SAC ralkap pawl kahdohnak chungah anmah le anmah an i that
==================================
2022 July 18 – A luancia June 28 ah Myanmar-India ramri ah a ummi Lailenpi khua in Matupi lei ah a raami SAC ralkap pawl nih an sinah aa telmi raifanh in a zawmi ralkap pahnih cu an phorh hna. Lailenpi le Matupi karlak hi mawṭaw in cun nikhat chung kal a si. Asinain SAC ralkap pawl cu hriam he, ṭaung he ke in an kal caah an ruahning tluk in an lam a tluang lo. A zawmi le hliam a pumi pawl zong an lam thluan ah an i tel. Cubantuk lam har ah sii tlamtlin lo ruangah a zawmi an hawile cu an thah hna.
“Lailenpi le Aayu khua karlak ah kahdohnak a um lo. Kanmah lei mi zong an um lo. Kahdohnak chungah raifanh nih a tlunhmi an hawile pahnih ruak kan hmuh. Cun, Amlai le Yankhan khua karlak kahdohnak ah hma a pumi 2 zong an thah hna” tiah thilfiang a theimi pakhat nih Mizzima ah a chim.
Cun July 6-7 kahdohnak ah a thimi ralkap ruak pawl cu inntang le lamkam ah an hlonh hna i CDF-Matupi nih an khanghpiak hna. “Ahlan ahcun ralram kan kal tikah, ka nau nang cu um ko, nupi le fa he na si tiah zawn i ruah a si. Sihmanh sehlaw atu ahcun kahdohnak a um tikah zeitik dah ka zaam lai ti a bawhmi lawngte an si” tiah ralkap hlun pakhat nih Mizzima ah a chim.
Ralkap a lutmi pawl zong hi fimnak ṭha tein a ngei lomi an si i a leng an um lio zongah an duh poah a ṭhudir mi an si. Ralkap chung an um tik zongah an duh poah in an um ṭhiam i ralram an kal tikah mipi innlo khangh, fir le thahnak hna an duh poah in an tuah. “Khuachung an rak luh tikah, hnahnawhnak kan pe hlah uh! Hna na kan hnawh cun nan khua kan khangh dih lai. Hnahnawhnak a kan pemi khua pawl an khanghmi a tlawm ti lo.
Nan khua ah meithal kuankhat a puah cun atu bantuk in inn khanghpiak nan si lai tiah inn 3 an khangh tak” khanghpiak a tongmi khuami nih Mizzima ah a chim. Lailenpi le Matupi karlak ah SAC ralkap le CDF-Matupi cu kahdohnak voi 4 a chuak i SAC ralkap 15 an thi tiah theih a si. Crd-The Chinland Post
Monywa Ah Mino 2 SAC Ralkap Nih An Kah Hna, Monywa Thanlar(သံလ်လာ) sang ah mino pa 2 saikel ai phirh mi cu July 17 zaan Sml 7:00 tluk ah SAC ralkap nih Moekaung le Semaung lam aa tonnak an phak mawtaw in an pah hna i meithal in an kah hna tiah tualchung mi nih an chim. ” Mino pa 2 cycle aa phirh mi cu SAC ralkap nih mawtaw in an hnu lei in an dawi hna i hramhram in an pah hna i an tluk pah ah meithal in an kah chap hna. An hma a fak i an nun khawh ding a fawi lo,” tiah tualchung mi pakhat nih a chim. An kah mi pa 2 cu an hliamhma he SAC ralkap nih sakhan ah an kal pi hna tiah theih a si.
Monywa khuachung, khua leng, sang chung ah lam vialte ah SAC ralkap nih mawtaw le cycle aa chawk mi ni fa tin an check i cycle pakhat ah pa 2 an i pherh ah cun an tlaih hna i phaisa an hal hna pin meithal zong in an kah hna caan a um tiah tualchung mi sin in theih a si. A luancia May 9 zong ah khan Monywa Zalot(ဇလုပ်) timi hmun pawng ah cycle aa phirh mi pa 2 cu SAC ralkap nih an kah hna i a hmun ah an thi colh.
NayPyiDaw Pawng Ah Kahdohnak A Fak, Bago ramțhen, Karen ramkulh le Naypyidaw SAC hmunhma chung hna ah kahdohnak a fak ngai tiah Naypyidaw PDF battalion 802 nih thanh. TanTaungKyi peng , khuate lei ah SAC ralkap 1000 hrawng rallam an sial caah Naypyidaw PDF Battalion 802 le țangți hna nih an kah hna hi asi.
July 14 in July 18 tiang, ni kahdohnak a chuak i SAC ralkap battalion commander tel in 20 leng an thi. Mizapi ralkap lei in ralkap pakhat a nunnak a liam ,pakhat a tlau i pehtlaih khawh a si lo tiah battalion 802 nih thanh.
” Nihin July 28 zing ah MiEgyi( မိအီကြီး) khua cu SAC ralkap an khangh caah kaphnih kahdohnak a chuak țhan tiah Naypyidaw PDF battalion 802 i tuanvo ngeitu nih a chim.
KhinOo, Tawaddy, MonHla le PinSing Khin Khua Kam Ah kahdohnak Um Lo In SAC Ralkap Nih Helicopter In An Kah, Sagaing ramțhen, Khin Oo peng nitlak lei, Tawaddy khua, MonHla khua, PinSing Khin khua tel in a pawngkam khua hna cu SAC ralkap nih helicopter in nihin July 18 zinglei Sml 10:00 ah an kah hna tiah khuami hna sin in theih a si.
” July 17 ah YeeOo in thazaang 100 leng cu Tawaddy khua tlanglei ah an lut. Zan a phan i khuachung phungki sianginn ah umhmun an khuar. Zingkaa te ah khua chaklei cu hriamngan lung 10 leng in an kah. Zei ruangah an kah ti zong kan thei lo. Cu hmun ah cun kahdohnak zong a um lo. Cu hriamngan an kah hnu ah helicopter 3 a rak phan i an kah. A cheu kan zaam, A cheu kan i thup. Tliknak cu MonHla khua lei lawng ah lam a um. Cu kaa lei a zaam mi hna cu an kah hna tiah khuami pakhat nih a chim.
July 14 zongah Depeyin peng nichuahlei kap ah SAC ralkap nih helicopter in an kah hna caah khuami pakhat a thi i pahnih hliam an tuar, a tu helicopter in na kah nak Tawaddy khua, MonHla khua, PinSingKhin khua i khuami hna zei an lawh ti theih an si rih lo.
Matupi Khah- Mah- Yiah Battalion 304 In SAC Ralkap Pakhat CDF Matupi Sin Ah CDM A Tuah, Matupi pengchung , Paletwa lam lei um Khah- Mah- Yiah Battalion 304 in U Phyo Wai Oo , Pumpak Number 1/ 50092 cu 2022 June 10 ah CDF – Matupi sin ah CDM a tuah. CDM a tuahmi ralkap U Phyo Wai Oo cu a himnak hmun ah kan kuat cang tiah CDF Matupi nih an thanh.
Hlaing Peng Ah SAC Ralkap Captain Pakhat Le A Nupi Kahthah An Si, Yangon ramțhen, Hlaing peng No. 2 sang No. 9 lam ah SAC ralkap captain Aung Naing Phyo(အောင်နိုင်ဖြိုး) le a nupi Ma Juu Juu (မဂျူးဂျူး) cu mawtaw in an rat lio ah kah thah an tong i an thi colh tiah tualchung mi sin in theih a si.
Captain Aung Naing Phyo le Ma Juu Juu hi Bayinh Naung (ဘုရင့်နှောင်) No.4 lam ah ah a ummi an si i mawtaw in an rat lio i Bayinh Naung No.9 lam an phak ah minung 2 nih naih tein meithal in an kah hna i an hngawng le an hna an hnabek ah an khen hna i an thi tiah SAC thawngzamh News of Myanmar nih a țial.
” Zing Sml 9 ah a si. Dalan tiah kan ruah nain SAC ralkap nuva an si. Mawtaw chung ah hmakhat te ah an thi colh, ” tiah tualchung mi pakhat nih a chim. ANONYMOUS URBAN GUERILLAS nih nihin. July 18 ah SAC ralkap captain Aung Naing Phyo cu Hlaing peng No. 2 sang lam 9 nak ah kan fimtawl tiah thawng an thanh.
Leave a Reply