Nihin Thawngpang Kan Theih Mi Chungin Thawngpang Bik Pawl Fonh! (September ni 29, Thawngpang a donghnak biak kan theih mi ah Kawlram pumpi chungah SAC ralhrang chungtel 82 an thi)
=========================
Mandalay ramthen, Thabeikkyin peng, phetshi (ဖက်ရှည်) khua pawngah rallam a sialmi SAC ralkap hna cu, tualchung hriamtlaiphu nih bomb an puahhnawh hna i, SAC ralkap 34 an thi tiah theih a si. September 26 zinglei ah SAC ralkap 70 hrawng cu, bomb lung 8 in voikhat bomb puah ah lung 6 in voihnih bomb kan puahhnawh hna i, SAC ralkap 34 an thi 17 hliam an tuar tiah Pyin Oo Lwin pengkomh, People’s Defense Force(Bu Lin Yung nih cathanh an chuah.
Cu SAC ralkap hna cu, Phetshi(ဖက်ရှည်) khualuh/chuahnak ah umhmun an khuar i, khuami hna cu nan inn kan khangh dih lai tiah an thinphaih hna tiah an cathanh an cun an langhter. Mandalay ramṭhen Chanayethazan peng ah nihin september ni 28 zingah SAC sin thawngpetu tiah minthang mi pahnih cu kah an tong tiah tualchungmi hna sin in kan theih.
Kah a tongmi SAC sin thawngpetu pahnih hna cu Mae Kyi le Tin Htun Aung an si, lamkam i bia an i ruah lio ah kah an ton hi a si. Mae Kyi cu a ṭangah kuan nih a khen hleiah Ayeyawady tiva ah a zuang i a thi, Tin Htun Aung tu cu a ke ah hliam a tuar tiah tualchungmi hna nih cun an chim. A thimi Mae Kyi ruak cu tualchungmi bawmchantuphu hna nih an fimtawl tiah theih a si.
Magway ramṭhen, Gangaw pengkomh battalion 2/4/10 sin ah pehtlaihnak tuahin SAC ralkap kuttang um palik pakhat nih a hriamtling he CDM a tuah tiah PDF-Htilin nih nihin September 28 zaanlei ah cathanh an chuah. CMD a tuahtu palik cu Meiktila battalion 35 in a si i BA 64 G4 pakhat, kuanbawm 2, kuan zun 248, bayonet(လှံစွပ်) pakhat i put in CDM cawlcanghnak a tuah.
Mipi lei ah ṭangin a hriamtling he CDM a tuahtu palik cu pengkomh battaliom 2/4/10 nih sing 60( 6,000,000mmk )laksawng an pek tiah theih a si. SAC ralkap uknak ka duhlo caah mipi lei ah ṭang in ka dir, mah unau bantukin ka bawmhram ko uh tiah CDM a tuahtu palik nih cun a chim.
Kayin ramkulh, Kyarinn Saitkyi(ကြာအင်းဆိပ်ကြီး) peng SAC ralkap khah-lah-yiah 283 battalion Hpayataung(ဘုရားတောင်) sakhan cu KNLA phufonh nih nihin September 28 ah an lakkhawh. SAC ralkap duh-ṭat-yin-hmu telh in minung 11 an thi, hriam 13 kan lakkhawh tiah KNU nih an thanh.
“Hpayataung(ဘုရားတောင်) sakhan kanlak ah hin, hriam 13 kan lak chih, SAC ralkap lei duh-ṭat-yin-hmu telh in minung 11 an thi, atu hi vanlawng in an ra i kan cung ah an i hel len ko” tiah KNLA nih an chim.
Lakmi hriamthil hna cu seh meithal, MA meithal an si. Kahdohnak suimilam cheu lawng an rau, zinglei suimilam 5:30 in SAC ralkap sakhan cu kahdoh an si i zinglei suimilam 6:00 ah sakhan ning in an lakkhawh. Hmunhma thianhhlimhnak an tuah hnu suimilam 10:30 ah an i lim tiah theih a si. Cun KNU brigade 6 Kyarinn Saitkyi(ကြာအင်းဆိပ်ကြီး) peng Azin khua SAC ralkap sakhan cu nizaan September 27 zaanlei ah KNLA nih kahdoh in an lak tiah theih a si.
Mandalay ramṭhen, Myinchan peng khuate 3 ah umhmun khuarmi SAC ralkap cu, drone in bomb kan thlak hna caah SAC ralkap le pyusawhti 4 an thi, tiah 27 Revolution Force nih cathanh an chuah. September 25 ah Nyaungtu(ညောင်တို) khua sii khan le khuabawi zungah umhmun khuarmi SAC ralkap, palik le pyusawhti pawl cu drone in bomb kan thlak hna caah ralkap le pyusawhti 4 an thi, 2 hliamhma an pu, tiah 27 Revolution Force nih an langhter.
Cu ni zaanlei sml 4:00 hrawng ah Sinchaung khua ah umhmun khuarmi SAC ralkap cu PDF drone in bomb an thlak caah SAC ralkap 1 a thi. Hriamngan le hriamhme an kah ko hna nain PDF ralkap a thimi le aa hliammi an um lo, tiah theih a si. Myinchan peng Kyi khua um SAC ralkap le pyusawhti pawl drone in bomb thlaknak ah ralkap 1 a thi i 5 hliahma an pu. Ngaungtu khua bomb thlaknak ah ralkap 2 an thi, tiah 27 Revolution Force nih an langhter.
Cu kahdohnak ah Myinchan pengkomh Battalion No.(1) 27 Revolution Force le Myaung Fighter People Defence Force hna i bawm in an doh hna. SAC ralkap, palik le pyusawhti an umnak he aa hlatnak ah um ding in mizapi cu 27 Revolution Force nih ralrin an pek hna, tiah theih a si. Sagaing ramṭhen, Walet peng Ywathakyi(ရွာသာကြီး) khua pawng lamtonnak ah khualtlawng le mi chokvai ngunkhuai khawltu SAC ralkap pawl cu, September 26 ah Minaga Guerrilla phu nih drone in bomb an thlak hna caah SAC ralkap 3 an thi, tiah theih a si.
SAC ralkap nih Ywathakyi khua cu hriamngan in an kah pinah Shwe Bo-Sagaing lam le Ayartaw-Walet motor lamtonnak ah khualtlawng mi hna cu ngunkhuai an khawlh hna i an hrocer hna, tiah cathanh an chuah. Cu bantukin Tannitharyi ramṭhen Dawei khua in Myeik lei ah a kalmi SAC ralbawi an i citmi motor cu Palaw peng Kade(ကဒဲ) khua le Tinkantaw(သင်္ကန်းတော) khua karah PPDF le PRDF hna i bawm in bomb an puahhnawh caah SAC ralkap a thimi le aa hliammi an um, tiah theih a si.
SAC ralbawi nih an i citmi motor cu Palaw peng Khah Lah Yah 285 Battalion sakhan ah an lut kal i, zaanlei sml 2:00 hrawng an kir lei ah bomb an puahhnawh hi a si. Cu bomb puahhnawhnak ah a thimi SAC ralkap cu mizaw phorhnak motor 4 nih a lak hna.
Cu ṭhiamṭhiam in Dawei- Tayetchaung lam cung um SAC ralkap check gate zong PDF nih drone in bomb an thlak, tiah theih a si. Tayetchaung peng Tayet Hnakhuah(သရက်နှစ်ခွ) le Panpin khua karah SAC ralkap pawl cu PDF nih drone in bomb an thlak hnawh hna caah SAC ralkap nih hriamngan le hriamhme he an kah hna. Cu kahdohnak ah a thimi le aa hliammi fiang in theih a si lo.
Ayeyarwaddy ramṭhen, Pyapon peng palik 3 le palik nupi pakhat cu Pyapon PDF he pehtlaihnak nan ngei tiah an puh hna caah SAC ralkap nih an tlaih hna tiah theih a si.
Pyapon peng palik ṭat-kyat-kyi Htun Htun Naing, Min Htat Paing, Htat Lin le a nupi Ma Gaeti Win cu September 26 ah tlaih an tong tiah tualchung media hna nih an langhter.
“A luancia August thla ah Yangon ah tlaihkhih a tongmi Pyapon khuami San Lin cu PDF he pehtlaihnak na tuah tiah an puh caah tlaih a rak tongbal cang” tiah an langhter.
” A tutiang ahcun an 4 ning in Kyaitlat Myomah(ကျိုက်လတ်မြို့မ) palik sakhan ah an hren hna i, sah-yiah-phah nih checkhlatnak an tuah hna” tiah palik phu hna he neihniam in ummi pakhat nih a chim. Crd-The Chin Post
Relchap, Myanmar ramchung ah nikhat chungah minung 350 leng nih Covid zawtnak an i chawnh, Myanmar ramchung ah Covid zawtnak i chawnhning a karhṭhan i nizaan September 27 ni khat chung ah Covid-19 zawtnak aa chawnhmi minung 356 an si tiah SAC ralkap kuttang um ngandamnak vuanci zung nih cathanh an chuah. Ngandamnak zung nih September 27, zaan suimilam 8:00 tiang cathanh an chuahning ah minung 12903 checkhlatnak an tuah hna i, cu chungah minung 356 sinin Covid-19 zawtnak an hmuh caah zatuak 2.76 nih cu zawtnak an ngei.
A tu ah Covid-19 zawtnak a ngei tiah langhtermi zat hi SAC ralkap kuttang um siizung, sii-khan ah aa zohtermi hna chungin hmuhmi a si caah a tu langhtermi nak in a lengah zawtnak ngeimi an tam deuh kho tiah mibawm chantu phu hna le ngandamnak lei rianṭuantu hna nih an chim.
Yangon, Dawpone peng tualchungmi pakhat nih “sangchung sii khan ah aa zohtermi mizaw an karh ngai, cu mizaw hna chungin a tam deuh cu Covid-19 zawtnak an si lai tiah ka zumh, an tak a sa, an khuh, a taksa fak mi an tam Covid-19 zawtnak check ah cun cu zawtnak a ngeimi an tam lai” tiah a chim. SAC ralkap kuttang um ngandamnak lei vunci zung nih mibupi umnak siangin le training kainak, zung cheukhat ah minung tampi zawtnak i chawnhnak a cang tiah September ni 15 ah media ah an rak chim.
Chin ramkulh chung ah, SAC nih onmi sianginn ah a kaimi siangakchia hna i nichiar an kaizat cazin cu SAC nih an lak!! Chin ramkulh chungah, SAC nih onmi sianginn ah a kaimi siangakchia hna i an min cazin le nichiar an kaizat cazin cu khuachung um SAC ralkap nih an lak tiah theih a si.
Nizaan September 27 thokin, Chin ramkulh, Matupi khua chung ah, cu sianginn kaimi min cazin cu an lak i, class chungah siangakchia zeizat dah um? tuni minung zeizat dah a kai kho? minung zeizatdah an bau? zeiruang ah dah an bau? ti mi pawl tiangin a kan hal dih.
Nichiar zongin cu cazin cu an kan lak te khawh men tiah siangcachim saya pakhat nih a chim.
Cu bantuk thiam in, Chin ramkulh Falam khua chung zongah, siangakchia hna nichiar an kaizat cazin cu, Tat-Yin-Hmu sinah an pek tawn tiah theih a si.
Falam khuachung lawng si lo, SAC nih sianginn an on nak hmun poah ah cu cazin cu an lak i, a baumi an um a si ah cun zeiruangah dah an bau tiin cachimtu saya/mah te cu an kan hal. Nichiar ti awkin, cu cazin cu an lak caah, cheukhat nu le pa cu zeiruangah dah si hnga tiah thinphang in an um ko tiah siangcachim sayamah pakhat nih a chim.
Chin ramkulh chungah, tualchung hriamtlaiphu(CDF) le CDM saya/mah hna i bawmin an onmi sianginn ah a kaimi siangakchia an tam caah, SAC nih an onmi sianginn ah a kaimi siangakchia hi mi tlawmte lawng an si tiah theih a si.
Kawlram Ramri Kong He Pehtlaiin Bangladesh Nih Tuluk He I Bawmin Kan Kalpi Lai, Kawlram ramri kongkau he pehtlaiin Bangladesh ram nih Tuluk ram he i bawmin kan kalpi lai tiah Bangladesh lei nih thawng an thanh tiah theih a si.
Kawlram cungah Tuluk hipkhawhnak a um ko caah ramri hrawnghrang i a cangmi thil he pehtlaiin Tuluk bawmhnak laak in kalpi an timh hi a si tiah theih a si. Ramri kongkau ah hin Bangladesh hi a lungre a theih pah caah Bangladesh Ambassador nih Tuluk cozah sinah a tubantukin bawmh a hal hi a si. SAC ralkap le AA hriamtlai kar lakah kahdohnak a zual chin lengmang caah ramri kongkau ah Bangladesh nih a tubantukin a kalpi hi a si tiah theih a si.
SAC cozah tangum remdaihnak phu le UWSP, NDAA, SSPP hriamtlaiphu tonnak an ngei, SAC cozah tangum ramdaihnak phu le WA hriamtlai UWSP, NDAA le Shan hriamtlai SSPP hna cu Naypyidaw zung pakhat ah September 27 ni ah tonnak an ngei tiah theih a si. Tonnak hmun ahcun SAC cozah tangum ramdaihnak phu hruaitu Bochoh Ya Pyae le UWSP in vice Chairman an i tel I biachimnak an ngei hna tiah theih a si.
SAC cozah phu leinih an duhmi le an duh ningin thil kalpi ding kong an chim hnu ah UWSP, NDAA le SSPP hriamtlai aiawh a kaimi hna nih an duh mi chimnak an ngei, cun ceihhmainak tlawmpal an ngei i a nikhatnak meeting an dih ter tiah theih a si. A nihnihnak tonnak cu September 28 ni (nihin) ah an tuah than lai tiah theih a si. Crd=The Chin Post
Leave a Reply