Hakha le Thantlang ah Sianginn a Kaimi an Um Lo

Nihin (June 1) in SAC nih Myanmar ramchung sianginn vialte on hram a thawk nain Hakha le Thantlang ah cun sianginn a kaimi siangngakchia an um lo, tiah thawng kan theih.

Hakha BEHS No.1 sianginn cu kutka an on ko nain CDM a tuah lomi sayate lawng an um i siangngakchia a kaimi an um lo.

A dang BEHS. No. 2 le No. 3 cu sianginn kutka an khar hna.

Thanthlang zong ah sianginn a kaimi an um lo tiah Thanthlang khua upa pahnih nih The Chin Journal ah an chim.

Thantlang BEHS No. 2 sianginn sayaci nih, “Sianginn kai ding in a rak apmi zong an um lo. Nihin ah sianginn a rak kaimi zong an um lo. Sayate hi kan zapi ah minung 35 kan si i, CDM ah aa telmi 31 an si,” tiah a chim.

Hakha le Thantlang bantuk in Falam zong ah sianginn a kaimi an um lo, tiah Falam tualchung media pawl nih an langhter.

The Chin Journal