I Cei Hna Seh; Lawr Ngaiin Khua A Sa Mi SAC Ralhrang Kahdoh An Tong!

Monywa Si-Puai-Zi Sianginn Ah Ralraam A Siam Mi SAC RAlhrang Kahdoh An Tong
==========================================

Tuni July ni 19 zinglei suimilam 1:30 hrawgah MonMywa Si-Pua-Zi sianginn chungah ralram a siam mi SAC ralhrang rual pawl cu nitlak thllang lei phufonh hna nih an kahdoh hna tiah theih a si. ” Tuni July ni 19 ah philh khawh hnga lo ding tiin hriamnam ngan, hriamnam hme in kan va kahdoh hna,

SAC ralhrang leiin minung pa 6 an thi i hliamtuar zong an tam. Kan mah lei in hlaimtuar mi le thi mi um loin him tein kan rak kir kho.” tiah tuanvo ngeitu pakhat nih a chim. Cu kahdohnak ah Tatyin 1, Tatkheou (1), People’s Defence Force – South Monywa, Yatyin (1), Tatkheou (1),

Black Dragon – Special Task Force Tantin (1), Tatkheou (1), Tatsuu (1) Anyar Defence Force (A.D.F), Tatyin (1), Tetkheou (3), God of Monywa People’s Defence Force & Red Eagle People’s Defence Force, Tatyin (1), Tatkheou (4), Monywa Fighter Group & Golden Eagle Force – Monywa, Tatyin (3), Tatkheou (3) Monywa Ranger Group – Truth Army, Tatyin (3), Tatkheou (2), Monywa Red Peacock Tatyin (3), Tatkheou (3), People’s Defence Force – Yar Za Than၊ Tatyin (3), Tatkheou (4), Springs Dove hna nih an va kahdoh hna tiah theih a si.

Yesagyo PDF Nih SAC Ralkap Mawțaw Pakhat Bomb An Puahhnawh, Magwe ramțhen, Yesagyo peng, Thet khua kam ah SAC ralkap mawtaw pakhat kan kah tiah Yesagyo nih an thanh. July 19 zinglei Sml 11:00 hrawngah SinChaung khua in Yezagyo khuapi ah a kal mi SAC ralkap mawtaw pakhat cu Thet khua kam ah bomb lung 3 kan puahhnawh i SAC ralkap 3 an thih pin ah hliamtuar an tam tiah an langhter.

SeikPhyo Peng Kahdohnak Ah SAC Ralkap 19 An Thi,30 Leng Hliam An Tuar, Magwe ramțhen, SeikPhyo peng chungah rallam sial mi SAC ralkap cu tualchung mizapi vengtu ralkap phu hna i bawm in kan kah hna tiah KyaukPanDaung – KDF nih Cathanh an chuah.

KDF, Brigade 712, PPC le Yenaan Chaung PDF hna i bawm in SAC ralkap hna rallam cu July 13 ah bomb in kan doh hna tiah an langhter. SeikPhyo peng, SiaHla khuakomh, Paing khua, WanGyi khua, SiaHla khua hna ah SAC ralkap hna nih rallam 3 in an rak luh caah Paing khua le Wangyi khua hna ah kaphnih kahdohnak chuak tiah an langhter.

WanGyi khua ah mizapi vengtu ralkap phufonh nih hmun 5 ah lamh mi bomb, dawh mi bomb le bomb ngan lung 13 in kan puahhnawh hna i SAC ralkap 19 an thi. Thil sining a ngiatu kan ralkap hna nih an chimnak ah cun SAC ralkap 19 an thi i 30 leng hliam an tuar tiah an thanh. SAC ralkap hna nih cun Sia Hla khua le WanGyi khua nitlaklei ah a um mi ralzaam buk(deu) le a thilri pawl an khangh piak hna tiah an langhter.

Mobye Ah SAC Ralkap Battalion 422 Cu Sniper In Kah An Ton Caah 4 An Thi, Kaya(Karenni) ramkulh, Mobye(မိုးဗွဲ) khua chung Khrihfa Biakinn pakhat ah umhmun khuarmi SAC ralkap pawl cu, July 18 zinglei ah Sniper in kah an tong i, ralkap 4 an thi, tiah theih a si. SAC ralkap Battalion 422 cu Mobye khua chungah hmun hnih in an i ṭhen i, rallam an sial. Nizan July 18 chun sml 12:00 hrawng ah Mobye khuachung lamtonnak ah kahdohnak a chuak. Cu kahdohnak ah PDF le ṭangṭi phu hna i bawm in an kah hna, tiah theih a si.

“Pakhat cu a liang ah hliamhma a pu. Pakhat cu a hngawng ah a khen. Pakhat cu SAC ralkap Sniper a si i, thingkung cung a um lioah kan kah thah. An dihlak thimi hi ralkap 4 an si, tiah PDF nih an chim. SAC ralkap lei in hriamhme he hriamnagn he dinh loin an kah thluahmah hna caah PDF nih an naih ngam hna lo, tiah theih a si.

Rallam hmun hnih ah a sialmi SAC ralkap 60 hrawng cu Mobye PDF ၊ Pekhon PDF ၊ KNDF le URF hna i bawm in an kah hna. A luancia July 14 lio zong ah Hpekhon peng PiNgweKung(ပိန္နဲကုန်း) le MaKheKhan khua ah umhmun khuarmi SAC ralkap an i pehtlaihnak seh le riahcaw an chiahnak hmun cu PDF nih RPG in voihnih an rak kah caah SAC ralkap 11 an rak thi.

Monywa-ChaungOo Lampi Hman Rih Lo Ding In Cathanh An Chuah, Sagaing ramṭhen, Monywa- ChaungOo lampi cu nihin July 19 ni thawk in theihternak cathanh kan chuah hlan tiang a hohmanh nan kal ti lai lo, lam kan kham cang tiah ChaungOo PDF nih cathanh an chuah. Lam kan kham cang tiah thawng kan in thanh cang hna i, chimh a ngai lo i nawl a zul lomi cu nan himnak ca ah ṭuanvo kan in la hna lai lo, tiah an langhter.

Monywa-ChaungOo lampi a zul tawn lengmang mi motor hna, khawndennak an ton lo nakding ca ah nan phaknak hmun cio in nan i dinh chung naklai le atu lio Monywa-ChaungOo lampi a zul cuahmah mi nan chungle an um ahcun theihternak tuah hna u, tiah ChaungOo PDF nih cathanh an chuah.

Maungtaw Ah SAC Ralkap Le Palik Bawi Telh In Palik 14 Cu AA Nih An Tlaih Hna Rakhine ramkulh, Maungdaw peng ah SAC ralkap le palik a thimi le palik bawi telh in AA nih an tlaihnak hna muicawl cu nihin July 19 ah AA nih an langhter. Cu muicawl ah palik 4 hrawng cu motor chungah an ruak hmuh khawh a si. Palik 14 cu hriamnam an chiah.

Rakhine ramkulh, Maungtdaw peng ah SAC ralkap le AA kahdohnak ah palik bawi 1 cu hriamnam a chiah i, palik 14 zong AA nih an tlaih hna. Meithal zun 26 le zen-kuan tam ngai zong an chuh hna, tiah Arakan Princess Media nih a langhter. “Hiti kan kahnak hna a ruang hi Karen ramkulh um AA camp cu, SAC ralkap nih bomb an rak thlak caah teirul kan chammi hna a si,” tiah AA chimphuannak nawlngeitu Khine Tu Khah nih a chim.

Nizan July 18 zing sml 9:00 hrawng ah Rakhine ramkulh, Maungtaw peng Sawng Pangia(ဆောင် ပညာ) le SanKaaPinYin(စံကားပင်ရင်း) karah voikhat, zing sml 10:30 hrawng ah DonKaLar le WatCing(ဒုံးကုလားရွာနှင့် ဝက်ကျိန်း) khua karah voikhat cu SAC ralkap le ramri hngak hriamtlai i bawm in AA he kahdohnak a chuak, tiah theih a si. Cu kahdohnak ah palik bawi telh in palik 14 cu hriamnam an chiah. Pistol zun 2, meithal zun 24 le zen-kuan tam ngai AA nih an chuh hna, tiah theih a si.

Be the first to comment

Leave a Reply

Your email address will not be published.


*