Tanintharyi Ramṭhen, Myeik Thonginn in Ramkhel Lei Thongtla 19 Cu Luatnak An Hmu!
===================================
Tanintharyi ramṭhen, Myeik(မြိတ်) thonginn in ramkhel lei thongtla mi 19 nih nihin September 1 ah luatnak an hmuh, tiah ramkhel lei thongtla hna he naihniam in a ummi pakhat nih RFA ah a chim. Luatnak a hmumi hna cu pa 18 le nu pakhat an si. A luancia 2021, February thla lamzawhnak ah Myeik khuachung suimilam tung pawng le hmun dangdang ah tlaih a tongmi an si hna.
Tlaihkhih a tongmi hna hi thong an tlak lio ah sih-ni auhnak nawl pek an si nain a zalongmi cawlcanghnak a si lo. Thonginn biaceih zung nih biakhiahnak tuahpiak in thong thlakmi an si. Luatnak a hmumi hna hi SAC ralkap nih uknak an lak duhlonak langhter in lamzawhnak ah aa telmi an si caah phungrelnak section 505(a), section 145 in tazacuai a tongmi an si..
Myeik(မြိတ်) thonginn ah a tlami ramkhel lei thongtla hna cu thinlung lei le takpum hremnak an tong, tiah cuka hmun thonginn ah a rak tla mi, luatnak a hmu cangmi pakhat nih a chim. Ramkhel lei thongtla bawmtu phu AAPP nih cathanh an chuah ning ah 2021, February 1 i SAC ralkap nih uknak an lak thawk in, August 31 tiang ah ramchung huap in tlaihkhih a tongmi dihlak hi 12,193 an si i, cu chung ah minung 3075 nih luatnak an hmuh i, minung 1427 thongthlak an tong, tiah an langhter.
Karenni Ramkulh NLD Cozah Minister Pathum Cu Thonginn In An Chuah Hna!, SAC ralkap nih nawlngeihnak an lak hnu in tlaih a tongmi Karenni ramkulh, NLD cazoh palai pathum cu nihin September 1 zing ah Hpa-An thonginn in an chuak, tiah theih a si.
Karenni ramkulh NLD cozah Minister of Immigration and population (လူဝင်မှုကြီးကြပ်ရေးနဲ့ ပြည်သူ့အင်အားဌာန ဝန်ကြီး) U Min Ko Khine (ဦးမင်းကိုခိုင်), Minister of Social Affairs (လူမှုရေး ဝန်ကြီး) U Bo Bo Way Maung (ဦးဘိုဘိုဝေမောင်) le Minister of Ethnic Affairs (ပအိုစ်းတိုင်းရင်းသားရေးရာ ဝန်ကြီး) U Khun Myo Thint (ဦးခွန်မျိုးတင့် ) hna cu ri an khiah piakmi hna caan a phak caah Hpa-An thong in thlah an si cang, tiah an Sihni a simi U Aung Thein (ဦးအောင်သိန်) nih a chim.
Relchih, SAC ralkap nih nawlngeihnak an lak, 2021 february thla i an rak tlaihmi minister pathum hna cu phungrelnak section 505(b) in thong an rak thlak hna i, Hpa-An thonginn ah thla 18 chung an um, tiah theih a si. Karenni ramkulh, Chief Minister Daw Nine Khin Htwe Myint (ဒေါ်နန်းခင်ထွေးမြင့်), kum 68 le Minister of Planning/Finance and Municipalities (စီမံ/ဘဏ္ဍာနဲ့ စည်ပင် ဝန်ကြီး) U Than Nine (သန်းနိုင်) kum 65 tu cu atu tiang an thlah rih hna lo, tiah theih a si.
Kalaymyo Ah ZRA Nih Tualchung Mi Pakhat An Tlaih! Sagaing ramṭhen, Kalaymyo Tahan le Hmunlai sang kar ah hmai aa hupmi ZRA phu chungtel hna nih tualchung mi pakhat cu meithal hmuahchih in nihin September 1, zaanlei suimilam 3:00 luan hrawng ah an tlaih i an kalpi, tiah tualchung mi nih an chim. YCW private sianginn nitlak lei J Crown Futsal pumpululh tual pawng ah, cycle a citmi pa pakhat cu civil thuam aa hrukmi minung 3 nih cycle cu kham in, an dirter hnu ah phone in midang an chawnh i private motor a raang pakhat nih a rak don hna, tiah theih a si.
Tualchung mi pakhat nih cun, “Zei caah dah ZRA a si tiah kan chim khawh ti si cun, motor khaltu hi Hmunlai sang um ZRA chungtel Hosana Mang a si. A voi khatnak ah cun bia ṭha tein an i ruah, cu hnu ah hmai aa hupmi minung 4 hrawng nih cun meithal a tawimi hmuahchih in motor chung ah an luhpi i an kalpi. Tlaih a tongmi cu mizei bantuk a si le hodah a si theih a si lo. Cu motor cu rang ngai in an khalh,” tiah a chim.
Salingyi Hmunram Chung Ah SAC Hmanhmi Bomb Lung 15 PDF Nih An Lak: Sagaing ramṭhen, Salingyi hmunram chung ah SAC nih hmanhmi bomb pawl cu kan lak hna, tiah tualchung hriamtlai phufonh in ṭuanvo ngeitu pakhat nih a chim. An hmanhmi bomb dihlak hi lung 30 hrawng cu si lai tiah zumh a si. Nihin september ni 1 tiang ah lung 15 cu puahkehnak chuak lo tein kan fimtawl khawh cang, a dang taangmi zong pehtlai in kan kawl rih lai, tiah a chimchap.
Nawlngeihnak Laak Hnu Ni 578 Chung Ah Minung 2262 Nunnak A Liam Cang! AAPP nih September ni 1 tiang cathanh a chuah ning ah Myanmar ramchung huap in SAC ralkap nih nawlngeihnak a laak ni 578 chung ah sualnak ngei lo minung 2262 thah an si cang, tiah theih a si. Tlaihkhih a tongmi dihlak hi 12,219 an si i, an thlah than mi hna hi 3079 an si.
Tlaih ding in nawlchuah a tong mi 15,320 an si. SAC ralkap nih mi nunnak a laak mi hna chung ah Yagon in nunnak a liam mi tambik an si. Ayeyarwaddy Ramṭhen Ah PDF Chungtel 5 Leng Cu SAC Ralkap Nih An Tlaih Hna!: Ayeyarwaddy ramṭhen ah nizan August 31 ahkhan PDF chungtel 5 nak tlawm lo cu SAC ralkap nih an tlaih hna, tiah theih a si.
Maubin peng MUB phu hruaitu pakhat telh in tualchung ralkap 5 leng cu Yangon ramṭhen Ahlone (အလုံ) peng inn pakhat ah SAC ralkap nih an tlaih hna, tiah theih a si. Tlaih a tongmi hna cu Maubin peng MUB hruaitu pakhat, Kyaiklat tualchung hriamtlai phu chungtel hna le Pyapon tualchung hriamtlai phu chungtel hna an si, tiah theih a si.
Ukraine Zaporizhzhia Nuclear Sehzung Cu IAEA Nih Chekhlatnak An Thawk! Ukraine ram Zaporizhzhia Nuclear Power Plant Chekhlatnak tuah ding in a rak phanmi IAEA phu nih sehzung a him khawhnak ding ah nihin in chekhlatnak tuah hram an thawk, tiah theih a si. Hi Sehzung hin mipi ca ah ṭihnungmi zawtnak a chuak sual lai tiah mipi nih an phan lio ah sehzung pawngkam ah pehzulh in kahdohnak a chuak, tiah IAEA in Rafael Grossi nih a chim.
Sehzung pawngkam ah Ukraine ralkap le Russia ralkap kar ah kahdohnak pehzulh in a chuak i nihin zing zong ah kahdohnak a chuak, sinain tuah a herhmi cu pehzulh in kan tuah ṭhiam ko lai tiah a chim chap. Europe ram ah a lian bik a simi hi sehzung nih hin a bik in Ukraine ram electric a pek i sehzung pawngkam kahdohnak kong ah Ukraine le Russia pakhat le pakhat sual an i phaw.
Ukraine nih sehzung lak ṭhan ding in a ralkap a thlah, tiah Russia nih cun a chim. Ukraine zong nih IAEA rat nak ding lam ah Russia nih Hriamngan in a kah tiah, a chim ve. Zaporizhzhia sehzung a zohkhenhtu Enerho atom nih cun, “Russia nih hriamngan kahnak ruang ah sehzung chung seh pakhat cu a rawh ca ah lakhruak in kan phih chung,” tiah a chim ve.
SAC Nih Uknak An Lak Thla 19 Chung Ah Karenni Ramkulh in Tualchung mi 300 Leng Nunnak A Liam! SAC ralkap nih uknak an lak thla 19 chung ah Karenni ramkulh chung in tualchung mi 322 an nunnak a liam cang, tiah Progressive Karenni People Force (PKPF) nih nihin September 1 ah cathanh an chuah. Nunnak a liammi tualchung mi 322 chung ah cheukhat cu kahdohnak ruangah nunnak a liammi zong an um i, SAC ralkap hremnak ah a thimi le thahmi hna hi minung 261 an si. Ralzaamnak hmun ah minung 61 an nunnak a liam, tiah theih a si.
Ralzaamnak hmun ah nunnak a liammi 61 chung ah hin kum upa cangmi hna le ngakchia an tam i, sii-ai le eidin donghcah ruang ah nunnak liammi an tam, tiah theih a si. Karenni ramkulh chung ah uknak lak hnu in mah umnak kaltak in ralzaam dirhmun a phanmi sing 2 leng an phan. Ralzaam dihlak i 65% cu caan karlak sakhan ah an i dor chung hna i, a tam deuh cu bawmh chom dirhmun in khuasa an si caah, eidin lei ah harnak an tong tawn, tiah ralzaam bawmtu hna nih an chim.
SAC ralkap nih uknak an lak thla 19 chung ah, Karenni ramkulh chung ah Biakinn 25 le inn 1180 cu SAC ralkap nih an khangh piak hna. Kahdohnak voi 454 a chuak i, SAC nih vanlei kahdohnak voi 158 tiang an tuah. Kahdohnak ruang ah tualchung hriamtlai phu hna le tlangcung hriamtlai phu in ralkap 151 an nunnak a liam. SAC ralkap lei in ralkap 1499 an thi, tiah PKPF nih an langhter.
Leave a Reply