Hriam ngan he meithal he kahdohnak thawng theih thluahmah a si

Kan kap hlah u, tiah loudspeaker in an au nain an kah thiam hna October 15| Mindat le Matupi kar lam rawk mi remh ah a kal mi SAC ralkap cu nihin 12:00 PM hrawng ah an kah thiamthiam hna, tiah kan theih. An kah hna nak hi Lemro tiva pawng ah a si i nizaan October 14 khan Matupi in Mindat lei ah kal aa thawh mi an si, tiah khuami nih an chim. Hi kong ah SAC ralkap pawl nih October 12 zaan ah,

“Matupi le Mindat kar lam a cim mi kan remh lai. Lamsuul umkalnak tha seh tiin remh kan i tim. Cucaah, nan kan kah lo ahcun kan in kap ve hna lai lo i khuate pawl zong ah khuami harnak kan pe hna lai lo. Kan kap hlah ulaw,” tiah loudspeaker in an au tiah Matupi khuami nih an chim. Atu hi Lemro tiva pawng Chanpian khuathar hrawng ah hriam ngan he meithal he a thawng theih thluahmah a si, tiah kan theih.

TCP Hakha – 2021 Oct. 15| Rampihuap Kahdaih Hnatlaknak (NCA) minthut kum 6 tlin lawmhnak ah Kawl ralkap uktu (SAC) nih Tlangcung hriamtlai phu he a pehtlai in a cazacuai mi 114 an thlah hna, nain CNF he a pehtlaimi pakhat hmanh an i tel lo. Nihin October 15 ah Ralkap nih ramtlai phu AA he pehtlai mi 61, KIA pehtlai in 23,

KNU/KNLA (PC) he pehtlai in 1, MNDAA in 1, RCSS/SSA pehtlai in 12, SSPP/SSA pehtlai in 5 le TNLA in 11 an thlah hna. Asinain, Ralkap nih nawlngeihnak hramhram in lak hnu February 1 hnu ah an tlaih mi CNF he a pehtlai mi chung in pakhat hmanh an i tel lo. “Atu bantukin Ralkap nih NCA minthu he thulo mi he an i pehtlai tiah rak puh in tlaihmi an thlahmi cu hriamtlai phu karlak ah thencheunak a tuah duh caah a si.

Mirang nih fawite in uk khawhnak ding ahcun, “Divide and Rule”, thencheu in uk timi phung kha an hman mi a si ko. Atu ah, Ralkap he a kap cuahmah mi CNF/A he pehtlai in riantuanmi phu CCPR in Peter Thiam Bawm Sang, Duh Hu Thang le Van Ceu Thawng cu an thlah fawn hna lo” tiah Ramkhel lei ngeithlaitu nih a chim.

Ralkap nih uknak a lak hnu in CNF he cozah he remdaihnak caah tiah a dirh mi Chin Center for Peace and Reconcilation (CCPR) zung cu March 9 ah an luhhnawh hna i riantuan an rak tlaih hna pin ah thilri an lakpiak hna. August le September ah a cangmi covo buarnak he pehtlai in CHRO nih report a chuah ning ah, thlah hnih chung ah 102 tluk tlaih kan tong, cuchung ah 16 hi nu an si. Cun, Feb. 1 thawk in Ralkap nih rak tlaihmi hi Chin miphun chung in 612 tluk a si.