Sagaing Ramthen ah PDF phu 10 i bawm in SAC ralkap 70 renglo an thah hna Sagaing Ramthen ah PDF phu 10 an i bawm i October 9 le 10 (ni 2 chung) ah SAC ralkap an kah hna i 70 renglo an thi, tiah UDLA nih an thanh. Aa fon/bawm mi PDF hna cu; ChaungU-PDF, Monywa-PDF, Myaing-CDSOM le MPDF, Mingyan-27 RF/TPDF, Minmoe, Yesagyo-PDF, Sagaing (SGG) hna an si. Hi kahdohnak hi voi 5 tiang a cang i PDF phu lei in aa hliam mi an um lo. SAC ralkap lei 70 renglo an thi i aa hliam mi an tam, tiah UDLA nih an thanh.
CDF – Thantlang le kan unau Mara pa a thi mi kong ah ka ruah ning: CDF – Thantlang hi Chinram chung ah Mindat dah ti lo cu ral a tu bik an si. Mit ku cim lo in an um. Thil hmanh thlen awk ngei loin hmaisem le kik lak ramtang ah khua an sa. Paw khim loin caan tampi an um. An harnak hi chim cawk ding a si lo. Miphun an dawt tuk ca ah khin fapa fangkhat le fa nu fangkhat te lawng an si ko bu hmanh ah chungkhar zoh loin ralhrang do ah an i thawh ko.
An palhnak a tam pi ko lai. Ral he an i kah tikah an mahnak in hriamnam a tha deuh mi he an i kap. Cu tikah, tihphannak in an khat dih. A cheu cu PTSD (Post-Traumatic Stress Disorder) tiang an ngah cang. Zaan hmanh ah hngilh kho loin a lau peng mi an um cang ti kan theih. Ralkap bomb thawng le meithal thawng tang i khua an sak caah a si. Mah bu he riantuan cu an fawi hrim lo. Vawilei pi nih zoh mi an si.
An thil tuah mi 100 lak ah pakhat te a chiatnak lak riangmang i mitha lo bantuk dadeng in CDF – Thantlang phu pi hmuh i timh hi tlamtlin lo ngai ngai pakhat a si. CDF – Mara, CDF -Thantlang le Chinram CDF phu vialte kan HEROES le HEROINE taktak an si dih. Kan unau Mara pa a thih mi kong ah tuanvo an lak i an kherhlai cuahmah ti thawng kan theih. Kan i lawm tuk. Palh sualnak a um mi zong raltha tein kan palh ko tiah an kan ti piak ko lai ka zumh.
Aruang – vawilei cungah ral tei lawng khi pa raltha ah ruah le hmuh an si lo. Ram hruaitu le uktu hna nih palhnak an tuah tikah “Kan palh ko” an ti mi biafang tawi te nih khin miphun a dam ter tu bik an rak si tawn. Cun, mi raltha taktak an si tiah vawilei pi nih auh thai an si beh. CDF – Thantlang cu kan mi raltha nan si. Nan hlethlainak a dih tik zongah raltha tein kan dir piak ko uh. Chin miphun chungah mi raltha taktak hi kutcang rel khim hmanh an si lo kho.
Ni hin ni tiang kan miphun upa tam pi hna nih an palhnak kha an thuh peng. Ral tha tein an chim ngam lo. Cu vialte cu CDF – Thantlang nih cun kal tak in ralhrang mithat lainawn ralkap hmanh a do ngamtu kan pa raltha le nu raltha nan sinak kha nan langhter lai ding cu 100% zumhnak ka ngei. Mara communities lei kam zong nih CDF – Thantlang nih Mara miphun cungah zomhteih le thlanglamhnak an ngei caah an thah ti mi lungput le ruahnak hi nan ngei lo ding mi a biapi tuk.
Mara pa a si caah an thah mi a si hrimhrim lo. Mara a si caah an thah tiin ruahnak nan i lak palh sual lo ding zong kan in nawl duh ko hna. Revolution caan lio ahcun miphun tampi nih an ton ko. Kachin siseh- Karen siseh an ton ve ko. A cang sual theo mi a si ko. Statement nan chuah hlan ah CDF – Thantlang lei upa hna he zong chonh biaruahnak tuah kho ta uh law a tha tuk ko hnga.
Online in nan statement chuah mi tete kan rel ah a rel a nuam lo tuk. Statement chuah i warning pek hi miphun pakhat dirhmun sinak caah a tha hrim lo mi a si. Kan Chinram kan damlonak bik hi zei kan ton paoh ah peng le tlang rumro in kan i kawih chih tawn caah a si. Ramleng a phan cang – mifim nih pen cang mi le uk cuahmah mi ram hna ah
A phan cang mi le communities hmanh a dirh ve cang mi nih hin cu zohchun awktlak deuh in statement hi kan chuak piak uh law miphun a puitling taktak mi lungthin a ngei mi sinak khi langhter kho uh law – kan Chin miphun zawtnak zong a dam chinter kho tu si hram uh law zei tluk in dek kan i nuamh cio le kan in upat cio hna ning a si hnga mu.
Miphun ah unau kan si. Aho forhnak le fialnak thawng hmanh in unau kan sinak kha i hnursuang hlah seh! Nan ngeihchiahnak ah kan ngei chia ve. Kan i tuar pi hna. Kan lung a nuam hrim ve lo. Miphun hmete kan si hi pakhat cio i philh bak hna hlah uh sih.
Leave a Reply