Israel- Jerusalem Al Aqsa MOSQUE ah Palestinian le Israel Buainak ah Mi 305 an i hliam
Kan hnu zarh cacawn ninga ni in Al Aqsa Mosque buainak cu a dai kho rih lo. Nihin ah Israel Palek nih Al-Aqsa Mosque kulh chungah Rubber kuan, tear gas le sound bombs hmangin Palestinian pawl an dawi hna, Palestinian lei nih lung in an cheh ve hna.
Israel lei zong nih Jerusalam nichuahlei ah 1976 thawkin kum fatin an rak ngeih tawnmi ‘Jerusalem Ni Thantar Lam Zawhnak’ (Annual Jerusalem Day Flag March) cu an ngeih ve.
Boruak a daih deuh nak ding ah Palek pawl nih Thantar keng in lam a zawh mi Israel Mino pawl cu Al-Aqsa ah kal an khap nain Damaskas kutka lamlei in an kal chih.
Palestinian Red Crescent nih “Al Aqsa Mosque kulh chung buainak ah Palestine mi 305 hma an pu, 228 Siizung an phan, Israel Palek 21 an i hliam” tiah a chim.
Palestinian National Initiative Party hruaitu Barghouti zong nih Israel cu “Minung Covo Nawl a buar mi” tiah a ti. Turkey Presidential Erdagon zong nih Israel cu “Israel Terrorist pawl hmun pi” tiin a chim.
Iran nihcun Israel Palek pawl cawlcangh ning cu “sualnak a si, UN le International Organization pawl nih an rian cu fiangfai tein tuah dingin” a nawl chih.
Sheikh Ikrima Sabri, Al-Aqsa Mosque mi nih Israel Prime Minister- Bejamin Netanyahu cu Al Aqsa kulh buainak hi Prime Minister dirhmun a tlaih khawh nak ding hman a timh tiah a puh.
A tutan Palestine le Israel buainak hi Jesusalem nichuah lei Sheikh Jarrah ah a ummi Juda pawl nih Palestinian pawl cu an umnak in chuah dingin hramhram in an thawl nak ruangah a si.
Kan hnu zarh May ni 7 ni Islam pawl nih Jerusalem Temple Mount ah a thiang mi ‘Ramadan’ thlacamnak an ngeihnak ah Palestinian pawl nih Israel Palek pawl cu Palang, Lung, Kedanh, Phangphang in an tuk cheh hna caah Palek pawl nih Mitthli gas le Khaihriat kuan in an kah ruangah aa thawk mi a si.
Credit: The Chin Post
Leave a Reply