Northern India le Bangladesh ramchung ah kan hnuzarh chung ah fak tuk kn ruahpi a sur caah a tlawmbik minung 18 nunnak a liam pin ah inn tam tuk ti lian nih a khuh i, pehtlaihnak tuah khawh lomi zong an um tiah nawlngeitu nih June 18 an chim.
India ramchung Assam State ah tilian ruangah a tlawmbik minung 9 nunnak a liam i, minung nuai 2 umnak inn cu ti lian nih a khuh dih tiah khua caan tuaktantu agency nih an chim.
Bangladesh ramchung zongah June 17 ah khan tektlak nakin minung 9 nunnak a liam tiah an langhter.
Asia ah tiva nganbik pakhat simi Brahmaputra an khamnak vampangpi cu a rawk/ bauh ruangah Assam State 33 chungah 28 chung ah a ummi khua 3000 le cinthlakmi vialte cu ti lian nih a khuh.
Ti lian ruangah harsatnak a tongtu hna cu khamh dingin India ralkap nih khua caan boruak lei le vawlei kokek lei tawlreltu agency hna cu an ton hna i, eidin tirawl le a dang herhmi vialte cu an bawmh hna.
Kan hnu thla chung ah khan Northeastern State of India le Northern Bangladesh le Northeast lei ah ti lian a chuah ruangah minung umnak inn, lampi le cinthlakmi dangdang an rawk dih.
Khua caan aa thlen ruangah minung million 160 leng umnak Bangladesh ah tilian a chuak, thlichia a hran caah fak tukin harnak an tong.
Khua caan boruak aa thlen ning kong he pehtlaiin UN ah an tuahmi meeting ningin vawleipi a linh ning hi atu ning tein pehzulh in a kal peng ahcun Banglagdesh rammi million 17 tluk cu an umnak hmun an i thial a hau lai tiah an chim. Cred : The Chin Post
Leave a Reply