Hakha Le Thantlang Karlak Timit Hlei Kong!!

HAKHA – THANTLANG KAR TIMIT HLEI PHELH THAN A SI
==========
Lawngtlai, 29 Chiapa 2022 : Hakha – Thantlang i hlatnak lampi hlei, Hakha phanh lai Timit hlei cu a luancia 22 Tho 2021 ah mizapi ralkap nih an rak phelh bal cang, 30 Pur 2022 ah Kalay in Laitlang lei ah ralhrang motor 27 le ralhrang 200 hrawng nih Hakha – Thantlang Timit hlei cu remh dingin an rak pawk i, Kalay – Falam kar ah CNDF nih an kah hna, cun Falam – Hakha kar ah mizapi ralkap fonh hna nih an kah than hna i 16 Chiapa 2022 ah ralhrang cu Hakha khua an lut, mizapi ralkap nih Chiapa thlachung ah timit hlei cu tangah tlak lak lawlaw in an phelh than.

Falam – Hakha kar kahdohnak ah ralhrang 60 hrawng an thi, hliamtuarmi zong an tam, ralhrang nih Thlanrawn khua, Țaal khua, Tlangzar khua, Ramthlo khua, Dokțhek khua, Chuncung khua an hrawh, mei in an kangh. Hi kahdohnak ah mizapi ralkap fonh in minung 2 miphun le ram caah an nunnak a liam.

30 Pur 2022 ah ralhrang rianhkhinhmi Lai ramkulh Chief Minister Pu Ngun San Aung sawmnak in Thantlang khuanu khuapa le Biaknaklei hruaitu Pastor hna nih Thantlang khua serthannak le ralzaam hna kirthannak kong an caih. Lai miphun mizapi nih soisel zong an tong ngaingai, tonpumnak ah aa telmi hna nih cun “30 Pur 2022 ah Thantlang Pastors le khua upa nih Ralkap Cozah cu “Thantlang kirthannak le sersiam thannak kong ah an va ton hna timi biafang hi a dik lo mi a si.

An mah cozah hi Thantlang kirthannak kong le sersiam thannak kong ah bia kanruah bal hna lo. A tutan hi anmah Cozah lei nih Thantlang kirthannak le sersiam thannak ding kong ah anmah lei nih an i timhtuah mi tu kha an kan theihter a si tiin kan ruah tiah Hakha Um Thantlang Upa le Pastors nih fianternak an tuah ve.

A ngaingai ti ahcun Kawl ralhrang nih cun Thantlang ah an milu chapnak ding le an eidin chapnak ding caah cun motor lam in cun an ngamh lo hlei ah kalnak lam zong a tluang fawn ti lo, cunglei Helicopter dah lo cun zeihmanh aa pechan kho ding dirhmun an phan lo. Anmah huahruang kulh in duh paoh in khuachung cu hriamngan in an kah caah Thantlang khua inn thong leng zong a ciam cang. Hi Hakha – Thantlang kar Timit hlei an chahmi nih ralhrang caah cun ralsungh pakhat bantuk a si ve, an duh ning in an i bawmchan kho ti lo. Credit: The Lairam Times

Ralhrang nih Timit hlei remh an timh mi a ruang tiah ka ruahmi! 1. Thantlang khuachung ummi ralhrang pawl an kuanzen le tirawl a dih cang caah bawmhchan lo cun fimhlom zau an tong lai ti an phan caah. 2. Thantlang khi fimhlom le lak asi ahcun kan ram pumpi ah peng pumpi in aluat hmasat mi asi lai tikah ralhrang zangdernak le mipi tha ţhawn tertu asi lai ti an ţihtuk.

3. Tukum chungah(mipi thinlung a ţhawnbik can lio) ralhrang hi an hmunkhuar in kan ţhawldawi khawh hnalo ahcun pau a chuah in thazang lak i Thantlang peng khi cul an timh. Cu an timhtuahnak i a hrampi le a muru cu Thantlang asi. Cucahcun tutan hitluh furpi le ralsung bu le mipi ralkap nih congh/hngah ko buah Timit hlei remh an timh hicun an caah “No choice” asi caah asi khomen. Hilio teah cawl kholo in kan tuahhna ahcun kan tei taktak hna khi asi lai. Credit: Peng Hlawnceu

Timit hlei anremh cun Tița hlei anremh rih lai. Thantlang peng cu, Athar in khua mui țhan lai. Victoria camp zong ahim ti lai lo. Cu tikah, ralhrang penmi kan si țhan lai ti nak si. Lam le sul a that ahcun khuate lei khuasak tintuknak ah an sia a rem deuh lai. Hlei men nih ralkap a kham hna lai ti cu a si deuh rua lai lo, tiah a chimmi an um ve hoi.

Atu Furpi ah Chinram ah ralkap an pumh tluahmah. Khuasik a tlak bak in khuate hmun kip ah ralkap thazaang tam taktak in an kal hnawh thluahmah cang hna lai. Mah cu an i timhmi a si. Fur ah offensive an tuah lonak aruang cu Laitlang nikhua a chiat caah Air Support an pe kho lo. Khuasik ah cun an den tluahmah hna lai. Kanmah lei ralkap tu nih Furpi hi caan ttha ah rak i lak awk a si nain. A caan a luan thluahmah cang.

Chandeih le Cakei hna cu thau deuhhna seh law tthawng deuhhna seh tiah an zuat korua hna khah. Zoh sawh khan zoh peng an si ko rua. Ralrin ding le i thanh cio ding! Zahan July 27, 2022 ni zaan in တိုင်ရင်ဆေး Siizung ah a ummi BoBo le GTI pawng i a ummi Bobo pawl hi July 28, 2022 ni zaan 9:30 tiang an um kalnak theih a si lo. Thawngtheih kan theih ning cu TMit ah kan kal cang lai thla kan campiak uh timi bia an chim tak.

khoi an kal lai theih a si lo caah Timi lei ngai le Thantlang peng lei ah khualtlawng rih hlah ulaw a tha. Thlacampiak ko hna uh Bobo pawl hi. Bawipatu nih kan ralkap kut ah a chiah dih hna nak hnga, kan himnak. Kan teinak cu a nungmi Pathian lawng a si.

Aung San Generation Monywa nih cun a herh ning in cawlcanghnak kan tuah peng lai, tiah an cathanh ah cun an langhter. Aung San Generation Monywa le tualchung hriamtlai phufonh hna nihhin July 27, zaan suimilam 8:30 hrawng zong ahkhan Butalin(ဘုတလင်) palik sakhan cu kutser bomb an chehhnawh hna i, SAC ralkap 8 hliam an tuar, tiah theih a si.

ThanLyin Khuapi Navy Headquarters In SAC Ralkap Ralbawi Pakhat BawLa Khe PDF Sin Ah CDM A Tuah , Yangon ramțhen, ThanLyin ( သန်လျင်) khuapi Navy Headquarters in SAC ralbawi pakhat cu kan sin ah CDM a tuah tiah BPDF nih nihin July 29 ah cathanh an chuah. ” Job For Kayah” in a rak kan pehtlaih i a rak ra mi a si. Atu ah cun a himnak hmun ah kan kuat cang tiah an langhter.

Yee Khuachung Palik Sakhan An Kah, Palik Pali An Thi, Mon ramkulh, Yee( ရေး) khuapi laifang ah a ummi palik sakhan cu hriamngan, hriamhme hna in kan kah i kan luhhnawh hna tiah Yee Monsters Phu hruaitu sin in theih a si. July 28 zing Dalan kan fimtawl dih hnu kan țin pah zanlei Suimilam 2:30 ah kan kah pah mi a si tiah Monsters phu hruaitu nih a chim.

” Kanmah lei nih ruahlo piin kan kah hmasa hna, anmah lei nih cun an kan kap ve lo i him tein hnu kan tolh kho ” tiah a chim chap. 40 mm le hriamhme hna hmang in kan kah hna caah 4 an thi i 5 hrawng hliam an tuar tiah a chim. A Luancia July 19 zongah SAC ralkap gate pakhat cu kan rak kah i 2 an thi tiah a chim chap.

Pakokko Peng Khuate Pakhat Ah Umhmun Khuarmi SAC Ralkap Kah An Ton Caah 5 Nak Tlawm Lo An Thi Magway ramṭhen, Pakokko peng Ashibungkan(အရှေ့ဘုန်းကန်) khua ah umhmun khuarmi SAC ralkap pawl cu, PDF nih July 28 zanlei sml 5:00 hrawng ah kan kah hna i, ralkap 5 nak tlawm lo an thi, tiah Earthquake People’s Defence Force (UG) sin in theih a si.

SAC ralkap nih umhmun an khuarnak cu Earthquake People’s Defence Force၊ PKU North PDF le Royal Defence Force PKU hna nih an kah hna i, King Cobra People’s Defense Force nih hmunhman humhimnak an lakpiak hna. Cu kahdohnak ah SAC ralkap an i thuhnak(bunker) pakhat le an umnak phungki sianginn an lak khawh. Cun, 60mm lung thum in kah an bawmh hna, Pakokko in bawmtu motor pakhat le Inpin lei in bawmtu ralkap an rak phanh caah hliam tong lo tein PDF cu hnu an kir, tiah theih a si.

Myinmu Peng Ah SAC Ralkap Pawl Drone In Bomb An Thlak Hna I 3 An Thi, 3 Hliam An Tuar. Sagaing ramțhen, Myinmu peng , NgiangPinWin( ညောင်ပင်ဝန်း) palik sakhan hmai ah checking a tuahtu SAC ralkap hna cu nizan July 28 zanlei Sml 4:00 hrawngah Drone in bomb kan thlak hna i 3 an thi 3 hliam an tuar tiah MyinChan pengkomh, Battalion 7 ZERO phu nih cathanh an chuah.

Thantaungkyi Peng Ah SAC Ralkap Motor Cu KNLA Ṭangṭi Phu Nih Bomb An Puah Caah Ralkap 10 Hrawng An Thi, Motor Pahnih Rawk, Karen ramkulh, Thantaungkyi(သံတောင်ကြီး) khua le Palikhi(ပလေခီး) khua karah SAC ralkap motor cu KNLA Brigade 2 nih nizan July 28 zing sml 9:30 hrawng ah bomb an puahhnawh hna caah an motor 2 a rawk. Ralkap 10 nak tlawm lo an thi, tiah theih a si.

Taungngu(တောင်ငူ) in Thataungkyi ah riahcaw a chantu SAC ralkap motor panga cu, KNLA nih bomb in an puah caah ralkap 10 hrawng an thi, 5 hrawng hliamhma an pu. A thimi chungah ralbawi pakhat aa tel. Suimilam cheu chung kan i kap i, a thimi an hriamnam char manh a si lo. Bawmtu an rat caah hnu kan kir tiah KNLA Brigade 2 nih an langhter. Bomb puah an ton hnuah SAC ralkap bawmtu an ra i, pawngkam cu hriamngan in an kah thluahmah tiah KNLA sinin theih a si.

Taze, Intaw Le Kantbalu Kahdohnak Ah SAC Ralkap 23 An Thi, A Nung In Pakhat An Tlaih, Sagaing ramṭhen, Taze peng ah rallam a sialmi SAC ralkap le Kanhtuma(ကံထူးမ) palik camp cu July 27 ah Taze PDF ṭangṭi phu hna nih voithum an kah hna caah SAC ralkap le palik 15 hrawng an thi kho, tiah Taze PDF sinin theih a si.

Taze peng Ye Oo Kone(ရေဦးကုန်း) khua pawng ah rallam a sialmi SAC ralkap pawl cu, July 27 zing sml 10:50 hrawng ah Taze PDF ṭangṭi phu hna nih hriamngan le hriamhme in minutes 10 chung hrawng an kah hna. Ralkap a thimi an tam. PDF ralkap pakhat hriamngan nih a khen caah hliamhma hme a pu, tiah theih a si.

SAC ralkap pawl cu July 27 chun sml 12:00 hrawng ah Chaungsone(ချောင်းဆုံ) khua lei ah an kal i, PDF ṭangṭi phu nih an kah ṭhan hna. Cu pinah Taze peng Kanhtuma palik camp cu July 27 zan sml 10:50 hrawng ah PDF Battalion 6 nih hriamngan in voinga an kah hna i, palik a thimi an tam lai tiah an zumh.

“Nikhat chungah voithum kan i kap. Ralkap pawl cu a thimi an tam caah Kywinlay(ကျွန်းလည်) khua in motor nih a rak don hna. Kanmah lei in ralkap pakhat hliamhma hmete pumi a um ve,” tiah PDF pakhat nih a chim. Taze peng July 27 ah kahdohnak voithum a chuak. Taze PDF, Shwebo Battalion 6,7,8, peng Pah Kah Phah le PDF hna i bawm in an kah hna tiah Taze PDF sinin theih a si.

Cu ṭhiamṭhiam in July 27 zanlei ah Sagaing ramṭhen Intaw peng KTV pakhat ah SAC ralkap pahnih cu KIA le PDF nih an tlaih hna, tiah Indaw Revolution nih a langhter. Intaw peng Mawlu le Naba karlak ummi, KTV ah zu a dingmi ṭatma 88 kuttang Battalion 416 in ralkap Chan Aye le Sergeant Thura Aung cu KIA le PDF nih an kah hna i, Thura Aung cu a thi. Chan Aye cu an tlaih tiah theih a si.

July 28 ah Sagaing ramṭhen, Kantbalu(ကန့်ဘလူ) peng Ongchauklung(အုန်းခြောက်လုံး) khua pawng ah KLPDF B 1, Kawlin peng Pah Kah Phah, Kantbalu pe Pah Kah Phah hna i bawm in zanlei sml 4:30 hrawng ah SAC ralkap cu bomb kan puahhnawh hna caah ralkap 7 an thi, tiah Kawlin Revolution KR nih a langhter.

Be the first to comment

Leave a Reply

Your email address will not be published.


*