Thlakkhat chung lawng ah SAC ralhrang minung 1,974 raldohnak ah an thih lawng si loin a dang 808 leng nih hliamfak an tuar tiah NUG Cozah nih thanhnak an tuah. October 7, 2021 in November 6, 2021 tiang ramchung raldohnak dirhmun an langhter mi chung in tu bantuk in an chim hi a si. SAC ralhrang dohnak thazaang cu nikhat hnu nikhat in a thawng chin lengmang cang.
Rampi Federal Democracy caah siseh, hramhram ralhrang uknak a dih dongh cikcek nak ding ah ram mipi dihlak raldohnak ah a lam kip in cawlcangh cio a si. Hramhram in rampi uknak a chut tu SAC ralhrang nih sualnak ngei lo mipi tampi a thah hna, a tlaih hna, inn lo tampi an hrawh i mei in an khangh, Ralhrang cawlcanghnak tuksapur cu ram mipi nunnak caah tihnung a si cang caah ram mipi hna zong nih,.
An nunnak venhimnak rights an ngeih bantuk in ralhrang dohnak ah a cawlcangh cio hi asi tiah NUG nih cun a langhter fawn. Cun thlakhat chung raldohnak dirhmun ning in zoh tikah October 7, 2021 in November 6, 2021 tiang ah raldohnak ah ralhrang lei 1974 thah an si i a dang 808 nih hliam an tuar, cu pin ah CDF a tuah mi Police le ralkap milu zong a karh ngai ngai tiah an langhter hi asi.
Mizoram Chief Minister Pu Zoramthanga cu nizan November 9, 2021 ah khan zihnawh eihmuarnak biabuai pahnih kong ah court nih biakhiahnak a tuah i, pakhat ah thiam a coter i, a dang pakhat ah court nih sualphawtnak le thiamcoternak a hmuh lo caah a chuahter. Court nih biakhiahnak a tuah lai ah hin amah Chief Minister Pu Zoramthanga hi court ah aa vai langh.
A biabuai pakhat, Aii puk i a ram ah Cozah thilri, goat proof wire mest le iron post hna cu amah nawlngeihnak in a hman, tiah an puhmi cu Aii puk hrawng i ram ngeitu hna nih, amah Pu Zoramthanga ca lawng si lo in dumram ngeitu vialte nih kan thathnempi i, kan i hrawm ve ko, tiah an chim.
Hi pin ah, hi bantuk thilri hi India Cozah nih dumram ngeimi hna sinah man ngei in le man ngei lo zongin pek khawhnak phungphai a um ruang ah Biaceihtu special judge Pu Vanlalenmawia nih cun Chief Minister Pu Zoramthanga hi thiam a coter. A biabuai pahnihnak, a phaisa ngeihmi, a ngeihchiah le a thlahlawh aa milh lo, tiah an puhnak ah special judge nih cun, a rumnak check-nak ding ah hin kum 2003 in kum 2008 kum donghlei karlak kha a si i,
Hi lio ah hin an tangka hmanning account felfai tein an i cinken ding a si, a ti. A ngeihchiah thilri pasarih lak i panga cu kum 2002 hlan i a ngeihmi an rak si cang. Hi lio i an phaisa cawlcangning hi an hngalh khawh ti lo caah nawlngeitu special judge nih cun, hi biabuai ah hin sawlphawtnak ding le thiamcoternak ding a hmuh lo. Cu caah Chief Minister Pu Zoramthanga cu court nih a chuahter, tiah Mizoram thawngzamhca Vanglaini le a dangdang hna nih an tial.
Leave a Reply