Meghalaya hriamtlaibu pakhat Hynniewtrep National Liberation Council (HNLC) hruaitu hlun Chesterfield Thangkhiew (kum 56) cu nizan August 13 zing ah a umnak Mawlai-Kynton Massar, Shillong ah meithal in kah a si.
Thangkhiew hi tuzarh cacawn nihnih ni ah Shillong khuapi ah bomb puak mi kong he pehtlaih in East Jaintia Hills palek le East Khasi Hills palek fonh mi joint team nih an umnak inn an luhhnawh i an i kahn hnuah kah a si.
August 10 ah HNLC hriamtlaibu hna nih Shillong i IED bomb an puah mi ah minung 2 hliam an si. July thla zongah HNLC hna nih east Jaintia hills district headquarters i palek reserve barrack ah bomb an rak puah cang.
Palek joint team hna nih Thangkhiew inn an phanh ah nam in an rak doh colh i, cu ruangah meithal in an i kap colh ve i, sii inn panh pi lio ah a thi.Palek nih a inn in 9MM pistol pakhat, nam, laptop le mobile phone zeimaw zat an tlaih.
HNLC general secretary Thangkhiew hi Meghalaya state chung hriamtlai hruaitu tihnung bik mi pakhat a si i, HNLC a dirhtu chungtel pakhat zong a si.
Kum 1987 ah Hynniewtrep Achik Liberation Council (HALC) ah a lut i, general secretary rian zong a tlai mi a si. HALC hrawh a si hnu 1997 ah HNLC hi dirh than a si i, general secretary a si.
Kum 2004 in Bangladesh ah a um hnuah 2018 october thla ah Meghalaya deputy chief minister Prestone Tysong sin ah a pe mi a si.
The Chin Post
Leave a Reply