Tamu in Kalaymyo Lei Ah A Kalmi SAC Ralkap Cu Tualchung Hriamtlai Phu Nih Bomb Puahhnawh Hna I, Ralkap 50 An Thi
====================================
Sagaing ramṭhen, Tamu in Kalaymyo lei ah bomb thianhhlimh ding in a kalmi SAC ralkap motor 10 cu Tualchung hriamtlai phufonh nih bomb an puahhnawh hna caah SAC ralkap 50 hrawng an thi i, 10 hrawng cu fak ngai in hliamhma an tuar, tiah CDF – Tonzaang nih cathanh an chuah. SAC ralkap motor run cu Tamu le Kaalymyo kar Mengtung 55 pawng ah KPDF, CDF-Tonzang le PDF-Yazagyo phu nih pa-de-ta bomb lung 30 an puahhnawh hna, tiah theih a si. Kalaymyo lei ah mithi phor motor le mizaw phor motor hna cu chun hnu suimilam 1:30 hrawng ah an phan, tiah Kalaymyo khuasa mi hna nih an chim.
Sagaing Ramṭhen Chung Kahdohnak Ah SAC Ralkap 35 An Thi: Nihin August 4 ah Sagaing ramṭhen, Ayardaw peng le Myinmu peng aa tonnak Khuatkhun(ခွက်ခွင်း) khua pawng ah rallam a sialtu SAC ralkap 64 cu tualchung hriamtlai phu nih an kahdoh hna caah SAC ralkap 15 an thi, tiah Myinchain(မြင်းခြံ) Zero pah-kah-phah hruaitu Ko That Kyi nih a chim.
Sagaing ramṭhen chung ṭhiam, Taze(တန့်ဆည်) peng Byaitkyi(ဗျက်ကြီး) khua ah umhmun a khuarmi SAC ralkap le pyusawhṭi phufonh cu August 4 zinglei suimilam 1:00 hrawng ah tualchung hriamtlai phufonh nih an kahdoh hna caah SAC ralkap 10 an thi, tiah tualchung hriamtlai phu nih an thanh. “SAC ralkap le pyusawhṭi hna cu umhmun an khuarnak hmun in hmundang ah an zaam. A thimi ruak cu Leeng 2 in an thiar hna i, 10 nak tlawmlo an thi lai,” tiah khuami nih an chim.
SAC ralkap le pyusawhṭi phufonh nih umhmun an khuarnak sakhan cu Taze PDF battalion 6, battalion 8, battalion 10, battalion 16, KPK, TSR, Taze Tiger, PRLF, PLA, pah-kah-phah le pah-lah-phah phufonh nih an doh hna. SAC ralkap nih an kaltakmi 5.56 kuan 100 le bomb lung khat an lak, tiah theih a si. SAC ralkap nih umhmun an khuarnak Byaitkyi(ဗျက်ကြီး) khuami hna cu SAC ralkap le pyusawhṭi an kir ṭhan lai an phan ruangah khuami dihlak in an zaam dih, tiah theih a si.
Mandalay Ramṭhen, Madaya(မတ်တရာ) Peng Khuabawi Cu Hriamtlaitu Pahnih Nih An Kahthah: Mandalay ramṭhen Madaya peng khuabawipa cu nihin August ni 5 ah hriamtlaitu mi pahnih nih an thah, tiah tualchungmi sin in theih a si. Khuabawi U Khin Zaw (ဦးခင်ဇော်) cu aho theih lo mi hriamtlaitu minung pahnih nih Pistol in voi 4 an kah i a thi, tiah theih a si.
“SAC kut tang ah khuabawi rian ṭuan lo ding in tualchung hriamtlai phu lei nih nawl an rak pek cang,” tiah khuami pakhat nih cun a chim. Khuami pakhat nih cun, “Zeiban tuk hriamtlai phu nih dah khuabawi pa cu an thah ti fiang in theih a si rih lo. SAC ralkap nih khua pawnghrawng ah chekhlatnak an tuah,” tiah a chim chap. Mandalay ramṭhen Madaya peng ah hin a luancia July thlachung ahkhan SAC ralkap rian khinhmi a ṭuantu(သမဝါယမဦးစီးမှူး) pakhat cu thah a ton ruangah tualchungmi 50 leng SAC ralkap nih an rak tlaih bal cang hna.
Japan Rammi Video Journalist Pakhat Cu Sualpuhnak Phun 2 In SAC Nih Taza An Cuai! Japan rammi video journalist le flim sertu pakhat cu sualpuhnak phun 2 in tazacuai a si, tiah SAC nih cathanh an chuah. Japan rammi video journalist le flim sertu Toru Kubota leng ah Yangon ramṭhen, South Dagon peng ah SAC ralkap uk duhlonak langhter in lamzawhnak a tuahtu minung 2 cu SAC ralkap nih July 30 ahkhan an rak tlaih hna, tiah theih a si.
Toru Kubota cu July 1 ah tourist visa in Thailand in Myanmar ram ah a rak lut. July 30 zaanlei ah South Dagon city mart pawng i minung 15 hrawng nih SAC ralkap uk duhlo in lamzawhnak a tuahlio cu vedio a thlak caah kan tlaih, tiah SAC nih an thanh.
SAC ralkap kut in tlaih a rak ton ka ah, thlahpiak zau ding in Japan lei nih nawlnak an rak tuah, tiah theih a si. Toru Kubota cu rampi muichiattertu ti in section 505(A) in tazacuai a si, tiah theih a si.
Relchap, Tunbia duhtu caah, Lothlopa Tuanbia, Ni khat cu, Jesuh cu rili kam in mi tampi a cawnpiak hna. Minung cu tam tuk hringhran hna kaw, lawng chung ah a kai i cu kaa cun bia cu a chim. Jesuh nih tuanbia pakhat a chimh hna. “Lothlopa pakhat cu thlaici tuh awk ah aa thawh. A kut chung in thlaici cu a theh tikah a cheu cu lam cung ah an tla i, va an rak chuak i an char dihl.”
“Thlaici dang cu vawlei um setsailonak lung lak ah an tla. Lung lak vawlei i a tla mi thlaici cu khul rang ngai in an hung keoh. Nain ni a hung chuak i, khua a linh tikah, an uai zau i, an hram thuk hna hlah kaw an thi dih.” “Cheukhat thlaici tu cu hling bur lak ah an tla. Hlingbur nih a zik hna i an voi kho lo.”
“Thlaisi dang cu vawlei ttha cung ah an tla. Cu thlaici cu an keoh i, a let 30, 60, silole a let 100 tiang tam in an voi. Hna a ngei mi nih cun thei ko hna seh!” Cu tuanbia nih cun a zultu pawl cu an lung a tuai hna. Jesuh nih, “Thlaici nih cun Pathian Bia a aiawh. lam cung i a tlami thlaici cu Pathian Bia a thei ko nain a hngalthiam kho lo mi hna, cu ruang ah an theih mi bia zong cu an sin in khuachia nih a lakpiak tthan hna, ti chim duhnak a si.”
“Lung lak vawlei i a tla mi thlaici nih Pathian Bia a thei i lawmhnak he a pom colh mi hna a aiawh. Nain harnak le hremnak a tlun tik tu ah cun an zumhfehnak an ngeih lo ruang ah an tlu tthan tawn.” “Hling bur lak i a tlami thlaici cu Pathian Bia a thei i a zum mi bantuk an si. Nain caan a hung rau deuhdeuh i, Pathian an ttanhnak cu vawlei thil dangdang rumnak le nuamhnak tehna nih a dawrh dih tawn. An theihmi cawnpiaknak nih an nun ah thei a tlaiter kho lo.” “Vawlei ttha ah a tla mi thlaici nih cun Pathian Bia a thei, a zum i, thlarau theitlai a tlai mi hna a chimduh,” tiah a ti.
Pehrih, NGATAINU, Hlan lio ah khua pakhat ah nufa an rak um. A fanu cu a min ah Nga Tai tiah a auh. Nga Tai cu aa dawh tuk ah hin a hmumi paoh a duh lomi an um lo, zoh an rak cim hrimhrim lo. Mikip nih an dawt, a pumrua that le a tungtai rem lengah a hmaithlak hrim hi a rak I dawh tuk ti a si. A mitmu hrimhrim hi thipum fang dawh in aa dawh I a mit-au nih zing niceu bang a rak I dawh ti a si. A samthlai nih le aa rem i a ziaza le tha kaw, nu sinak a tlinh lengah a aw a nem i a pawngkam a ummi paoh nih an lawmh dih tawn.
Kum khat cu ruahpi a sur ciammam i a han kho ti lo. A fak chin lengmang i ti a lian thluahmah. Cucaah an inn le an lo zong a phum thluahmah. Mi vialte cu an inn an lo chuah tak in ti nih a phak rih lomi tlangcung ah an kai dih. A kai kho lomi cu ti nih a phum hna i an thi len cang. Ti cu a thang chin lengmang i tlang cu phum dih a timh cang. Saram pawl zong tlangsannak cu an panh cio. Minung le satil saram hna cu tlang a sannak bik ah cun an i sual len hna. “Zeidah a cang hna?” tiin zapi cu khuaci mui in an tap, an ai, an hram len.
Ti cu a thang chin lengmang i “Tai, Tai, Tai” tiah Nga Tai min chim pah in tlangpar cu a hun naih chin lengmang. Ti awthawng cu an theih tikah “Ti nih hin Nga Tai hi a duh caah a si ko,” tiah an ruah. A sam pakhat an phawi i ti lak ah an thlak. “Tai” a ti i ti cu tlawmpal a vung zor. Asinain a rauh hlan ah a hung thang than. A angki an thlak than. “Tai” a ti i ti cu a vung zor deuh nain “Tai, Tai” a ti i a hung thang than lengmang. Cuticun Nga Tai sam le thilri le a hnipuan cu an thlak dih cang.
NGATAINU: Ti cu “Tai, Tai” a ti i tlang ah a hung kai chin lengmang. Khuakhan awk an hngal ti lo i a donghnak ah mi vialte thihnak cha cun minung pakhat thih a tha deuh lai, an ti i Nga Tai cu thlak an timh. Asinain a nu nih, “Kanmah sual ruangah kan tonmi a si tung lo, zeiruangahdah ka fanu theng cu kan thlak in kan thither lai,” a ti i a siang lo. A fanu cu fekte in aa tlaih I zapi he an i chut len, a donghnak ah an chuh khawh i Nga Tai cu a tah a ai bu in tilian ahcun an vun paih. Tilian chungah cun Nga Tai cu a vung pil zuahmah. A nu nih a tahbu le a hrambu in, “Ka fa dawt sian lo, Nga Tai aw… nang ngami ah vung i cang law,” tiah a cah ta, ti a si.
Nga Tai cu a nu bia bang ngami ah aa cang taktak. Cucaah ngami cu minung bantuk in hnuk a ngei I taw zong aa ngeih venak a si an ti. Nga Tai nu cu a lung a leng tuk. A fanu zun in a zaw zungzal, ti a si. A fanu zung cu a tuar i ei le din zungzuam lo le tuan zaang tlung lo in a um. Mi thil he fing le tlang kip a cult awn.
Aa chokvak lengmang i tlangsang kip hin khua za a cuan tawn. A umhar le a lunglen celh loah thiam tal ka bang lai a ti I thiam tial baannak dingah tlangsang le tlangdawh a kawl I a donghnak ah tlangdawh ngai pakhat a hmuh i cuka cun thiamtah aa thawk. Thantlang peng Khualhring tlang chungah tlangsang ngai pakhat a um i, cu tlang cu “Ngatai nu tlang” tiah atu tiang auh a si. Pupa chan ah cun Nga Tai nu thiamruak zong a rak um, an ti. Nga Tai nu tlang ah cung thiam a tak i Falam peng Ramthlo khualu Zinghmuh tlang ahkhin a thiam tlang a rak sih.
Nga Tai nih a nu thiam a tah le a lunglen kha a theih tikah minung in a hun i langh i a nu cu a hung veh tawh, ti a si. A nu sin a phanh tikah a taitang cu nga a si i a tai cungcu minung a si. Minung bantuk in minung sin ah um awk a that lo caah caansau um lo in ti chungah a kir than tawn. A nu a thih hnu zongah Nga Tai cu tlang ah a kai tawn i a nu um tawnnak kha lungleng le ngaihchia in a rak cult awn. Kha ti tlang i a kai kha minung nih an hmuh tawn i ngaknu dawh tuk a si fawn, a tai tang nga a si fawn tikah a hmumi kip an khuaruah a har i a min ah Ngatainu tiin an auh colh ti a si.
Leave a Reply