RALZAAM KAN KIRTER HNA LAI LO PU H.RAMMAWI
==========================
West Lairam, Lawngtlai, 14 Zing 2022 : Tuzanlei suimilam 5:00pm ah External Affairs Ministry , Govt of India Jt.Secretary Smita Pant cu Pu H.Rammawi, Vice Chairman, Mizoram State Planning Board nih a ton i, tulio Mizoram ramchung ah Kawl le Lai ralzaam ummi hna hi an ram ah kir in an security le an resettlement programme Myanmar cozah nih tha te’n a cohlan lo ahcun Mizoram cozah nih Myanmar ram ah kuat a siang lo tiah a chimh. Vice Chairman, Mizoram State Planning Board hi Pu K. Vanlalvena, MP (RS) le Pu Rosangzuala, OSD to Chief Minister nih an tel pi. Crd-The Lairam Times
SCHOOL EDUCATION MINISTER NIH RALZAAM DIRHMUN US STATE DEPARTMENT AH CHIM, Lawngtlai, 11 Zing 2022 : Zahan khan School Education Minister Pu Lalchhandama Ralte nih Washington DC Department of State Office kal in US State Department hruaitu hna cu, Mizoram hmun cheukhat ah 1 Nohawng 2021 ah ralhrang nih nawlngeihnak lak an timh thawkin Myanmar ram lei in Laimi le Kawlmi hna cu Mizoram ah an ralzaam dan le Mizoram nih a rak cohlan hna nak kong a chim.
Pu Lalchhandama Ralte le a telpi mi nih cun Mizoram nih ralzaam a rak don ning, cozah, Khrihfabu, zaanghleicawi pawl hna le mizapi nih an rak tawlrel hna ning a chim. India phunglam bantukin ngakchia diknak covo a pek hna bantukin ralzaam ngakchia hna cu cacawnnak nawl a pek hna nak kong zong a chim fawn. Minister le a telpi mi hna nih cun Chief Minister Pu Zoramthanga nih ralzaam ngakchia cu sianginn kai an herh zia, siangkai lio ngakchia a rak zaammi hna nih cacawn an herh zia, an ram a him lo zia hna cu Chief Minister nih India cozah sinah a chimnak kong le tuankhatnak le bawmhchanhnak kong zong nawlnak bia a chim chih.
U.S State Department nawlngeitu hna nih Mizoram cozah, Khrihfabu le zaanghleicawi hna le mizapi hna nih Myanmar lei in Lai le Kawl ralzaam hna an rak zohkhenh hna ning le, cawnnak, khuasaknak, eidin le sii-ai hna an pek hna cu lawmh a um tuk tiah an chim, Mizoram mizapi nih ralzaam an cohlan hna mi cungah lawmhbia an chim. US State Department nih cun Central le Mizoram cozah cu ralzaam bawmhnak kongkau tuankhat kho dingin an chim.
School Education Minister Pu Lalchhandama Ralte hi Pu Lalhmachhuana, State Project Director, Samagra Shiksha le Pu Lalliansanga, Finance Controller, Samagra Shiksha hna leng ah US um Laimi Pu Zo Tum Hmung, Executive Director, Chin Association of Maryland (CAM) le Matthew Wilch, Adviser CAM nih an tel pi.
US State Department ah Nicole R.Gaertner, Acting Director, Bureau of Population, Refugees and Migration/Office of Asia and the Near East (PRM/ANE) nih a hruai i, US State Department ah a tuanhawi Mr Jackson C Dart, Burma Unit Chief, Bureau of East Asia, Mr. Robert W Ogburn, Director, EAP/MLS , Mr. Thomas Carnegie Deputy Director for India, Bureau of South and Central Asia Affairs/India , Ms. Meredith L. Houck, South Asia Program Officer, PRM/ANE le Mr. Peter T Chisolm, India External Unit Chief hna zong an i tel. Crd-The Lairam Times
Hindi Education Wing tuahmi “Orientation Training for Hindi Teachers” onnak tuah, West Lairam, Lawngtlai : 13 Zing 2022 : Nihin chun suimilam 11:00AM ah LADC Conference HALL, LADC Office complex ah LADC tang Hindi cawnpiaktu hna caah 13-15 -22 Zing tiang Orientation Training thawk a si cang. Hi Training tuahnak ding hi Pu Andrew Laltlanzara EM i/c Education (MS) LADC nih onnak a ngeih.
Pu Andrew Laltlanzara, EM i/c Education (MS) nih cun, minung hi a cawng peng ding kan si, nihin ah hmunkip in Hindi cawnpiaktu hna zong nih Training hi tha te’n tuah dingin forhfialnak a ngeih hna. Hindi hi National Language a si bantukin LADC cozah zong nih biapi ah a chiah, Budget zong tuah in karhlannak caah hman a lak tawn, asinain rai nih rampum a buaihnawh caah caan sau hmala kho lo in kan um hnuah nihin ah hi tiang training Programme kan timhtuah khawh cu lawmh a um tuk. Hi training nih hin thatnak in chuahpi hram ko hna seh tiah cah kan duh hna tiah a chim.
Pi Van Bawi Tha Sung Cinzah, Dy.E.E.O(MS) zong nih bia a chim i, Hindi cawnpiaktu hna cu tha te’n training hmang dingin forhfialnak a ngeih hna i, Trainees hna nih theih herhmi zong a chim fawn. Training onnak caan hi, Pu Alex Lalzawmpuia Hindi Education Officer LADC nih a hruai , Resource Person caah Pu C. Vanlalmalsawma, Hindi Faculty,DIET, Lawngtlai nih cun Hindi cawnpiaktu training a pek hna lai. Crd-The Lairam Times
CYLA NIH MIZAPI SIN NAWLNAK CATHANH, West Lairam, Lawngtlai, 14 Zing 2022 : Tulio kan ramchung ah rithaisii ( Heroin/4) lut a tam ngai caah mizapi nih harsatnak kan ton, rithaisii nih lemthar mi an tam i, khuatlang ah thilfir le sualnak a kharh ngai fawn, chungkhar tampi hna nih harnak an ton ngaingai ko, hi thil vialte a can tikah Center YLA nih cun poi a ti i, rithaisii dohnak ding caah theihtawk chuah in hmalaknak ding Central YLA Executive Committe tangah CYLA Drugs Reduction Squad (CDRS) a dir i, hi Squad nihhin Brand YLA hna he tuankhat in rithaisii ( Heroin/4) dohnak hma an lak cuahmah.
Rithaisii doh hi zaanghleicawi mi ca lawng cun thilfawi a si lo caah , Khrihfabu le mizapi tuankhat a hau mi a si. Hi rithaisii dohnak ahhin ruahlo pi’n kuthlaknak le harsatnak phunkip a chuak kho mi a si caah YLA nih rithaisii a dohnak ah Lawngtlai pengkomh ( District) mizapi le Khrihfabu kip nih thlacam piak cio dingin kan in nawl hna.
Rithaisii ruangah ram le khuatlang nih harnak kan ton – chungkhar thencheunak, zawtnak tha lo le, nunnak tiang nih a tuar, rithaisii nih lemtuk ruangah kan unau hna taksa le Thlarau chanhchuah an si nakhnga CYLA Drugs Reduction Squad (CDRS) le Branch YLA hmalaknak hi dirkamh in, rithaisii hmang tawnmi chimhhrin le a zuartu tlaihkhih khawhnak caah a si khawhchung in i bawmchan dingin Lawngtlai pengkomh (District) mizapi kan in sawm hna i kan in nawl duh fawn hna. “Rithaisii Ruangah A Zawmi Kan Ram Damter Dingin Tangrual Hna Usih” Crd-The Lairam Times
Relchih; Thaketa Peng Kamarkyi Hlei Cung In Mipa Pakhat A Zuang, Yangon ramṭhen, Thaketa(သာကေတ) peng Kamarkyi(ကမာကြည်) hlei cung in mipa pakhat cu nihin September 14 zing sml 10:00 hrawng ah a zuang, tiah mi bawmchantu phu nih an chim. Bawmchantu phu cu mipa a zuannak hlei lei an va kal tikah cycle(စက်ဘီး), phanah, luchin le a dangdang thilri a chiah takmi an hmuh. Mipa hi aho a si ticu an hngal kho rih lo, tiah theih a si.
Mipa ruak cu palik nih an kawl cuahmah ko nain September 14 chun tiang ah an hmu kho rih lo, tiah Thaketa peng mi bawmchantu phu siin theih a si. A luancia August thla zarh dongh lei ah Yangon telh in kadang hmun dang ah mah tein aa thatmi hi zarhkhat chungah 7 an um, tiah theih a si.
Thinlung khuaruah umtuning kong a cawngmi Phyo Pan Nu Khin nih cun, “Mi pakhatkhat nih a lung donghnak kong bia a’n ruah i, a nunnak lak ding tiang in aa timh na hmuh ahcun nangmah lawng nih na tonmi a si lo, tiin thazaang peknak biachim a biapi,” tiah BBC he biaruahnak an ngeihnak ah mizapi theih ding in a chim.
Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna, Mizoram Planning Board Vice Chairman Pu H. Rammawi Nih Ralzam Kongkau Ah India Central Cozah Hruaitu A Ton Hna: India ram i aa dormi Myanmar ralzam; a bikin Chin ralzam hna cu Myanmar ram ah kuat ṭhan an si lai, ti bantuk biachawkvai a um lio ah, ralzam kong he pehtlai in Mizoram Cozah ah ṭuanvo ngeitu sang Planning Board Vice Chairman Pu. H. Rammawi nih Delhi khuapi Central cozah hruaitu hna a va ton hna.
Mizoram Planning Board Vice Chairman Pu H. Rammawi nih cun, “Atu i Mizoram ah a ummi Myanmar ralzam hna cu a kir ṭhan hnu ah an humhimnak ṭha te an ngeih lo i, an khuasaknak ah remdaihnak a um lo ding a si ahcun Mizoram cozah nih kan kirter hna lai lo,” tiah Ministry of External Affairs ṭuanvo ngeitu hna he tonnak an ngeih lio, September 14 ah khan a chimh hna. Pu H. Rammawi hi Sangau khua chuak a si i, Lawngtlai East Constuency in Mizoram Legislature Assembly (MLA) ah rak thim cang mi a si. Mizoram cozah ah Cabinet minister(Agriculture) a rak ṭuan bal mi a si i, Atutan MNF cozah ahhin Planning board vice chairman rian a tlaih.
SAC Ralkap Nih Monywa Peng Nagardwin(နဂါးတွင်း) Khua An Khangh, Khuami 12 An Tlaih Hna, Sagaing ramṭhen Monywa peng Nagardwin khua cu SAC ralkap nih nihin september ni 14 zingah hriamngan in an kah hnu ah khua chungah an lut i mipi inn zeimawzar an khangh hna tiah tualchungmi pakhat nih a chim tiah theih a si. SAC ralkap pawl nih Nagardwin khua cu nihin zing suimilam 6 le cheu hrawng ah hriamngan in an kah, cun suimilam 9 le cheu ah khuachung an lut i suimilam 11 le minute 41 ah inn pawl cu an khangh duahmah hna.
SAC hriamngan kahnak in khuami inn pakhat cu a rawk, leikuang hna an kang chih, cun phungki sianginn ah um mi cycle pawl zong an khangh dih tiah theih a si. Khuachung luh awk a ṭhat rih lo caah inn zeizat a kangh le tualchungmi a thi le aa hliam mi cu kan thei rih lo nain minung 12 tu cu an tlaih hna, inn kang hi cu a tam hrimhrim ko lai tiah tualchungmi pakhat nih a chim.
Dawei Pengah SAC Ralkap Nih An Tlaihmi Hna Tualchungmi 130 Hrawng Cu Zarhkhat Hnu Ah An Thlah Hna, Tanintharyi ramṭhen Dawei peng Bawapin (ဘဝပင်)khua mi 130 hrawng cu a luancia september ni 6 ah SAC ralkap nih an rak tlaih hna, cu an tlaihmi hna cu zarhkhat chung an hrem cikcek hna hnu nizan zaanlei ah an thlah ṭhan hna tiah theih a si.
SAC ralkap thazaang 100 hrawng cu Bawapin khua ah an lut i khuami tar le ngakchia he minung 130 hrawng Phungki sianginn ah an rak tlaih hna tiah tualchung hriamtlaiphu chungtel pakhat nih a chim. Khuami hna cu phungki sianginn ah an zaam, cu an zaam nak ah cun SAC ralkap nih an kal hnawh hna i an tlaih hna, an hrocel hna, hri in an ṭem hna, meithal kuang in an tuk hna, an hrem hna pin ah khuachung thilri pawl cu an duh paoh in an lak tiah tualchung hriamtlaiphu pakhat sinin theih a si.
SAC ralkap pawl cu Bawapin khua ah zarkhat umhmun an khuar hnu nizan september ni 13 ah Dawei khua lei ah an kal i an kal pah ah hriamngan le hriamhme he an puahpah thluamah tiah theih a si. Bawapin khuami an tlaih hna ni, september ni 6 thok in an khuapawng ah KNLA , tualchung hriamtlaiphu le SAC kar kahdohnak pehtlai in a chuak i SAC lei a thimi zong an um tiah Dawei pah-kah-phah in ṭuanvo ngeitu pakhat nih a chim.
Minung thazaang 200 hrawng si mi SAC ralkap phu hna cu Bo Naga chungtel 13 nih an kahdoh hna, 5 an thi, SAC ralkap minung thazaang 200 hrawng cu Bo Naga hruaimi Myanmar Ṭawwin Naga ralkap MRDA Special commando chungtel minung 13 nih an kahdoh hna i SAC ralkap lei a thimi an um tiah cathanh an chuah. Nihin September 14, zinglei suimilam 7:30 hrawng ah Pale peng Pan khua le Muaitone(မွေ့တုံ) khuapawng ah minung thazaang 200 hrawng simi SAC ralkap phu hna cu Myanmar Ṭawwin Naga MRDA i Special commando chungtel minung 13 nih a naihnak hmun in an kah hna hi a si.
Kaphnih kar i kahdohnak minutes 15 hrawng a rauh hnu ah SAC ralkap lei 5 hrawng an thi tiah an cathanh chuahmi ah cun an langhter. SAC ralkap lei cu minung thazaang le hriam thazaang tamtuk an si nain, Bo Naga Special commando hna nih hmunhma ṭhatuk in an huapkhawh ruangah le hmuhtonmi tlamtling an ngeihve ruangah hliamhma tuarnak umlo in kaphnih kar i kahdohnak ah hlawhtlinnak he hnu an tolhkho tiah an thanhmi ah cun an langhter chih. Crd-The Chin Post
Leave a Reply