Breaking Hakha ah meithal puah thawng pehtlai in a thang, Sang kip ah a puak rua tiah ruah a s September 4, 11:00 PM in atu 11:50 PM tiang Hakha hmun tam nawn ah meithal puah thawng pehtlai in a thang, Sang tam nawn ah a puak rua tiah khuami nih an chim. Hi kong ah, “Zungkip fonh (Suhpawng zung) pawng ah a puak a ti mi an um.
Economic Bank pawng ah a ti mi an um. Cozah Zung pawng ah a ti mi an um. Khuathar BOC pawng ah a ti mi an um. Nawi kuang lei ah a ti mi an um i Khuahlun Na-Ta-La lei ah a ti mi an um ca ah khoikazawn set ah a puah hngalh a si lo i Hakha Sang kip ah puah dawh a si ko,” tiah khuami hna nih The Hakha Times ah an chim cio.
“Kannih kan theih ning ahcun Chin Oo Si Sang, Zungkip fonh (Suhpawng zung) le Cozah zungpi hrawng in kan theih. Nain cheukhat nih an theih ning aa dang cio i Sang kip ah a puak kho men,” tiah khuami pakhat nih a chim ve. Meithal aw hi a tlawm bik zuun 50 in 100 kar a si lai. Pehtlai in a thang nain khoika Sang pawl set ah dah a puah, zeiruang ah ti a fiang kho rih lo. The Hakha Times
Tlanglawng cung palek thah an tonmi kong ah minung 5 tlaih an si cang tiah ralhrang phu nih cathanh an chuah Yangon-Insein khua helnak tlanglawng cung ah palek minung 4 thah an tonnak kong he pehtlai in,ingtu minung 5 cu September 3 ah tlaih an si cang tiah ralhrang phu lei nih nihin September 4 ah thawng an zamh.
Palek minung 4 cu thah an ton leng ah, an hriam thilri zong lakpiak an si hi August 14 ni ah a cang mi thil a si. September 3, zinglei suimilam 5:00 ah Ko Min San Awng, Ko Kyaw Win Soe le Ko Kawng Pyih Sone hna cu Tamuai peng Myattangunt(ေမတၱာညြန႔္) sang inndal pakhat chung ah meithal kuan hna he pehtlai mi thilri he tlaih an si tiah cathanh ahcun an langhter.
Cu hnu ah zinglei suimilam 7:00 ah Theinkangyun(သဃၤန္းကၽြန္း) peng Yangontit in, inn pakhat ah Ma Myat Phyu Pwint le Ko Zay Yar Phyu cu palek sinin an lak mi meithal pali he tlaih an si.Cu thil kong he a pehtlai mi poh kan tlaih hna lai tiah ralhrang phu cathanh ah an langhter. BBC – The Chin post
Leave a Reply