Good News; Thawngpang Tha Taktak Theih A Si Ko Hih!!

ZeePyar Palik Sakhan Kahdohnak Ah PDF Nih SAC Ralkap Le Palik 17 An Thah Hna, Pyusawhti 53 An Tlaih Hna+Sagaing-Monywa Lam Ah SAC Ralkap Motor Bomb Puahhnawh An Ton Caah 15 An Thi!
=============================
Magway ramṭhen, Pauk peng Zeepyar(ဇီးပြား) khua um palik sakhan cu, PDF nih nizaan October 2 zaanlei sml 1:28 ah kan kah hna i SAC ralkap le palik 17 kan thah hna. Pyusawhti 53 an nung in kan tlaih hna i a dang ralkap le palik cu an zam, tiah Myaing peng PDF in Bawino La Gyia nih a chim. Zeepyar khua ah October 2 zaanlei sml 1:28 in zaan sml 7:00 tiang pyusawhti 93 hna raltuk cawn a chimtu sakhan cu PDF ṭangṭi phu hna nih an kah hi a si.

Zeepyar khuami cheukhat cu an hrem hna pinah khua in an chuah hna caah Myaing Pah Kah Phah, Pauk PDF le Myaing PDF hna i bawm in an kah hna, tiah theih a si. Cu kahdohnak ah SAC ralkap, palik le pyusawhti 17 an thih pinah pyusawhti 53 a nung in an tlaih hna. Pyusawhti 53 cu mizapi lei ṭan cang ding in le SAC ralkap kuttang ah rianṭuan ti lo ding in min zen an thut, tiah theih a si.

“Kan tlaihmi hna pyusawhti 53 cu rawl ṭha tein kan pek hna. Ahohmanh SAC kuttang ah rianṭuan ti hlah u, pyusawhti ah lut ti hlah u. Pauk peng ah khuate 300-400 tluk a um. SAC ralkap cu fung fek lawng hmanh in kan ngamh hna. Kahdohnak a um tik i SAC ralkap a thimi meithal lak khawh hi biapi in kan chia lo. Kan ralkap hna nunnak tu biapi ah kan chiah,” tiah Bawino La Gyia nih cun a chim. Zeepyar palik sakhan cu PDF nih an la kho lo nain kahdohnak ah sml 5 leng a rau i, meithal kuan 17,000 nak tlawm lo a dih, tiah theih a si.

Sagaing-Monywa Lam Ah SAC Ralkap Motor Bomb Puahhnawh An Ton Caah 15 An Thi, Sagaing ramṭhen, Sagaing-Monywa lampi ah nizaan October 2 zinglei ah SAC ralkap motor 6 cu bomb kan puahhnawh caah ralkap 15 an thi, tiah Myaung peng T.G.R in Bawino Teik Gar(တိုက်ဂါး) nih a chim.

October 2 zing sml 11:00 ah Sagaing in Monywa lei a kalmi SAC ralkap motor 6 cu Kwepintaw(ဂွေးပင်တော ) khua le Natyekan(နတ်ရေကန်) khua karah bomb lung 6 in PDF ṭangṭi phu nih an puahhnawh hna caah SAC ralkap motor 2 cu an rawk dih. A thimi le hliamma pumi cu mizaw phurhnak motor 2 in Chaung U sii-inn ah an kalpi hna, tiah theih a si. Cu bomb puahhnawhnak ah Myaung peng T.G.R le Saw Bwar Gyi (MPDF) hna i bawm in an puahhnawh hna i, SAC ralkap 15 an thi, hliamhma fak a pumi an tam, tiah theih a si.

Salingyi Peng SAC Ralkap Sakhan Kahdohnak Ah Tualchung Hriamtlai Phu PDF 2 Nunnak A Liam, SAC ralkap hna nih umhmun an khuarnak Salingyi peng Kyaṭaṭ(ကျားတက်) sakhan kahdohnak ah tualchung hriamtlai phu chungtel 2 an nunnak a liam tiah theih a si.
SAC ralkap phu chungtel hna le pyosawhṭi phu hna nih umhmun an khuarnak Kyaṭaṭ sakhan cu Salingyi le Yesagyo tualchung hriamtlai phu hna nih nizaan October 2 ah an kahdoh hna hi a si.

“SAC ralkap sakhan cu kan lak khawh ko nain, kanmah lei in minung 2 an nunnak a liam” tiah Salingyi peng tualchung hriamtlai phu chungtel pakhat nih a chim. Kyaṭaṭ sakhan lak kahdohnak ah SAC ralkap lei hi fakngai in hliamh an si nain, minung zeizah dah an thih timi bel fiang in theih a si rih lo.

Monywa Khuachung Ah A Phu In Ummi SAC Ralkap, Palik le Pyosawhṭi Phu Kah An Tong, Minung 10 An Thi, Sagaing ramṭhen Monywa khuapi ramṭhen zung hnulei ah a phu in a ummi SAC ralkap, palik le pyosawhṭi phu hna cu kah an ton caah minung 10 nak tlawmlo an thi tiah Monywa khuachung um tualchung hriamtlai phu nih cathanh an chuah.

October 3, chunhnu suimilam 3:00 ah Monywa khuapi ramṭhen zung hnulei lamcung ah a ummi SAC ralkap, palik le pyosawhṭi hna cu a phu in an um lio ah kahdoh an tong tiah theih a si. Kahdohnak ah cun SAC ralkap 3, palik 2 le pyosawhṭi 5 tiin SAC ralkap lei minung 10 an thi tiah Monywa PDF phufonh nih cathanh an chuah.

Cu kahdohnak cu Monywa pengkomh tualchung hriamtlai phu Chindwin Attack Force battalion 2, battalion 3, battalion 4 (Monywa The Boys), Chindwin Attack Force IO phufonh hna nih an tuah ṭi tiah theih a si.

Taungthar Khua Luhnak Check Gate Cu PDF Nih An Kah Caah SAC Ralkap 6 An Thi, Mandalay ramṭhen, Taungthar(တောင်သာ) khua luhnak chcek gate kan kah caah SAC ralkap 6 an thi, tiah Scorpions People Defence Force in ṭuanvo ngeitu nih a chim. October 1 zaan sml 7:00 hrawng ah Taungthar khua hnulei ah a ummi check gate cu, Taungthar hram bunh Myinchan pengkomh Battalion 3 nih tlanglawng lam in hriamngan le hriamhme he mins 10 chung kan kah, tiah Scorpions People Defence Force nih an langhter.

“Cu kahdohnak ah a thimi SAC ralkap ruak 4 cu an khangh hna i, ruak 2 cu motor in an phorh hna. Kanmah lei in a thimi le aa hliammi kan um lo. Cu kahdohnak ah Myinchan pengkomh Battalion 3, Companny(1) Myalatt PDF, Companny(3) Scorpions PDF၊ Seven PDF hna i bawm in kan kah hna,” tiah Scorpions People Defence Force in ṭuanvo ngeitu nih cun a chim. “Check gate ah a ummi ralkap cu pyusawhti he i bawm in khualtlawng mi le mi chawkvai cu tangka an hal hna. Cycle luchin aa chinh lomi cu kyats 20,000-30,000 an hal hna caah kan kah hna,” tiah Myinchan pengkomh Battalion 3, Companny(2) in ralkap pakhat nih a chim.

Dalah peng ah a thar phanmi SAC ralbawi nih pyosawhṭi hna cu khup bilter in a tuk hna lengah an pek ciami hriam a chuh ṭhan hna, Yangon ramṭhen, Dalah(ဒလ) peng Kyansitta sang, nizaan October 2 zaan ah SAC ralkap ralbawi telhin ralkap an phan i, khuachung um misual phu hriam pek ciami cu an chuh ṭhan hna tiah tualchung mi nih an chim. October 2, zaanlei suimilam 6:00 in Dalah peng um Kyansitta sangchung inn kip ah khualtlung cazin check in checkhlatnak an tuah hnu ah sangchung luh/chuahnak phih in hlathlainak an tuah tiah theih a si.

Dalah ah SAC ralbawi a thar phanmi nih cun SAC ralkap nih hriam an tlaihtermi hna cu an hriamthil an chuah hna leng ah an khup a bilter hna i a tuk leen hna tiah tualchung mi pakhat nih a chim. “Dalah ah dalan thah an ton tuk caah misual phu hna cu hriam tlaihter an si. Pyituhsit tiah min i bunh in pyosawhṭi zong an i telh. Cu ruang ah hriam an tlaihter hna. Checkhlatnak a tuahtu ralbawi nih cun nanmah ruangah mipi nih huat kan tong chin a ti caah a tuk hna hi a si. Kan tuahkhawhmi kan tuah lai, misual hi meithal tlaihter a herh lo tiah a chim” tiah sangchung ummi pakhat nih a chim.

Sintgaing Ah Electric Man Ap Dingin Bank Ah A Kalmi SAC Chungtel 3 Zulhmi Motor PDF Nih An Kah, Palik Bawi Sakhan-hmu A Thi, Mandalay ramṭhen, Sintgaing peng Mandalay-Kyauksae lam ah electric man bank ah ap dingin a kalmi EPC manager le SAC ralkap chungtel 3 nih zulhmi motor cu PDF phuthum fonh nih an kahdoh hna caah palik bawi sakhan-hmu a thi tiah Myitnge PDF in ṭuanvo ngeitu pakhat nih a chim.

October 3, chunhnu suimilam 2:50 ah Mandalay-Kyauksae, Sintgaing pura kam ah atu bantukin kahdoh an ton hi a si tiah theih a si.
Paleik EPC zung hi mipi sin ah, mei man pelo mi hna cu metrebox phihpiak nan si lai tiah tlerhkhonhnak bia an chim hnu ah mipi sinah meiman kholhnak a tuah tawntu an si tiah theih a si. Bank ah mei man ap dingin a kalmi SAC ralkap motor bomb puahhnawh in doh an ton ṭhan caah an i citmi private motor cu a rawk, palik bawi sakhan-hmu pakhat a thi, EPC manager zong a hliamhma a fak tiah theih a si.

Hpakan Ah Hriamnam Ken in Mithil Firtu Mifir 5 Cu PDF le Tualchungmi I Bawm in An Tlaih Hna, Hpakan peng ah hriamnam i put in mithilri firtu mifir minung 5 cu PDF le tualchungmi hna i bawmin an tlaih hna tiah theih a si. September ni 28 zaan suimilam 10 hrawngah Hpakan peng Seikmuhni Phungki sianginn pawngah a ummi inn pakhat cu hriamnam ai kenmi minung 5 nih an rak luh hnawh i an thilri an rak fir. Cu thilri firtu hna Happy KTV an kai lio ah PDF le tualchungmi i bawm in an luh hnawh hna i meithal zuun 2, kuan 41, pistol a lem zuun khat, phaisa sing 100 ks, phone 7 le mawtaw pakhat he an tlaih hna tiah theih a si.

PDF min put in thilri an fir, PDF min an chiatter pinah tualchungmi harnak an pek hna. Biahal nak kan tuah hna tikah SAC nih fialmi an si. PDF le tualchungmi kar ah buainak chuak seh tiin an tuahmi si. Atu bantukin PDF min put in sualnak tuahmi cu zeiti hmanh in kan thlahdorh hna lai lo tiah K.PDF le tualchungmi hna nih an chim.

Salingyi Peng Khuate 11 Ah SAC An Luh Caah An Khua Ning In An Zaam Dih, Salingyi peng Nyaungpingyi khua palik sakhan in thilcawk ah a chuakmi palik 4 kahthah an ton hnu in SAC ralkap cu khuate 11 ah an lut i meithal duh paoh in an puah caah khuachungmi vialte an zaam dih tiah theih a si.

Nyaungpingyi khua palik sakhan in palik 4 cu nihin October ni 3 chun suimilam 1:30 hrawngah thilcaw dingin an chuak i min theih lomi hriamtlai phu nih an kah hna caah an pali ningin an thih pinah an hriamnam zong an lak tiah theih a si. Cu kahdohnak ruangah Monywa um SAC ralkap pawl nih Chindwin tiva hnu lei in an lut i khuate pakhat hnu pakhat ah rallam an sial i meithal an puah caah khuami hna cu khua chuahtak in an zaam dih tiah theih a si.

Myawaddy Ah DKBA Chungtel Pahnih Kah An Tong, Pakhat A Nunnak Liam, Kayin ramkulh, Myawaddy Maynikune(မြေနီကုန်း) ah ku-va a cawmi DKBA chungtel 2 cu a hosi theihlo mi hriantlai phu nih an kah hna caah pakhat a thi, pakhat cu fakngai in hliamhma a tuar tiah tualchung mi hna nih an chim. Myawaddy Maynikune(မြေနီကုန်း) Sagaing ku-va dawr hmai October 2, zaanlei suimilam 4:00 hrawngah kahdohnak a chuak, zeiruang ah kah an ton zong theih a si lo tiah tualchung mi nih an chim.

” Pakhat cu kah an tonnak hmun ah a thi, pakhat zong a hliamhma a fakngai” tiah tualchung mi pakhat nih a chim. Cu kahdohnak a can hnu ah cun, SAC ralkap hna nih lampi le gate phihnak an tuah i checkhlatnak an tuah, kah a tongmi DKBA phu chungtel 2 cu Myawaddy general hospital ah an kalpi hna tiah theih a si. DKBA phu cu KNU in a chuakmi Karen hriamtlai phu pakhat an si, SAC nih uknak a lak hnu DKBA phu in Bo Salone hruaimi minung thazaang 200 hrawng cu KNU kuttang hriamtlai KNDO he a fonhmi an si.

South Korea President Nih North Korea Cu Nuclear Hriamnam Hneksaknak Tuah Ti Lo Dingin Ralrin A Pek!, October 1, South Korea Armed Forces Day ah, South Korea president Yoon Suk-yeol nih North Korea cu nuclear hriamnam hneksaknak tuah ti lo dingin ralrin a pek tiah theih a si.

North Korea nih a voithumnak nuclear hriamnam hneksaknak a tuah hnuin atu bantukin South Korea nih ralrin a pek hi a si. Armed Forces Day tuahnak hmun ah cun, South Korea President Joon Suk-yeol le Ministry of Defense Prime Minister hna an i tel i, hriamnam thar an ngeihmi pawl zong hmuhsak le theihternak an tuah chih tiah theih a si.

Mandalay Ah, Motor An Hlanmi A Khaltu An Thah Hnu Ah Motor An I Zaam Pi! Mandalay ramthen, Maha-aungme(မဟာအောင်မြေ) peng, Mahamaing(မဟာမြိုင်) no.2 sang ah a ummi, Taxi khaltu Ko Pyih cu, pathian biak ah kal dingin taxi an hlan, an kal pah ah a hlangtu lila nih an thah hnu ah, a ruak cu lampi ah an hlonh taak i a motor zong an i kalpi tiah theih a si.

Cu thil a can cu, October 2 zaan sml 8 hrawngah a si i, Pyikyitakhone(ပြည်ကြီးတံခွန်) peng, Industrial park 128 lam kam ah a ruak cu an hmuh i, Mandalay sii-inn ah an kalpi tiah theih a si. A thimi ruak cu social media ah kan taar i a chungkhar zong kan pehtlaih khawh cang hna tiah khuami hna nih an chim.

Ram Buai Hnu In Pawcawmnak Caah Caw, Naa Mizoram Ah A Zuarmi An Tam! Myanmar ram ah Min Aung Hlaing nih uknak a lak hnu in thilman a kai i riantuan ding a um lo ruangah pawcawmnak caah Mizoram ah Caw le Naa a zuarmi an tam tiah theih a si. Caw le Naa zuartu pakhat nih cun,” Uknak lak hnu in thilman a kaituk, kannih Chin ram ah hin a hleiin thilman a kaikhun, cun a hlan bantuk in phaisa hlawhnak zong a um ti lo, cucaah Kawl Caw hi tambik kan lak i Naa hi cu kanmah Chin ram chung satil kan lak iI Mizoram a kan va zuar,” tiah The Chin Post ah a chim.

“A caan ah cun phaisa thlen a tum kai a fah tuk ah hin kan sungh caan zong a tampi, zei riantuan awk a um lo tuk caah vansan ah kan zuar, uknak lak hnu cu pawcawmnak caah hin kan lungre lawng a thei ko,” tiah a chim chap. Ralkap nih hranhram in uknak lak hnu ah hin a bik in Chinram chung ah riantuan ding a har i, Mizoram ah Caw le Naa a zuarmi hi nikhat hnu nikhat an karh, a zuar tawntu hi phu li nga an um i a buaktlakin phukhat nih Caw 40 an hruai tiah theih a si. Mizoram chungah an va zuar tik zongah zuar a har ngai tawn i voikhat an kal ah hin caan sau ngai an rau tawn.

Palaw Ah Rithasii A Zuartu Pyusawhti Pakhat Kahthah A Tong, Tanintharyi ramṭhen, Palaw peng Htamin Masar(ထမင်းမစား) khua pawngah rithaisii a zuartu pyusawhti pakhat cu, nizaan October 2 ah kan kah i a hmun ah a thi colh, tiah Palaw KPDF nih cathanh an chuah. “Nizaan zaanlei sml 5:45 hrawngah pyusawhti Ar Taw(အာတော့) cu Htamin Masar khua pawng lam cungah kah thah a tong. Anih hi khua ah pyusawhti chungtel a si pinah rithaisii a zuartu a si. Amah pumpak zong in rithaisii a hman caah an kahthah i a si men lai,” tiah tualchung mi pakhat nih a chim.

Pyusawhti pa a ruak cu pyusawhti phu nih an char, tiah theih a si. A luancia September thla lio zong ah khuami harnak petu pyusawhti hruaitu Kamu Kulay zong Palaw KPDF nih an rak thah cang. SAC nih nawlngeihnak an lak hnu in KNU-Palaw KPDF hmunram chungah rithaisii cawk zuarnak le a hmangtu an tam caah rithaisii zuar le SAC ralkap thilchuak zuar lo ding in an kham, tiah theih a si.

India, Mizoram ramkulh ah Rupee’s sing 100 hrawng man bingrang an tlaih than!! India, Mizoram ramkulh ah, rithaisi dohnak biatak tein an kalpi cuahmah ko nain nichiar ti awkin palik nih hmunkip ah rithaisi cu an tlaih i, October 1 zong ah, Rupee’s sing 100 renglo man bingrang an tlaih than tiah theih a si.

Mizoram, Aizawl khua hmun pakhat ah, Manipur khuami pakhat le Myanmar mi pakhat sinin 148.36 gram a ritmi bingrang, rupee’s sing 124 man kan tlaih tiah Mizoram palik nih an thanh. Cu bingrang he an tlaihmi pahnih hna cu Manipur, Newlandka khua ah a ummi, Thang Za Mun le Chin ramkulh, Tonzang peng, Dar Khaine khua ah a ummi Lian Lam Khu hna an si. Cu hna pahnih cu, Mizoram palik nih a herh ningin hma an lak hna lai tiah theih a si.

Thih Hlan Lo Thongtla Ding A Si Ko Nain Thonginn In A Chuakmi Misual Pa Myat Htun Meithal Kah A Tong, Mandalay ramṭhen, Kyaukse(ကျောက်ဆည်) peng Than Chet Kone(သံချပ်ကုန်း) khua ah mi thahnak case 2 in thih hlan lo thongthlak dingah biaceih zung nih bia an khiahpiakmi misual pa Myat Htun cu, thonginn in a chuah hnu SAC kuttang pyusawhti phu i rian a ṭuan lioah meithal in kah a tong, tiah tualchung mi hna nih a chim.

Nizaan October 2 zing sml 11:00 ah misual pa Myat Htun cu min hngalh lomi hriamtlai phu nih meithal zun 6 in an kah caah Mandalay sii-inn ah an tlikpi, tiah theih a si. “Anih hi thih hlan lo thong tla ding a si ko nain SAC nih thonginn in a chuah ṭhan. Ralkap he i bawm in khuami hna cu an hrem hna. Tangka in lente i celhnak(Gambling) le zu dinnak hmun ah ralkap he i bawm in ngunkhuai khawltu a si,” tiah tualchung mi nih a chim. Misual pa Myat Htun cu Meithal zun 6 in kah a ton caah Mandalay sii-inn ah an kalpi i a thih le thih lo theihfian a si rih lo.

Monywa Peng Nyaung Phyo Pin Sakhan Cu PDF Nih An Kah Caah SAC Ralkap Chungtel 10 An Thah Hna, Sagaing ramṭhen, Monywa peng Nyaung Phyo Pin(ညောင်ဖြူပင်) palik sakhan cu PDF ṭangṭi phu hna nih nizaan October 2 zing sml 2:00 hrawng ah kan kah i SAC ralkap chungtel 10 an thi, 5 hliamhma an pu tiah Myinchan Pengkomh Battalion 3 in ṭuanvo ngeitu nih a chim.

Sagaing le Myinchan PDF hna i bawm in Nyaung Phyo Pin palik sakhan cu kan kah i ruah a sur tuk caah an sakhan cu kan la kho lo, tiah a chim chap. “An sakhan cu ṭha tuk in an sakmi a si pinah kan kah hna lioah ruah a sur tuk i an sakhan cu kan la kho lo. Cu kahdohnak ah SAC ralkap chungtel 10 an thi, a hnu ah 2 an thi chap, tiin thawng kan theih” tiah Myinchan pengkomh Battalion 3 in ṭuanvo ngeitu nih cun a chim.

Nyaung Phyo Pin palik sakhan kahdohnak ah Myinchan pengkomh Battalion 3, Myalatt PDF Taungthar, Seven People Defense Force ၊ Scorpions people defense Force၊ Sagaing ramṭhen Battalion 1၊ MSPDF ၊ Natogyi Regional Defense Force hna i bawm in an kah hna, tiah theih a si.

Be the first to comment

Leave a Reply

Your email address will not be published.


*