SAC Ralhrang Caah Thawngpangchia Fonh
=========================
Demosoe PDF Nih SAC Ralkap 3 An Kah Thah Hna, Ningcang loin thah a tongmi ram pasalțha minung 4 caah Demoso peng, DawNganKha ( ဒေါငံခါး) khua ah umhmun a khuarmi SAC ralkap hna cu teirul cham in kan kah hna i SAC ralkap 3 an thi tiah – Demoso ( DMO – Local PDF ) nih cathanh an chuah. SAC ralkap nih Democracy pasalțha 4 a si mi Ko Jimmy, Ko Phyo Zeya Thaw, Ko Aung Thura Zaw, Ko Hla Myo Aung hna cu hri thlai in an thah mi hna hi Demosoe DMO – Local PDF nih kan cohlang kho lo i nuhrin covo a buartu SAC ralkap hna i an tuahser nak cu kan doh, fak piin sual kan phawt hna tiah an langhter.
Cu caah Kayah ramkulh, Demosoe peng DawNganKha khua mizapi hna i an inn ah umhmun a khuarmi SAC ralkap hna cu miz Demosoe Local PDF, PDF Battalion 1102 le Battalion 1106 hna i bawm in July 26 zanlei Sml 3:20 hrawngah suimilam pakhat chung hrawng kan va kah hna. Kahdohnak ah SAC ralkap pathum an thi i hliam a tuarmi an tam tiah an langhter. DMO- Local PDF lei in ralkap 2 hliam an tuar tiah cathanh chungah an langhter.
Federal Democracy Cohlang Tu Phu Hna Nih Dohthlennak Biahren An Thanh, Federal Democracy cohlang tu phu, NUG, CRPH, KNU, CNF, KNPP, ABSDF le CNF hna nih dohthlennak kong ah an biahren an thanh. SAC ralhrang nih Jinmy, Pyo Ze Yar Thaw, Hla Myo Aung le Aung Thura Zaw hna cu kan fimhlawm cang hna tiah July 24 ah cathanh an rak chuah. Cuti an nunnak lak tiang in dan an tatmi hna hi upadi he pehtlaihnak a ngei lo, thah nawnnak an tuahmi a si, tiah Federal Democray phu 7 nih an langhter.
2021 Febuary 9 ah Naypyitaw ah ngaknu pakhat an rak kah thah ni thawk in upadi lonh in thil an tuah. SAC ralhrang pawl hi ngaihthiam khawh lomi sualnak an tuah. Cu pinah kum tampi chung tlang cungmi an kan tuahto, an kan thah nawnnak vialte kha a thar in an cohlan ṭhan bantuk a si. Tonbiaruahnak in kan ram a ṭha te ko lai tiah a ruatmi hna zong nih SAC ralhrang bawi pawl an zia ṭha tein zoh caan a cu a cang.
Cucaah Political party, dohthlennak phu hna le ram chung ram leng um hna kanmah he i bawm in ralhrang a dongh tiah kan dohṭi lai.
Ram kip zatlang phu hna le ṭangṭi ram hna zong nih ramkhel lam in kal a duh lotu SAC ralhrang pawl hi dan tat piak ding, phih khar ding le dohthlennak ah aa telmi mizapi hi a tak in bawmh ding in kan in nawl hna, tiah an langhter.
Mizapi dohthlennak hi hrmahram uknak latu ralhrang a hram bongh dih in Federal Democracy rampi ser ding a si. Kannih cu mizapi hna nih an thazaang nunnak tiang pek in an dohnak hi a ran khawh chung in teinak kan hmuh tiang hnu kir ti loin hmai kan nawr ko lai, cucu kan biakamnak a si, tiah thanhnak an tuah.
Yesagyo Peng Ah SAC Ralkap PDF Nih Bomb An Puah Hnawh Hna I 3 An Thi, Magway ramtțhen, Yesagyo peng Kyaukhlekha(ကျောက်လှေခါး) khua pawng Government Tecnological college (GTC) ah umhmun a khuar mi SAC ralkap check gate pakhat cu July 27 chun Sml 2:00 tluk ah tualchung PDF hna nih cycle ah bomb kan hmanh i kan puah hnawh hna i ralkapb 3 an thi tiah Yesayo Revolution Group-YRG sin in theih a si.
Tualchung PDF hna cu SAC ralkap check gate yard 100 aa hlatnak in bomb(mine) an hmanh mi cycle an dir ter i minutes 35 tluk a rauh hnu ah khin palek pakhat a ra i gate chung ah a kal mi. Tool box a hun tik ah a puah hnawh i a. thi colh. Cun a dang ralkap 2 siizung ah an thi tiah theih a si. Cu dohnak cu Yesagyo Revolution Group-YRG, Urban Underground Revolution Force-UURF, Shwe Nyar Myae-PDF le Zarmani Blood Guerilla Army-Myaing i bawm in an tuah mi a si tiah theih a si.
Sagaing Khua Ah Pyosawhti Citmi Motor Cu PDF Nih An Kah Caah Pyosawhti 4 An Tlaih Hna, Sagaing ramṭhen, Sagaing peng Cuaipung khua in SAC ralkap kuttang Pyosawhti hruaitu chang Aung Zaw Oo aa citmi motor cu PDF nih July 26 chun sml 11:00 hrawng ah an kah hna. Tualchung mi 10 an thlah ṭhan hna i, Pyosawhti 4 kan tlaih hna tiah Sagaing peng thawng fianhternak phu sinin theih a si.
Pyosawhti hruaitu chang Cu Sagaing khua in Cuaipung khua lei a kal lio Sagaing pengkomh Battalion 2, companny(C4)4 le C4 a kuttang (2) hna nih an kah hna, tiah theih. “July 26 chun hnu sml 12:30 hrawng ah Sagaing in Cuaipung ah a kalmi Pyosawhti phu an i citmi motor cu lam hruang in an kah hna i, an tlaih hna. Aa citmi cu 14 hrawng an si,” tiah sagaing ramṭhen, thawngpang fianternak ṭuanvo ngeitu nih a chim.
KNU Brigade 5 Ah SAC Ralkap Pyi Phyo Aung Cu Hriamnam He A Lut, KNU Brigade 5 hmunram Hpapon(ဖာပွန်) pengkomh chung ah a ummi SAC ralkap Kha La Ya 405 in ralkap Pyi Phyo Aung cu, July 9 zinglei ah KNLA sinah hriamnam he a zam, tiah theih a si. Pyi Phyo Aung cu Khu Tu Htar, May Way( ခူသူးထာ၊ မယ်ဝေ) hmun ah a ummi SAC ralkap riahcaw a phortu a si i, meithal MA3 zunkhat le a kuan 70 he KNLA sinah a lut, tiah MuTaw thawngpang nih a langhter. Kha Ma Ya 405 cu Tanintharyi ramṭhen, Tayatchaung khua ah umhmun khuar mi an si i HtarWay(ထားဝယ်) Battalion 1 kuttang an si.
Sagaing Ramṭhen Chaung U Ah Bomb Puahnak In SAC Ralkap 22 An Thi!: Sagaing ramṭhen Northwest Headquarters in Myinmu lei ah kal mi SAC ralkap mawṭaw hna cu Chaung U peng, Nga Yan(ငါးယှန်) khua nichuah lei an phak ah tualchung PDF nih bomb an puahhnawh hna i SAC ralkap 22 an thih lengah hliam tuar zong an um, tiah theih a si.
Cu bomb puahnak cu nizaan zing Sml 11 hrawng ah Farmer Revolution Force (Chaung U) le Myaung Revolution Army battallion 5 i bawm in an tuah mi a si, tiah FRF CHU in ṭuanvo ngeitu nih a chim. “SAC ralkap hna cu an camp in mawṭaw 22 he an ra i Chaung U certual ah mi an i thleng. Cu mawṭaw 16 in ralkap 50 hrawng cu an ra i bomb lung 2 in kan puah hna,” tiah FRF CHU in ṭuanvo ngeitu pakhat nih a chim. SAC ralkap lei nih hriamngan in ruahdamh in an kah ve hna, tiah theih a si.
Bomb a puah mi mawṭaw cu a rawk i, a thi mi ralkap ruak hna cu an hawile nih an kalpi hna, tiah theih a si. SAC ralkap bomb an puah an tonnak cu Monywa-Mandalay highway ah a si i SAC ralkap nih ralkap thazaang chapnak lam ah an hman bik mi lam a si, tiah theih a si.
Leave a Reply