Hmailei ah ralhrang cawlcanghnak a tuah kho ti lo ding mi tiah Israel nih Hamas JIHAD hruaitu pawl hmanthlak a tar

Hmailei ah ralhrang cawlcanghnak a tuah kho ti lo ding mi tiah Israel nih Hamas JIHAD hruaitu pawl hmanthlak a tar

15.5.2021

Israel dohnak ah tuanvo ngei tu Israel nih an thah mi hna hmanthlak cu “Hamas, Islamic JIHAD hruaitu hna le ralhrang hna an si” timi ca tial he Israel ralvengtu hna nih nihin ah an chuah.

A luancia mi suimilam 72 chungah missile he Israel an kah nak ah tuanvo ngei tu pawl an si, tu hnuah zeitik hmanhah ralhrang cawlcanghnak an tuah kho ti lai lo tiah an tial chih.

Hamas le JIHAD pawl nih Israel cu Missile he voi thongkhat renglo an kah nain tam deuh cu Israel missile vengtu nih a hrawh piak khawh hna.

Missile 200 reng lo cu tinhnak hmun phan lo in Gaza ah a tla i thil aa hrawh mi zong a um ve tiah Israel nih a chim.

Raldohnak lei mithiam pawl nih Hamas nih a kah mi missile pakhat man hi US Dollar 100 man hrawng lawng a si, Israel nih Missile Defence a hman mi hi Dollar Thonghra tiang an dih lai tiah a chim. Israel nih a hman mi hi Iron Dome Defence system a si i Hamas nih cun tampi kah i missile defence system buai ter dingah an timh mi a si tiah a chim.

A tu tiang fehter cang mi ah Israel nih Hamas ralbawi pakhat le thawnghlattu bawi pahnih an thah hna: Tinh mi dang kan tuah lio a si tiah Israel nih a chim. Hamas zong nih Irael kah cu kan ngol lai lo tiah a thanh ve i kaphnih i dohnak a fak chinchin i a thi mi an tam chin lengmang tiah theih a si.

The Chin Post