Motor 40 Hrawng le Tank 2 in SAC Ralhrang pawl Falam le Hakha lei ah an Ra Cuahmah – Nizaan ah Taingen he furlong 4 hrawng a hlatnak ah a riakmi SAC ralhrang pawl le nihin zinglei ah Kalay in a rak kai chapmi SAC ralhrang motor 30 hrawng an i fonh i Falam lei ah an rak kai, tiah thawng kan theih.
Tu zaanlei sml. 5:30 hrawng ah khan Falam peng, Vaar phak lai Lumbang khua ah an phan cang. Taingen lei in an ratnak lampi ah bomb kahthlorh in an kah thluahmah caah Zawlnu khua Lo ah a riakmi pa pakhat a kee an hliamhma a pu. Chin ramkulh chung CDF le CNA doh awk ah SAC nih ralkap thazaang tampi a run thlah hna hi a si.
“CNA sakhaan Camp Victoria lak ding motor 52 le ralkap thazaang 700 in Chinram ah an rak kai cuahmah,” tiah Dr. Lian Hmung Sakhong nih Oct. 9 Zoom biaruahnak zong ah a chim. Atu thla ni 15 hrawng in SAC ralhrang nih kahdohnak an thawk lai tiah ruahdamhnak zong a um.
Vawleicung zei bantuk ralram hmanh ah hman lo ding in khammi sivai bomb (Chemical Bomb) pawl zong SAC ralhrang nih an hman khawh tiah an ruah. Falam lei ah a rak kaimi pawl hi atu zaanlei sml. 6:30 tiang ah Falam khua cu an phan rih lo. The Chin Journal
inmarpin PDF Bomb Puahnak Ruangah Ralhrang 30 Hrawng An Thi: Ralhrang phu bomb puahhnawh in doh an ton caah ralhrang minung 30 nak tlawmlo hliamtuar in a thi mi an um lai tiah Yinmapin-PDF nih a chim Sagaing ramthen Yinmapin peng Phoewin pawng ah ralhrang phu hna motor cu Yinmapin khua mipi vengtu phu Yinmapin-PDF nih bomb puahhnawh in an doh hna caah ralhrang phu lei in minung 30 nak tlawmlo hliamnak le a thimi an um lai tiah Yinmapin-PDF phu chungtel pakhat nih a chim.
Sagaing ramthen, Monywa khua lei ah a kal mi cycle 30 hrawng, motor fa mi 3 le motor nganmi 2 tiah a kal mi ralhrang phu hna cu nihin October 11, zinglei suimilam 8:00 luan ah Yinmapin-PDF nih bombpuah in an doh hna “Ralhrang phu lei in minung 30 nak tlawmlo aa hliam mi a thi mi an um. Cu ruangah Monywa nitlak lei in Chindwin lei ah umhmun khuami ralhrang phu hna cu bawmtu ding ah an thlah khawhmen tiah”Yinmapin-PDF phu rianngei pakhat nih a chim.
Bomb sawhsawh lung 3, pehtlai in a puak mi bomb lung 1 in puahhnawh an si hnu ah zinglei suimilam 9:00 leng tiang kaphnihkar kahdohnak pehtlai in a um Kahdohnak a chuahnak hmun lei ah bawmtu a ra mi ralhrang phu hna cu Sagaing ramthen, Pale peng nitlaklei lam in Pale-PDF nih an rak doh than ve hna tiah Yinmapin-PDF in rianngei pakhat nih a chim. Pale pengkulh chung kahdohnak kongah thawng fiang in theih a si rih lo na in Yinmapin-PDF lei in hliamtuar um lo in hnu ah an tolh kho tiah theih a si.
Sagaing ramthen chungah fak in hliamh a tong mi ralhrang phu hna nih helicopter hmang in an mah minung bawmtu thlah in mipi hna cung ah fakdeuh in dohnak a umkho tiah khuami pakhat nih cun a chim. Kahdohnak a dih hnu ah Yinmapin khuachung in raltuknak vanlawng a hel len tiah khuami pakhat nih a chim. Mizzima Pale peng ah PPDF nih bomb voihnih an puah, ralhrang 16 nak tlawmlo an thi: Magway ramthen, Pale peng ah Bu-na-ga hruaimi pale mipi vengtu phu(PPDF) nih ralhrang phu motor cu voihnih tiang bomb in an puahhnawh hna caah ralhrang phu minung 16 nak tlawmlo an thi tiah nizaan October 10, zaanlei ah PPDF nih cathanh an chuah.
“Zinglei ah bomb pahnih an puahhnawh hna, cycle 3 in minung 6 cu an thi hrimhrim. An hnu in a ra mi motor cu a lat, cu motor a lat mi in hliamtuar le a thi mi kong fiang in theih a si rih lo. Chunhnu ah dongtu ding in a ra mi palik motor cu bomb puahhnawh in an kah than hna caah minung 10 leng an thi” tiah PPDF in Bu-na-ga nih a chim. Nizaan zinglei suimilam 9:00 hrawngah Gangaw peng in Pale peng lei ah a kalmi ralhrang phu hna motor cu PPDF battalion 4 in Awng Gyi, Mawngawng Taugh te phu hna nih Pale khua Ko Lawng Pyine lam lei ah bombpuah in an doh hna caah ralhrang phu nih citmi cycle 3 cu bauh dih in a cittu ralhrang minung 6 zong an thi tiah theih a si.
Ralhrang nih citmi cycle hnu lei in a ra mi khualtlawng motor ngan Express cu bomb nih a hliamh ve caah cu motor cu aa lat, motor chungah a ummi ralh phu minung tamnawn cu hliamhma an tuar a thimi an um le umlo cu thawngfiang theih khawh a si rih lo tiah PPDF lei rianngeitu pakhat nih a chim. A voikhatnak bomb puahhnawh an ton ah ralhrang phu lei in minung 6 an thi, a voihnih ak bomb puahhnawh an ton than ah ralhrang phu minung 10 leng an thih caah ralhrang phu lei in a thimi dihlak hi minung 26 nak tlawmlo ansi tiah theih a si.
Myanmar Ram Buai Ruangah Mizoram Ah Heroin(riitsi) Tam Tuk A Lut: Nai hrawng cu Mizoram chung ah riitsi heroin tam lak a lut i, hi riitsi pawl hi Myanmar ram a buai ruangah Myanmar leiin fawi tein a lut, tiah theih a si. Mizoram Excise and Narcotics Department i tuanmi hna nih an chimning ahcun vawidang/kum dang nakin tulio ah hin riitsi phunphun Myanmar leiin a lutmi a tam deuh, tiah an chim. “Myanmar ram ralkap cozah cu a buai tuk caah riitsi kongkau hi an buaipu manh lo in kan theih i, cu caah riitsi zuartu zeimawzat nih caan tha ah an lak ve,” tiah an chim.
Heroin man hi nai hrawng cu a tum ngai i, cuhlan deuh ah khan cun fun khat ah Rs 50000 hna a rak si tawn, nain nai hrawng te khan fun khat ah Rs. 25000 ah a tum, tian an chim fawn. Excise and Narcotics Department hruaitu hna nih cun riitsi zuartu hna nih hin fawi tein tangka an i kuat khawh caah a zuar zong a fawi deuh i, “Myanmar leiin riitsi zuartu hna nih tangka hi an hawi le sinin an rak kuat i, hika lei i an pehtlaihmi hna nih an va lak tawn,” tiah an chim. Ralhrang motor 30 in 40 kar cu Kalay in Lai tlang lei ah a kal:
Kalaymyo in ralhrang motor 30 in 40 kar cu nihin October 11 zinglei suimilam 7:30 hrawngah Lai tlang lei ah a kai tiah khuami hna nih an chim. Cu ralhrang motor chung ah cun facang tun bantuk le thilthuam sawh in palik le ralhrang zong an i tel. October 9 ni zongah Lai tlang lei ah ralhrang motor 15 leng le Tank motor pahnih a kai tiah Zalen nih a tial. By. Anna Pa
Leave a Reply