Guys From Chin Nih Mizoram Ah Ummi Ralzaam Hmun Cheukhat Ah Bawnhnak An Pek Ṭhan!

Guys From Chin Nih Mizoram Ah Ummi Ralzaam Hmun Cheukhat Ah Bawnhnak An Pek Ṭhan!: India, Mizoram chung ralzaam camp cheukhat ah Guys From Chin le Myanmar mino hna nih ralzaam hna sin ah bawmhnak an pek i, forhfialnak le thazaang peknak zong an ngeih, tiah theih a si.

“Ralzaam camp hmun 4 ah kan kal i, Hlasak thiam hna nih hla an sakpiak hna. Cun, phaisa le eidin tirawl pinah lentecelhnak thilri zong kan pek hna. Ralzaam hna nih hin harnak tampi an tong,” tiah khualtlawnnak ah a tel ve mi pakhat nih a chim.

Guys From Chin in P. Thawng Bawi, David Lai le Banjamin Sum nih ralzaam camp 4 caah Rupee 100,000 le eidin dangdang pawl an pek hna lengah camp pakhat ah chinlung(ခြင်းလုံး) 2 cio le chinlung net(ပိုက်) 1 cio an phawtzamh hna tiah theih a si.

”Bawmhnak lawng kan zoh i, Mibawmchantu kan herh hringhran ko hna. Rian ṭuan awk zong a har caah phaisa zong a har. Atu bantuk in Guys From Chin nih an kan bawmh caah lunglawmhnak tampi kan ngei. Hinak tampi in mi bawm khotu si hram ko hna seh tiah thla kan campiak hna,” tiah Dapchhuah ralzaam camp in um mi Kee Maung nih Mizzzima ah a chim.

Bawmhnak an peknak hmun hi hmun 4 ah a si i Dapchhuah, Mamit District; Nghhalchawm; Aizawl District, Sihhmui; Aizawl District le Sairang; Aizawl District hna ah an si i, cu camp 4 ah cun minung 300 fai an um, tiah theih a si.

Ralzaam camp pawng hrawng ah hin khua hme tete lawng a um caah rian ṭuan awk a har ngai i, cawmtu ngei lo chungkhar cheukhat hna cu rian ṭuan kho lo in an um i, an harsa ngaingai. Khua chel ah cozah nih bawmhnak a pek mi tete lawng a si caah an i zat lo ruang ah Khrihfa bu, zatlang bu le mibawmchantu hna lawng bochan ding an ngei, tiah theih a si. Camp i a ummi ngakchia cheukhat cu khuachung ah sianginn ah an ngei ko nain chungkhar harsatnak ruangah cheukhat cu sianginn kai kho loin an um.

Mizoram chung ah Myanmar mi ralzaam 40,000 leng an um cang i, cu hna cu Mizoram cozah, Khrihfa bu, zatlang bu le pumpak mibawmchantu hna nih an bawmh hna. Ralzaam hna cu an har ngai ko nain atu tiang ah India central cozah nih a cohlang rih hna lo i, bawmhnak zong a pe rih hna lo, tiah theih a si. Cred : The Chin Post