USDP Hruaitu Hna Phu Hnih Ah An I Cheu, MAH Ṭanhtu Phu An Dirhmun A Ṭha Deuh. U Than Htay Sual An Phawt!
==========================
Tuhrawng hi USDP Central Working Committee upa cheukhat cu an rian in an i din lai ti thawng a leng ngai. Party rian in dinh aa timmi hna cu August thla donghlei in party meeting le cawlcanghnak ah an i tel ti lo tiah theih a si. Party Vice Chairman pathum lakah aa telmi U Hlah Tun le U Myat Hein cu an rian in an i din lai, cun General Secretary U Thet Naing Win zong aa din lai. Kan hnu June thla thok i Central Working Committee meeting thok khan party hruaitu hna chungah lungrual lonak a chuak. Atu i party hruaitu hna chungah SAC ralbawizik MAH nih ramhun (president) ṭuan seh ti a duhmi le a duh lomi tiin phu hnih an i ṭhen.
Dirhmun ṭha le sinak sang a bawhmi an um tik paoh ah lungrual lonak a chuak tawn. Tutan USDP hruaitu hna an i ṭhennak zong hi 2023 thimnak ah USDP nih teinak an hmuh ding kha an zumh. USDP nih teinak an hmuh i cozah an ser tikah dirhmun ṭha le sinak sang co an duh cio caah an buainak hi a si. Kum 2023 thimnak ah NLD cu an i tel ding zumh a um lo. Cucaah USDP nih 2010 lio bantukin teinak kan hmuh ṭhan lai tiah an zumh.
Cu pinah 2023 thimnak ah PR an hman lai. PR thimning ah USDP nih ṭhutdan zatuak 25% cung hmuh khawh ding an i ruah. Cucu thim loin a um ciami ralkap ṭhutdan 25% he kan fonh lai i cozah kan ser lai ti hi USDP hruaitu hna saduhthah cu a si. Cucaah hruaitu cheukhat nih dirhmun ṭha an co khawh nakhnga atu in chunmang an manh cang.
Cu chunmang nih cun leiṭang ser in i ṭhennak a hrin. Kum 2023 ah atu i USDP Chairman U Than Htay hi ramhun a si ahcun amah ṭanhtu hna cu ramkomh vuanci, ramṭhen le ramkulh Chief Minister le dirhmun ṭhaṭha ah a chiah hna lai. Cu bantukin MAH hi ramhun a si ahcun amah ṭanhtu hna cu an saduhthah a tlinter ve lai.
Kum 2015 thimnak lio zongah khan atu bantukin an rak buai cang. USDP Chairman a rak simi U Thein Sein cu 2011 ah ramhun a si caah party chairman in aa din i Thura Shwe Mann cu party chairman a hung si. Kum 2015 a hung phak tikah cun ramhun hi term khat lawng ka ṭuan lai tiah a chimtu Thein Sein nih ramhun peh rih a duhnak a chim ṭhan.
Amah Thein Sein ṭanhtu ramkomh vuanci cheukhat, USDP hruaitu cheukhat le Myanmar Peace Center (MPC) hruaitu hna nih peh rih dingin an forhfial lengmang fawn. A ruang cu Thein Sein nih ramhun a peh lawngah an dirhmun an fek lai ti an theih. Party Chairman Thura Shwe Mann zong nih ramhun ṭuan a duhnak a chim ve. Hi hna pahnih ramhun si duhnak ruangah buainak kha aa thokmi a si.
Thimnak ah Thein Sein ṭanhtu phu nih hlutdaw ah ṭhutdan tam deuh hmu hna sehlaw Thein Sein nih ramhun a peh lai i Shwe Mann ṭanhtu lei nih ṭhutdan tam deuh hmu hna sehlaw Thura Shwe Mann nih ramhun a ṭuan ve ko hnga. Asinain thimnak tuah hlan, August 12, 2015 ah ralkap bawmhnak in Thura Shwe Mann cu party chairman sinak in an ṭhumh. Cu hnuah Thein Sein cozah tang i ramkomh vuanci cheukhat hna cu rian in an dinhter hna, cu hna cu a thaizing ah USDP hruaitu upa ah an chiah hna.
Cu thil a can hnu kum 7 a rauh ah USDP hruaitu hna i ṭhennak a chuak ṭhan. Atu i party chairman a simi U Than Htay hi a rian in i dinh dingah hlutdaw palai hlun a simi U Maung Myint (Minkin) le U Hlah Swe (Bo Latt) nih fianghlang tein an chimrel.
A fawinak cun tutan hi USDP Chairman U Than Htay nih ramhun ṭuan seh ti a duhmi le SAC ralbawizik MAH nih ramhun ṭuan seh ti a duhmi hna karlak buainak a si. Party chairman U Than Htay santlaihlo ruangah 2020 thimnak ah USDP kan sung i ralkap nih nawlngeihnak an lakmi a si tiah MAH ṭanhtu nih an soisel. Khatlei phu nih cun MAH nih ramhun ṭuan a duh taktak ahcun 2008 phunghrampi ningin ralkap in a chuak lai i misawhsawh sinak in ramkhel tuah sehlaw thimnak ah lut seh ti an duh ve.
Atu i an buainak, phu khat le phu khat an i zuamcawhnak kongah biakhiaktu ding cu a rauh hlanah tuah dingmi party conference a si. Cu conference ah U Than Htay ṭanhtu lei kha Central Working Committee ah tam deuh an i tel ahcun U Than Htay nih party chairman a peh khawh lai. Cu bantukin MAH ṭanhtu lei an tam deuh ahcun MAH duhmi paoh a tuahtu nih party chairman a ṭuan lai tinak a si.
Cun U Than Htay te phu nih party chairman le a biapimi dirhmun an tlaih khawh ahcun 2023 thimnak ah anmah chungin thimnak ah aa cuhmi an tam lai. Cu hna nih cun hlutdaw ah ramhun an thim lai i ramhun zong nih amah ṭanhtu hna chungin cozah a ser lai. MAH ṭanhtu lei nih party chairman le a biapimi dirhmun an tlaih khawh ahcun 2023 thimnak ah anmah chungin aa cuhmi an tam lai i cu hna nih cun hlutdaw ah MAH cu ramhun ah an thim lai.
Atu ahhin SAC nih party hruaitu ah i tel hna seh ti an duhmi min cazin zong USDP chairman sinah a phan cang ti a si. Atu tiangah cun USDP hruaitu hna chungah MAH ṭanhtu lei an ṭhawng deuh. Atu ningin a kal ahcun MAH nih Myanmar ramhun (president) cu a ṭuan te ko lai.
Falam Pengchung Leikuang Facang Lakah Rungrul An Tlak Caah Facang Kung Tam Ngai An Thi, Chin ramkulh, Falam pengchung Leikuang lak ah cinthlakmi hna cu rungrul nih a tlak hna caah cinthlak kung an bon lo, tiah leirian ṭuantu hna nih an chim. Facang kung hna cu rungrul nih a ei hna caah, an rau i an thi, tiah theih a si.
Cheukhat Lei ah cun facang kung rungrul nih a tlakmi an tam caah pung 500 chuak ding Lei kuang ah pung 100 hrawnglawng an chuak lai, tiah zumh a si. Rungrul thattu sii an vorh ko nain a kham hlei lo tiah an chim. Rungrul nih an tlaknak hmun tam deuh cu India-Myanmar ramri Ṭio tiva kam lei facang kung an si hna, tiah theih a si.
Ramdang Ah Zammi Sri Lanka President Gotabaya Rajapaksa Cu Sri Lanka ah a Kir Ṭhan Cang! Rampi chawlehnak a tlak tuk ruang ah ram mipi nih a umnak inn tiang an rak luhhnawh hnu in ramleng ah a zammi Sri Lanka President hlun Gotabaya Rajapaksa cu zarh 7 chung ramdang ah a zam hnu in a rak kir ṭhan, tiah theih a si. Gotabaya Rajapaksa cu vanlawng tual ah Minister hna le Ramkhel lei hruaitu hna nih an rak don, cu ruang ah a dohkalhtu Party hna nih cun hi tluk ram chia a kan sertu cu an upat ṭhiam ko, tiah an mawh chiat hna.
Gotabaya Rajapaksa cu a zamnak in Sri Lanka a rak tlun hnu in cozah nih amah vengtu ding ah Special Police a chiahpiak caah dohkalhtu party nih PM cu ram a chiattertu chungkhar cu humhimnak nan lakpiak hna, tiah an mawhchiat. Sinain Sri Lanka Phunghrampi ah President hlun pawl cu um kalnak mawṭaw le anmah vengtu ding ah cozah nih palik chiahpiak ding in aa tial.
Gotabaya Rajapaksa cu President sinak in a chuah caah a President nih a hmuh ding mi covo pawl cu a hmu kho ti lo, Cun, 2009 lio ah Media Editor minthang Lasanthawik Kramatonga thahnak kong le sualnak a tuahmi vialte ruang ah tlaih ding in Cozah kan nawr lai, tiah Nuhrin covo a tawlreltu hna nih cun an chim.
Sri Lanka Journalist Association in chimnak nawlngeitu pakhat zong nih a rak kirmi cu ka lungtling tuk a rak tuahmi sualnak a in ve caan a phan cang, tiah a chim ve.
Leave a Reply