Good News; Thawngpang Tha Tuk Bak Theih Than A Si E!!

NUG Nih Japan Ram Ah Palai Zung A Hun Cang
=========================
National Unity Government(NUG) nih Japan ram ah a luancia July 31 ahkhan palai zung a hun cang, tiah theih a si. Cu hunnak puai ah cun NUG Ministers, Hluttaw palai pawl, Media, Democracy a aupitu hna a kilvengtu palik ṭuanvo ngeitu hna le khual dangdang an kai, tiah NUG nih cathanh an chuah.

NUG-Japan palai zung uktu dingah Saw Ba Hla Thein cu an thim i, cu hunnak puai an tuah lio zong ah Myanmar ram Democracy hmuh ṭhan nakding ah bawmchantu Japan ram mi hna he tonbiaruahnak an ngei, tiah theih a si. Ramdang kal khawhnak Passport, caan rikhiahmi chung i a dih tawnmi harnak cu NUG Japan zung nih a ṭha bik le a herh ning in kan tawlrel lai. Japan ramdang Minister zung le milutchuak lei ṭuanvo latu upa hna he tonnak kan ngei.

Japan phan Myanmar rammi hna nih, NUG-Japan zung cu an dirkamh. Caan rikhiahmi chung ah Passport le visa a dihmi nan um ahcun NUG Japan zung ah ra ulaw a ṭhatnak in kan in tawlrel piak hna lai, tiah NUG Japan palai nih cun a chim. A ra laimi zarh ah Australia ram ah NUG palai zung zong kan hun rih lai, tiah NUG-Australia embassy zung in cathanh an chuah.

Kalaymyo Ah Misual Pali Nih Pu Cin Deih Lian Inn An Luhhnawh I, Phaisa Zeimawzat An Chuh, Kalaymyo, Tawngphila(တောင်ဖီလာ) ah July 30 zaanlei suimilam 2:30 hrawng ahkhan Pu Cin Deih Lian inn cu aho theih lomi misual 4 nih an luhhnawh, tiah theih a si. Pu Cin Deih Lian inn pawng in motor pakhat a ra i cu Motor chung ah cun Mask ai hupmi minung 4 an rak chuak.

Cu hnu ah Cin Deih Lian inn chung ah cun an lut i, minung pakhat nih meithal i ken in a dang 3 nih bomb lungkhat cio an i ken. Meithal ai kenmi nih cun inn ngeitu hna cu meithal in a hmuahchih hna i phaisa chuah ding in a hro hna. Cutikah inn ngeitu nih cun Tahan, AG Biakinn phaisa an ken mi 720,000 le a dang anmah ngeihmi phaisa 300,000 cu a pek hna. Cu bantuk thil a can cu SAC nih uknak an lak hnu in a voithumnak a si cang, tiah sangchung mi nih an chim.

Mingalardone Ah Khuabawi pa Le A Nupi Cu Hriamtlai Phu Nih An Kah Thah Hna! Yangon ramṭhen, Mingalardone peng ah motor in a kalmi khuabawi pa le a nupi cu nihin August 2 zinglei ah hriamtlai phu pakhat nih meithal in an kah thah hna, tiah theih a si. Kah a tong mi hna hi Ṭhohcianh peng, Shwenanthar(ရွှေနံ့သာ) khua mi Win Naing Htun, kum 49 le a nupi He Mar Lwin, kum 42 an si, tiah theih a si.

An fapa kum 13 le an fanu kum 12 hna cu sianginn an va thlah hna lio ah Ṭhohcianh peng Daw Ngu hlei ah puahkehnak a chuak i an motor cu a dir. An dir lio ah cycle pahnih in minung 6 an ra i, meithal in an kah thah hna, tiah Myanmar Now nih a ṭial. Cu meithal kahnak ah an fale ngakchia pahnih cu hliamhma an pu lo. A pawngkam hrawng cu SAC ralkap nih lam an kham dih, tiah theih a si.

Kentucky Ramkulh Ah Ruah Faak Ngain A Sur I Ti A Lianh Caah Minung 35 An Thi Cang!: US ramchung, Kentucky ramkulh nichuah lei ah ruah faak ngai in a sur i, tilian a chuah caah minung 35 an thi i, cu lak ah cun ngakchia 4 an i tel, tiah ramkulh uktu Governor Andy Beshear nih nizaan August 1 ah a chim.

Governor Beshear nih cun nizaan zing ah minung 30 an thi tiah a fehter hnuin zaanlei ah minung 5 cu an thi ṭhan, tiah a chim. Nawlngeitu hna nih cun har tong mi hna bawmhnak an tuah cuahmah lio i, inn le lo a ngei lo mi thong tampi hna caah eidin tirawl le ruahkhamnak thilri zong an bawmh hna. Nikhua a chiat tuk ruangah mibawmchantu hna ca ah bawmhnak pekchanh lei rian ṭuan har ngai, tiah an chim.

Zaan ah ruahlopi in ruah a sur tawn i, timhtuahnak an ngeih manh tawn lo caah a thi mi an tamnak a si, tiah Andy Beshear nih cun a chim. Kentucky ramkulh nichuah lei i a ummi mipi hna zong thlichia nih a phanh hna hlan ah i dornak kawl cio ding in ruahnak a pek fawn hna. Beshear nih cun ruahti le thlichia nih a hrawhnak hmun cheukhat cu a hmun ah a va zoh i, an ton cuahmah mi, rawhralnak cu Kentucky ramkulh tuanbia chung ah a faak bik mi rawhralnak a si, tiah a chim.

Al Qaeda Hruaitu Ayman al-Zawahiri Cu Kan Thah Cang Tiah President Biden Nih A Thanh!: Ralhrang phu Al Qaeda hruaitu Ayman al-Zawahiri cu drone in kan kah thah khawh cang, tiah US President Joe Biden nih a thanh. Al Qaeda hruaitu Osama Bin Ladin an thah hnu kum hra leng a rauh ah Afghanistan ram khualipu Kabul ah Ayman al-Zawahiri cu US ralkap hna nih drone in an thah ṭhan.

US ram cu zeitik hmanh ah a sung kan pe bal lai lo, tiah White House in August 1 ah president Biden nih cun a chim. “An hruaitu kan thah khawh cang caah hruaitu an ngei ti lo. Cucaah vawlei mi vialte nih ṭihmi, mi thattu cu ṭih ding a um ti lo,” tiah Biden nih cun a chim.

US thiam hlei ralkap phu nih 2011 ahkhan ralhrang phu hruaitu Osama bin Laden cu an rak thah i, a thih hnu in Ayman al-Zawahiri nih a rian a chawn. Ayman al-Zawahiri cu Afghanistan ram le Pakistan ram ah aa thup tiah ruah a si. Al Qaeda phu cu Afghanistan ram um Taliban phu he naihniam tein aa chawnbia mi zong an si.

American ralkap hna nih Al Qaeda hruaitu thah an timhnak kong cu amah Ayman al-Zawahiri nih lehnak a tuah hna i, cu a chimmi lehnak video file pakhat cu Al Qaeda phu nih a luancia kum ah khan social media ah an rak langhter. Al-Zawahiri hi caan saupi a thli tein US ralkap nih an rak veh cang i, aa thupnak hmun a chim khotu cu dollar nuai 25 laksawng kan pek hna lai, tiah US an rak thanh cang.

Be the first to comment

Leave a Reply

Your email address will not be published.


*