SAC Ralhrang Kahdohnak Thawngpangfonh Tam Taktak Thah An Si,KIA Nih An Sakhan An Laak Piak Chap Hna, Hi Thanwgpang Hi An Pu Min Aung Hlaing Nih Rak Thei Hrimhrim Seh
=======================================
Kalay Peng Thlanglei Kahdohnak Ah SAC Ralkap 10 Hrawng An Thi: Ralkap thazang 200 leng si mi SAC ralkap hna cu Kalay Technological University in Kalay peng thlanglei i rallam an sial lio ah PDF Kalay Battalion 1, 2, 5, 6, CNDF, CDF (KKG) le RKDF phunfonh hna nih Tharyarkone (သာယာကုန်) khua pawng ah tuzing suimilam 6 hrawng in an kah hna i zaanlei suimilam 3 tiang hrawng kahdohnak a fak, tiah People Defense Force Kalay nih cathanh an chuah.
Kahdohnak ah cun SAC Ralkap 10 hrawng an thi i, hliamhma tuarmi zong an tam, tiah theih a si. SAC Ralkap hna nih Tharyarkone khua lei hoih in hriamngan dongcat lo in an kah i hliamhma pu mi hna cu Kalay khuachung ah an luhpi hna, tiah theih a si. Kahdohnak ah cun PDF lei cu hliamtuar um loin hnu an tolh kho, tiah theih a si.
SAC Ralkap hna cu zaanlei suimilam 2 hrawng ah Tharyarkone khua ah an lut i sualnak ngei lo minung 10 an tlaih hna, pakhat cu an thah i a dang 9 cu ralphaw ah an kalpi hna tiah theih a si. Kahdohnak a fahnak hmun Kalay-Gangaw lampi cu zulh rih lo ding in an cathanh ah cun an langhter chih.
Monywa, Ye Oo Le Yesagyo Kahdohnak Ah SAC Ralkap 35 An Thi!: Sagaing ramṭhen, Monywa, Ye Oo le Yesagyo kahdohnak ah SAC ralkap a thimi an tam, tiah PDF nih cathanh an chuah. Sagaing ramṭhen, Ye Oo peng Ṭinṭingyan khua cu, July 28 in SAC ralkap 140 hrawng nih an khangh i, DRPA, FRF, Shwebo pengkomh Battalion 12, le PDF ṭangṭi phu hna nih July 28 in 30 tiang ah SAC ralkap 25 kan thah hna, hliamhma pumi zong an tam, tiah Dictatorship Revolution People’s Army(DRPA) nih cathanh an chuah.
Magwe ramṭhen, Yesagyo peng ah August 1 zing sml 11:30 hrawng ah Kyaukhlekha(ကျောက်လှေခါး) khua pawng um, Gold Power datsii dawr hmai ah bomb deu le bomb tak kan hmanh, tiah PDF nih an langhter. PDF nih an hmanhmi bomb deu cu SAC ralkap nih meithal in voi 50 hrawng an kah hnu, an kir lei ah bomb ṭhami nih an puahhnawh hna i ralkap 3 an thi, tiah theih a si.
Cu kahdohnak ah cun Yesagyo Revolution Group-YRG, Urban Underground Revolution Force -UURF / Shwe Nyar Myae – PDF le Zarmani Blood Guerilla Army – Myaing hna i bawm in an kah hna, tiah theih a si. Cupinah August 1 ah Sagaing ramṭhen Monywa peng Kanpia khua le Teykyikone(တဲကြီးကုန်း) khua karlak ah kahdohnak a chuak i, SAC ralkap cu bomb in kan puahhnawh hna caah ralkap 10 leng an thi, tiah PDF nih an langhter.
Kachin Ramkulh, Waimaw Peng SAC Ralkap Sakhan Pakhat Cu KIA Nih An Lak!: Kachin ramkulh, Waimaw (ဝိုင်းမော်) peng Inwamyan(အင်ဝမ်းယန်) SAC ralkap sakhan pakhat cu kan kah i, kan khanghtak, tiah KIA nih an thanh. Nihin August 2, zinglei ah SAC ralkap kuttang um pyi-tuh-sit le SAC ralkap phufonh an umnak sakhan cu KIA nih an kah hna, tiah tualchung media nih an langhter.
KIA brigade 5, battalion 3 hmunram Inwamyan(အင်ဝမ်းယန်) khua pawng i SAC ralkap sakhan cu KIA nih kan kah i sakhan zong kan lak leng ah an hriamthil cheukhat zong kan lakpiak hna. Cu sakhan cu kan khangh i kan hrawh dih, tiah KIA lei nih an thanh ve. Kahdohnak ah hliamhma tuarmi le nunnak a liam mi an um le um lo cu theih a si lo. Chunhnu ah Waimaw(ဝိုင်းမော်) um SAC ralkap khah-lah-yiah 58 nih minung thazaang 50 hrawng an chap ṭhan caah kaphnih kar kahdohnak a chuak kho ṭhan, tiah KIA lei nih an thanh.
Mataya Kahdohnak Ah SAC Ralkap 10 An Thi, Gangaw Ah Mingiatu Palik Nu Pakhat PDF Nih An Thah: Mandalay ramṭhen, Mataya(မတ်တရာ) peng ah July 27 in August 1 tiang kahdohnak a chuak i, SAC ralkap 10 hrawng an thi, tiah Walet PDF sinin theih a si. July 27 in Mataya peng Yelaykywin(ရေလယ်ကျွန်း) khua ah a lutmi SAC ralkap pawl cu Pah Kah Pha ṭangṭi phu hna nih an kah hna. July 27 in August 1 tiang an i kap i SAC ralkap 10 an thih lengah 30 hrawng hliamhma an pu, tiah theih a si.
Cu kahdohnak ah cun Walet peng PDF, Shwebo pengkomh No.18 Battalion le No. 15, 17 Battalion, Shwebo Battalion 5(ABC), Mataya Pah Kah Phah le a dang hriamtlai phu hna i bawm in an kah hna, tiah theih a si. Magwe ramṭhen, Gangaw palik camp in palik nu pakhat Khine Zar Kyi telh in mi pathum cu July 31 ah Yaw Defense Force(YDF) nih kan tlaih hna. Palik nu cu a zam caah kan kah thah. A dang pahnih cu ralkap upadi ning in dan kan tat hna lai, tiah YDF nih cathanh an chuah.
July 30 zanlei sml 6:30 hrawng ah Tanintharyi ramṭhen, Yephyo(ရေဖြူ) peng ah SAC ralkap motor cu PDF nih bomb an puahhnawh hna, tiah theih a si. Cu kahdohnak ah SAC ralkap motor a rawkmi a um i, ralkap 7 hliamhma an pu. A thimi le hliamtuarmi an um le um lo kan fehter kho lo, tiah PDF nih an langhter.
SAC Ralkap Dirpi Lamzawhtu Hna Humhimnak Lakpiaktu Ralkap Cu Bomb Puah An Ton Caah 4 An Thi: Magwe ramṭhen, Myaing peng August 1 zinglei ah SAC ralkap dirpi in lam zawhtu pawl humhimnak lakpiaktu ralkap cu bomb puahhnawh an tong, tiah theih a si. SAC ralkap pawl cu Myaing in meng khat le cheu hrawng aa hlatnak Uyinma(ဥယာဥ်မ) khua ah, ralkap dirpi in lamzawhtu humhimnak an lakpiak hna lio ah, bomb in kan puahhnawh hna, tiah PDF in chungtel Bo Let Ya nih a chim.
“Zing sml 9:45 hrawng ah Myaing in Mandalay kalnak lam lei ah kan puahhnawh hna. Ralkap 20 leng an si. Lamzawhtu an phanh hlan ah Myaing peng khuate hna cu an kulh dih. Cu ah cun bomb kan puahhnawh hna hi a si. Cu kahdohnak ah SAC ralkap 4 an thi i, 3 hliamhma an pu. Pakhat cu a mitcaw,” tiah a chimchap.
A luancia July 31 lio ah Myaing peng chung ah sentari cawngh ding ah a kalmi PDF ralkap pahnih cu SAC ralkap he an i kah caah an pahnih in an nunnak a rak liam. SAC lei in ralkap pahnih an thi ve. Oakpho Peng Bomb Puahnak Ah SAC Ralkap 3 An Thi, Tam Ngai Hliamhma An Pu!: Pago ramṭhen, Oakpho(အုတ်ဖို) peng Pago Roma aa pehnak(ramri) ah hmunhma humhimnak tuah ding in a kalmi SAC ralkap motor cu nizan August 1 ah PDF nih bomb an puahhnawh caah ralkap 3 an thi i, hliamhma pu mi zong an tam, tiah theih a si.
Oakpho peng ni chuahlei um, Kantni khua ah rallam a sialmi SAC ralkap motor 3 cu nizan chun sml 1:30 hrawng ah bomb puahhnawh an tong, tiah theih a si. “An motor cu cung lei ah aa hlorh dih. SAC ralbawi pakhat le ralkap dang 2 an thi i, hliamhma pu mi zong an tam. A thimi cu mizaw phorhnak motor nih a lak hna,” tiah Tharyarwaddy PDF in ṭuanvo ngeitu nih a chim.
SAC ralkap hna cu humhma humhimnak a tuahmi an si i, Innma ah umhmun khuarmi Ṭatma 66 kuttang Oakpho peng Kha La Ya 6 Battalion in an si, tiah theih a si. Cu kahdohnak ah cun Tharyarwaddy PDF Battalion 3802, Company 4 le Kyupinkauk(ကြို့ပင်ကောက်) Hero Guerrilla phu hna i bawm in an kah hna, tiah theih a si. Battalion 3802, Company 4 phu nih, SAC ralkap kuttang rianṭuantu Tharyarwaddy pengkomh Letpaṭan peng Electric zung zong July 30 zing sml 3:00 hrawng ah bomb puah in ralrinnak an rak pek cang hna.
Monywa Laṭi (လယ်တီ) Sang Um Mi Mytel Zung Cu PDF Nih An Luhhnawh I, Wifi Seh Pawl An Khangh!: Sagaing ramṭhen Monywa khua Laṭi sang ah SAC Ralkap nih a thli in an on mi Mytel zung cu nihin August ni 2 zaanlei suimilam 2 hrawng ah tualchung hriamtlai phu nih luhhnawh in an hrawhpiak hna, tiah Monywa People Defense Fotce (MPDF) sin in kan theih.
Mytel wifi seh 100 leng, Routers seh 4, line Cutter seh 4, laptop 4 le rian he aa pehtlaimi cauk pawl hna cu an lak i seh thilri pawl hna zong mei in kan khangh, tiah MPDF nih an langhter. Mytel zung hrawhnak ah hin Monywa People Defense Force (MPDF) Monywa pengkomh Battalion 1, Monywa tualchung ralvengtu phu hna an i fonh, tiah theih a si.
Leave a Reply