CNA/F Bia Hal Kan Duh Hna
============
“CNA/F Kong He Pehtlaiin Bia Hal Kan Duh Hna, CDA/F kong he pehtlaiin bia hal kan duh hna. Zeiruangah dah Hakha le Thantlang mino pawl CNA ah a lut kho hnga ding, luhawk a tlak mi pakhat hmanh zeiruangahdah an luh lo, Ziah an luh lo.?” tiah John Ki Ling timi pa a facebook cahmaiah biahal nak a tuah hna. Crd-John Ki Ling . A bia hal mi kong he pehtlaiin zeitindah nan ruah cio ning a si ve, Zeiruangahdah an luh hnga lo timi hi.
Yesagyo Peng Chittu Khua Ah SAC Ralkap Nih Minung 5 An Tlaih Hna I, Innlo Zong An Hrawh! Yesagyo Peng Chittu Khua Ah SAC Ralkap Nih Minung 5 An Tlaih Hna I, Innlo Zong An Hrawh!: Yeagyo peng Chittu(ချစ်သူ) khua cu SAC ralkap nih nihin (July 15) zing ah an luhhnawh i minung 5 an tlaih hna lengah inn zong zeimawzat an hrawh, tiah tualchung mi nih an chim.
Tlaih a tong mi hna cu U Kyaw Min Thinh(ဦးကျော်မင်းတင့်) le a nupi Daw Thin Zar(ဒေါ်တင်ဇာ), U Aung Lin, Daw Khin Myo That(ဒေါ်ခင်မျိုးသက်) le Daw Pyong(ဒေါ်ပြူး) an si i NLD party a dirkamhtu an si, tiah theih a si.
Chittu khua in minung 2 cu SAC ralbawi captain reng in an um i, khua cu voikhat an khangh cang caah captain pakhat nih khangh ti lo ding in nawl a pek hna nain June 2 ahkhan voihnihnak ah an khangh ṭhan. Tlaih a tong mi hna cu Pakokku SAC ralkap sakhan ah an kalpi hna i, Chittu khuami hna cu a himnak hmun ah an zaam, tiah theih a si.
Mizoram Ramkulh Chung Ah Myanmar Rammi 5 Rithaisi Ruangah Tlaih An Tong! Mizoram Ramkulh Chung Ah Myanmar Rammi 5 Rithaisi Ruangah Tlaih An Tong!: India, Mizoram ramkulh chung ah rithaisi ruangah le fir ruangah Myanmar rammi minung 5 tlaih an si, tiah Mizoram ramkulh palik nih cathanh an chuah. July 11 ahkhan Aizawl pawng Sihhmui ralzaam camp ummi Hlah Boe fapa Gabriel Muana(kum 25) nih Sihhmui khua inn pakhat cu boh in, innka a hrawh lio ah kan tlaih, tiah Mizoram palik nih cun an thanh.
July 12 zong ahkhan Champhai peng palik hna nih Falam peng in Hrang Kap Thang(kum 22), Cung Lian Mang(kum 36) le Mizoram um mi 2 cu Dungtlang palik duty post ah bing-rang 447.88 gram, Myanmar phaisa in sing 5600 man he an tlaih hna, tiah theih a si. July 14 ah Khawzawl palik duty post ah Tedim peng in a ra mi Lal Ngai Chin(kum 32) sin in Kanza(Marijuana) 9kg, Myanmar phaisa in sing 6 leng man an tlaih ṭhan, tiah theih a si.
July 15 ah Champhai peng Dungtlang duty post ah bing-rang 173.93 gram, Myanmar phaisa in sing 217 leng man cu Falam peng in a ra mi Pi Duh Lawng Thluai(kum 36) sin in kan tlaih, tiah Mizoram palik nih cathanh an chuah. SAC ralkap nih uknak an laak hnu in ramchung ah phungning tein i uknak le cawlcanghnak a um ti lo caah Myanmar ram in Mizoram lei ah rithaisii a phortu cu hlan nak in an tam deoh tiah theih a si.
Rithaisi kong he pehtlai in Chin tualchung hriamtlai phu hna nih Mizoram lei ah rithaisi phor lo ding in ralrinpeknak an rak thanh nain a hlawhtling lemlo in a lang.
Yeni Nichuahlei Naypyidaw PDF Camp Cu SAC ralkap Nih An Kah I, PDF 1 Nunnak Liam!: Pako ramṭhen Yeni nichuahlei Naypyidaw PDF 802 battalion sakhan cu July 14, zaanlei ahkhan hmunthum in kah an ton caah PDF pakhat nunnak a liam. SAC ralkap lei in minung 6 hrawng an thi, tiah Naypyidaw PDF 802 sin in theih a si.
“Kan umnak hmun panh in SAC ralkap nih hmunthum in rallam an kan sial hnawh i, an kan kah caah kanmah lei in minung pakhat nunnak a liam, kuan kan ngeih ti lo caah hnu kan tolh i, cycle 2 le meithal 2 kan sung,” tiah Naypyidaw PDF 802 nih cathanh an chuah.
Naypyidaw PDF chungtel pakhat cu nai ahkhan SAC ralkap nih an tlaih i rallam sialnak ah an i ratpi tiah PDF chungtel pakhat nih a chim. “Tlaih a tongmi PDF pakhat sin in kan sakhan umnak an theih i, tlaih a tongmi cu hriṭem buin an i ratpi ka hmuh, kahdohnak ah SAC ralkap 6 an thi,” tiah Naypyidaw PDF 802 battalion chungtel pakhat nih a chim.
Ukraine Nih North Korea Phihkharnak A Tuah Ruangah N. Korea Nih A Mawhchiat!: Russia nih Ukraine ram nichuahlei um Donetsk le Luhansk cu Independent ram ah a phuan mi cu North Korea ram nih a cohlan hnu in Ukraine nih N. Korea he ramhnih i pehtlaihnak cu a phih i, North Korea nih Ukraine cu a mawhchiat tiah theih a si.
N. Korea nih Donetsk le Luhansk cu Independent ram ah a cohlan hnu in Ukraine nih July 13 ahkhan ramhnih kar pehtlaihnak cu a rak phih ve. Kan hnu thla ah Russia hawikom a si mi Syria nih Donetsk le Luhansk cu independent ram ah a cohlan hnu in North Korea nih atu bantuk in a cohlan ve.
Hi ramkulh pahnih Independent ram ah kan cohlan mi cung ah Ukraine nih North Korea cung ah phihkharnak tuahnak nawl a ngei lo tiah N. Korea Khualipi Pyongyang ministry of foreign affairs zung chimnak nawlngeitu nih a chim, tiah KCNA nih a ṭial. Russia nih N. Korea sin ah Donetsk le Luhansk cu independent ram ah cohlan piak ding in a nawl tiah Ukraine ramleng minister Dmytro Kuleba nih a chim ve. Donetsk le Luhansk he pehtlaihnak ṭha kan ser lai, tiah N. Korea nih cun a chim chap.
Tamu Ah Khuami Pahnih Kahthah An tong India- Myanmar ramri Tamu ah July 13 le 14 ah khuami 2 cu a ho si theihlo mi hriamtlai phu hna nih meithal in an kah hna tiah tualchung mi hna sin in theih a si. July 13 ah Tamu SawBua 4 veng kam Kala Daw Sat ah kum 40 a si mi U Aung Aung i aruak cu hmuh a si i Tamu bawmchan tu phu nih a ruak cu an fimtual tiah theih a si.
A nupi cu tisik annhnah a zuarmi a si i U AungAung cu zeiruang ah an thah ti zong a thei lo. July 14 zan Sml 12:00 hrawngah Tamu Myomah 13 um U Zaw Khine ( Kum 35 ) cu Phyo Saw Htee hna nih PDF he ai pehtlai tiah an lunghrinh caah a mah a inn cia ah an kahthah tiah theih a si. A ruak cu India ramri PanKaa luhnak tiva kam ah an hlawnh tiah theih a ai. U Zaw Khine cu Ke thum ngei mawtaw mawngmi a si i Saya San, WatRub, Than ZawSin khua ah meihawl chuahnak ah riantuan in paw a cawm mi a si tiah khuami hna nih an chim.
Myaing Ah SAC Ralkap Nih An Tlaihmi PDF Pahnih SAC Ralkap Bawmhnak In An Luat, Magwe ramțhen, Myaing peng ah SAC ralkap tlaih a tongmi tualchung PDF pahnih hna cu SAC ralkap chungtel nih bawmhnak ruangah an luat țhan tiah theih asi. Myaing peng nitlak lei le Pauh peng ramri YeNanHmaw lei ah umhmun a khuarmi SAC ralkap hna nih Myaing peng PDF pahnih cu an tlaih hna.
PDF pahnih hna cu WatPok khua ah an chiah hna i nizan July 14 zan Suimilam 8:00 hrawngah sakhan chung um SAC ralkap pakhat nih an kut țemnak cu a phoih piak hna i a himnak tiang a thlah hna. Tlaih a tongmi PDF 2 cu tluang tein a himnak hmun an phan cang tiah Bu Kyan Tone nih a chim. Luatnak a hmu than tu PDF 2 cu khoika PDF an si kan thei kho rih lo. Hi cathanh kong he pehtlai in We Love Myaing phu sin in pehtlaihnak kan tuah ko nain lehnak a um rih lo .
KyaukKyiSatLay Khuami Pakhat SAC Hrianngan In A Thi, KNU hmunhma, NgiangLayPin pengkomh, KyaukKyi Peng chung kahdohnak ah SAC ralkap Khah- Mah- Yiah – 351, Khah – Lah- Yiah 60 hna nih SatLay khua cu hriamngan in an kah caah khuami pakhat a nunnak a liam i ngakchia pahnih hliam an tuar tiah KNU nih an thanh. Khuachung inn 2 zong a rawk. Nizan July 14 zan ah KyaukKyi khuapi Mala Oo gate le SinmaTaung in SatLay khua cu an kah hi a si.
Hrianngan kahnak ruangah a thi mi cu Saw Si May (kum 40 ) asi i a fale Naw Hti Se Khu( Kum 12) le Thlaruk a si mi Saw Hti Phu Ka Loe an i hliam. Kyauk SaYit khuakomh, TaungPuh khuakam ah SAC ralkap Kah- Mah- Yiah 350, Khah- Mah- Yiah – 603 le National Liberation Army Battalion 5 hna karlak ah kahdohnak a chuak i SAC ralkap lei a thi mi na um ko nain a zat cu fiang in kan thei kho rih lo.
Leave a Reply