnak a chuak i SAC ralhrang minung 34 an thih pinah raltuknak vanlawngin SAC ralhrang nih bomb an thlak ko nain mi aa palh caah ralhrang minung 8 an thi chap i an zapiin minung 42 an nunnak a liam tiah kan theih.

August ni 22, zinglei suimilam 5:30 ah Kathar pengkulh nichuah lei, BanhBoigone khuate ah NgaO (121), hoikom phufonh a si mi KIA tatyin-12 kuttang Kachin PDF, Kathar Pah-Kah-Phah phufonh hna nih SAC ralhrang 309 ralkap, 120mm in Ayarawaddy tiva cu lawnhin raltuknak vanlang pa 2 in a va bomh hna i, BanhBoigone khuate cu chun suimilam 12:30 ah cunglei in kahdohnak an tuah tiah kan theih. Cu kahdohnak ah cun SAC ralhrang minung 34 an thi i, raltuknak vanlawngin bomb kan thlak an ti ko nain mi aa palh caah minung pa 8 an thi chap tiah kan theih.

Gangaw PDF Sakhan Cu SAC Ralkap Nih An Khangh! Magway ramṭhen, Gangaw peng thlanglei ummi PDF-Gangaw Company 12 sakhan cu, SAC ralkap nih nihin August 12 zing sml 10:00 ah an khangh, tiah theih a si. “Ralhrang 70 hrawng nih kan sakhan lei hoih in rallam an sial caah sakhan cu an khangh dih. Kanmah lei in a thimi le aa hliammi cu kan um lo,” tiah thlanglei ummi PDF-Gangaw in ṭuanvo ngeitu pakhat nih a chim.

Kan sakhan an khangh ruangah thilri a rawkmi le facang rawkmi zat cu ṭha tein kan tuak rih lo, tiah a chim chap. SAC ralkap pawl nih Aungmin khua zong hriamngan in an kah caah inn tam ngai a rawk, tiah PDF-Gangaw nih an langhter. Cu pin ah Aungmin khua thlanglei ummi lo-thlam hna zong mei in an khangh hnu ah SAC ralkap pawl cu Gangaw khua chung ah an lut ṭhan, tiah theih a si.

Pauk Peng Khuate Panga Cu SAC Ralkap Nih Nithum Chung An Khangh Caah Khuami A Thong Leng An Zaam!: Magway ramṭhen, Pauk peng Sathein, Ngaungyin, Kwekone, Kepin Ing le Laylan khua cu SAC ralkap nih nithum chung mei in an khangh caah khuami a thong leng cu a himnak hmun ah an zaam, tiah tualchung mi hna nih an chim. August 18 lio in SAC ralkap 150 hrawng cu Magway ramṭhen, khuate panga ah rallam an sial i, inn an khangh caah khuate panga lawng si loin a pawngkam ummi khua hna zong an zaam, dih tiah theih a si.

SAC ralkap nih inn an khangh pin ah khuami hna thilri man sung tampi cu an laak i, motor panga in an kalpi. Vok le an ar hna zong an thah i an ei, tiah an chim. SAC ralkap nih mei khanghnak in Sathein khua inn 7, Ngaungyin khua inn 20, Kwekone kgua inn 6, a dihlak inn 32 a ciam, tiah tualchung mi hna sinin theih a si.

Moreh Khua Ah Assam Rifle Nih Myanmar Rammi Pa Cu Hriamnam He A Inn Ah An Tlaih! India-Myanmar ramri Manipur ramkulh, Moreh khua Kanan sang ummi Myanmar rammi pakhat cu, August 19 zanṭim ah Assam Rifle le ramkulh palik nih a inn ah an luhhnawh i, pistol zung hnih he an tlaih, tiah Assam Rifle nih cathanh an chuah. Tlaih a tongmi Myanmar rammi pa cu Imphal khua lei ah an kuat. Anih hi nikum ah Moreh khua chung ah meithal le kutcheh bomb he an rak tlaih bal cangmi a si, tiah theih a si.

Tamu Khua Chaklei Ah Mi Thilri Chuhnak A Chuak Ṭhan! Sagaing ramṭhen, Tamu khua chaklei ah eidin thilri a zuarmi hna cu, hmai aa hupmi hna nih nihin August 22 zinglei sml 4:30 hrawng ah an thilri an chuh hna i, tangka tlawmpal zong an laak, tiah theih a si. Nihin August 22 ah Tamu khua chaklei khuate ah eidin thilri le nga zuar ding in a kalmi thil zuartu 3 cu Tamu peng Kwintaung khuathar le Chaungnetgyi karah, a nakmi puan in hmai aa hupmi pa 4 nih nam pali in lam an kham hna i, tangka kyats 60,000 hrawng an chuh hna, tiah theih a si.

Cu hnu sml cheu hrawng a rauh ah Tamu khua lei in thil zuar ding ah cycle in a kalmi nuva hna zong an thilri chuh ding in an dawi hna nain an zaam manh, tiah tualchung mi pakhat nih a chim. Puan nak in hmai aa hupmi misual phu hna cu a luancia August 17 ah mi thilri chuttu hna he an umtu ning aa khat ngaimi an si, tiah tualchung mi hna nih an chim. Tamu khua chaklei ah mi thilri chuhnak hi voili nak tam a chuak cang ko nain, SAC ralkap le PDF nih hmalaknak zeihmanh an tuah rih lo, tiah theih a si.

Yangon Ah UG Phu In Ralkap 6 Tlaih An Tong, A Hmun Ah 2 An Thah Hna, Yangon ah umhmun khuarmi UG phu pakhat a simi Burmese Ranger Army-LDF phu umnak inn pakhat cu August 9 ah SAC ralkap nih an rak luhhnawh hna i, an tlaih hna, tiah theih a si. SAC ralkap 30 hrawng nih civil motor pathum le DC Double Cab pakhat in an luhhnawh hna i, UG ralkap 6 an rak tlaih hna, tiah theih a si.

Tlaih a tongmi UG ralkap 6 chung in 2 cu a hmun ah an kah thah hna i, a taangmi 4 cu SAC ralkap nih ralram an kalnak ah ralphaw ah an hman hna, tiah theih a si. “An rak kan luhhnawh lio ah UG ralkap 9 an kan tlaih. Cu chung ah 3 cu kan luat. Dalan nih SAC ralkap thawng a pek hna ruangah a si, tiah kan theih caah hriamnam kan ngeihmi chung in kan si khawh tawk kan kah ve hna. Hriamnam aa dan tuk caah ralkap 6 an tlaih hna, 2 cu a hmun ah an kah thah hna.

“Meithal kuan nih ka ke a khen caah ka zaam kho ti lo. Ka hawile pahnih nih an ka cawi i, an ka zaampi,” tiah tlaih a tong i a luatmi UG, Burmese Ranger Army-LDF phu in ralkap pakhat nih a chim. Dalan nih thawng peknak ruangah Burmese Ranger Army-LDF phu le anmah he ṭhangṭi phu chung in ralkap cheukhat cu SAC ralkap nih an tlaih hna.

Tlaih a tongmi ralkap 6 sinin Glock 19-Gen5 a tawimi zun hnih, Ready Made bomb lung nga, tangka kyats sing 18, 9mm meithal kuan 200 le kutser bomb lung nga cu SAC ralkap nih an rak tlaih, tiah theih a si.

Chaung-U Peng Ah Pyusawhti Sakhan Pakhat Cu PDF Nih Drone In Bomb An Thlak Caah 4 An Thi: Sagaing ramṭhen, Chaung-U peng Kankyikone khua ummi, Pyusawhti sakhan cu drone in bomb kan thlak caah SAC ralkap kuttang Pyusawhti 3 le ralkap 1 an thi, tiah Myaing peng T.G.R phu in Bo Taik Kar nih a chim.

August 20 ah Chaung-U peng Kangyikone khua ah umhmun a khuarmi Pyusawhti sakhan cu, T.G.R women Drone Force le CRA Drone Team i bawm in T.G.R nih a serchuahmi bomb kan thlak hna caah Pyusawhti 3 le SAC ralkap 1 an thi, tiah ṭuanvo ngeitu nih cun a chim. Cu kahdohnak ah cun T.G.R Women Drone Force, CRA Drone Team, Saw Bwar Gyi (MPDF), le Bo Tauk Htun (MBTT) hna i bawm in an kah hna, tiah theih a si.