Ramkhel in hnu lei kir than a si ah cun, Kap khat lei lawng chim a ngah lo i Tatmadaw telin hriamtlai phu zaapi in ramkhel in hnu kir a herh nak kong cu ramlkhel hlethlaitu U Ye Htun nih CNI ah a chim. U Ye Htun nih,” Ka hmuh ning ah cun mi cheukhat nih an chim mi ralkap cu ramkhel in an chuah a hau, ramkhel ah an i tel lai lo timi kong ah Hriamtlai ralkap zaapi sinah chim an si cun a dik mi a si ko.
Hmai lei caan ah kan mah nih Federal hramhunh upadi cu ceihhmai in zaapi nih kan zulh lai, zaapi nih hi bantukin tlamtling seh ti duh a si ah cun ralkap zaapi zong hraimtlai ralkap pakhat a si mi, hriamtlai Pyidaungsuu Tatmadaw an si lai cu. Cu bantuk in Pyi Daung Su Tatmadaw an si ah cun hraimtlai pawl cu an zaapi in ramkhel in a chuak ko lai. Tlangcung mi hraimtlai si hna seh, PDF si hna seh, SAC ralhrang si hna seh, an zaapi in ramkhel in an chuah a hau” tiah a chim.
KNU i kuttang riantuan a si mi KNDO, KNLA hna cu ramkhel ah pehtlainak an ngeih lonak kong cu Near Pado Saw Tawni nih a chim. Pado Saw Tawni nih, ” Ramkhel hrauinak phu dir a rak si kaa te ah, kan vawlei kan hmunhma a um tikah kan mah i kan ram uknak riantuannak tein rian kan tuan. Mah bantuk in uknak hruainak cu kan zuung lei in a tu ah kan zung phun (4) chungah, mah zung phun (4) chungah cun ruunvennak zung timi hi aa tel.
Mah runvennak zung kuttang ah KNLA le KNDO timi an um. KNLA le KNDO cu ramklhel ah an i thlak nak an i pehtlainak a ruang pakhat hmanh a um lo. An tuah hnga ding an tuah, an tuan hnga ding rian an tuan ko. KNU nih ramkhel policy a tuah mi cungah KNLA le KNDO nih an takin congah mi hmuh khawh nak hnga ding caah rian an tuan, an nih cu ralkap an si.
Ralkap nih cun kan mah nih Ramkhel hrauinak phu i hmathlaknak policy kan tuah mi ah tlamtlingter khawh dingin rian an tuan. An nih cun ramkhel ah an itelnak pakhat hmanh a um lo. Hi hi a tuah kan mah nih a takin kan hman mi cu a si tiah.” Thet Htwe Naing nih biahalnak a tuah mi ah a chim.
Myanmar ram pumpi in May 24 nikhat chung kahdohnak ah SAC ralkap 77 an thi i, PDF 2 an nunnak a liam ve tiah Khit Thit Media nih a langhter. Khit Thit Media nih cazin a khawmhsuat ning ah SAC ralkap a thi mi hna cu , Magwe ramtthen, Pakokku ah 13, Mon ramkulh Ting Zyat 1 , Karen ramkulh Demohso ah 3, Baw- La – Khe ah 10 , Sagaing ramtthen Chaung Oo ah 6, Kani ah 1, Myaing ah 4, Watlat ah 1, Tanhse ah 13, Mandalay ramtthen Wai Twin ah 5 , Kachin ramkulh , Puta Oo ah 20 tiin an dihlak 77 an thi i Karen ramkulh Baw – La – Khe le Magwe ramthen, Myaing ah PDF 2 an nunnak liam ve.
AAPP nih May 24, tiang cathanh a chuah ning ah Myanmar ram SAC ralkap nih nawlngeihnak a lak ni 478 chung ah sualnak ngei lo minung 1861 thah an si cang, tiah theih a si. Tlaihkhih a tongmi dihlak hi 13,822 an si i, tlaih ding in nawlchuah a tong mi 1979 an si. SAC ralkap nih mi nunnak a lak mi hna chung ah Yagon in nunnak a liam mi tambik an si.
Sagaing ramṭhen, Chaung U peng Kinmuntaw(ကင်းမွန်းတော်) khua ah SAC ralkap le Pyusawthi 50 hrawng cu, Maytekyukun(မယ်သဲကြိုးကွင်း) lei ah an kal i, mizapi umnak inn an hrawh, thil an fir caah bomb voi 10 PDF nih an puahhnawh hna caah 36 an thi, thiah theih a si. SAC ralkap le Pyusawthi 50 hrawng cu, Chaung U khua in thlanglei lam ṭhen in nitlaklei ah riahcaw he an kal. Cu lioah Chaung U PDF le CMWA phu nih bomb voi li an puahhnawh hna caah SAC ralkap 9 an thi, tiah theih a si.
A thimi ruak cu motor in an kalpi hna i, a taangmi cu Maytekyukun khua ummi Pyusawthi he an va i fonh i, PDF nih bomb an puahhnawh ṭhan hna caah SAC ralkap 24 an thi ṭhan. A taangmi SAC ralkap le Pyusawthi 15 cu thil an firmi he Kinmuntaw khua lei ah an kir. Maytekyukun in Kinmuntaw khua lei ah a kirmi cu Chuang U PDF nih bomb kan puahhnawh ṭhan hna caah SAC ralkap 3 an thi ṭhan, an dihlak a thimi hi 36 an si, tiah Chaung U PDF nih cathanh an chuah.
Sagaing ramṭhen, Myinmu peng ah May 24 zinglei sml 4:30 hrawng ah Innma khua ah rallam a sialmi SAC ralkap pawl cu, Kanhpyia(ကန်ဖျား) khua ah bomb kan puahhnawh hna caah motor pakhat a rawk, tiah Myinmu PDF cathanh an chuah. May 24 zinglei sml 11:00 hrawng ah SAC ralkap pawl cu, Black Eagle Defense Force- MIMU le PEOPLE Guerillas Commando – Myinmu nih an kah ṭhan hna i, SAC ralkap 2 an thi. Minutes 15 hrawng a rauh ah bomb kan phummi kan puah ṭhan caah SAC ralkap 9 sii-inn an phan. Nihin May 25 ah a thimi an um kan theih, tiah Myinmu PDF nih an langhter.
May 24 zanlei sml 3:00 hrawng ah rallam a sialmi SAC ralkap pawl cu, motor kam in ke in an kal lioah bomb in kan puahhnawh hna i, 6 an i teng colh, hliamhma fak ngai an pu, tiah Myinmu PDF nih an langhter. May 24 ah Innma khua lei rallam a sialmi SAC ralkap le PDF kahdohnak ah PDF ralkap 2 an nunnak liam ve.
Leave a Reply