Kahdohnak Thawngpang Fonh!!
================
Monywa University of Economics sianginn ah umhmun khuarmi SAC ralkap hna cu tualchung hriamtlai phufonh nih September 29, zaan suimilam 7:00 ah anmah kut ser hriamngan 40mm he kan kahdoh hna, SAC ralkap 2 an thi tiah Chindwin Attack Force in chim phuannak nawl ngeitu nih a chim. University sianginn ah umhmun khuarmi SAC ralkap hna an cawlcangh ning cu kan ngiatthlai hna hnu ah a thli in kan doh hna tiah a chim. “An umnak hmun ah kan kahmi hriamngan a tla, cuhnu tlawmpal ah an pawngkam ah mithi phurtu motor kan hmuh” tiah Chindwin Attack Force in chim phuannak nawl ngeitu nih cun a chim.
Mon ramkulh, Yee pawng Khawza(ခေါဇာ) palik sakhan-hmu nih zulhmi motor cu nihin September 30 zinglei ah kahdoh an tong, palik sakhan-hmu telhin minung 3 an thih pinah an hriamthil zong kan lak khawh tiah Yebilu hruaitu pakhat nih a chim. September 30, zinglei suimilam 10:00 luan ah Khawza(ခေါဇာ) in Yee lei a kalmi palik motor cu kan kahdoh hna tiah a chim.
” Khawza(ခေါဇာ) in Yee lei a kalmi palik motor cu kan bawh i kan kah, meithal 3 kan lak khawh, cu chungah palik sakhan-hmu nih aa tlaihmi a tawimi pakhat aa tel, cun kuan zeimawzat zong kan lak, motor chung cuangmi an pathum ningin kan fimhlawm hna” tiah Yebilu phu hruaitu nih a chim. Yebilu phu hna nih Yee pengchung um SAC ralkap kuttang rianṭuantu khuabawi hna le Non-CDM hna nih a rannak in rian ngol dingah ralrinnak an pek hna.
Nizaan September 29 nikhat chung ah, Rakhine ramkulh Punnakyun(ပုဏ္ဏားကျွန်း) peng le Yatetaung(ရသေ့တောင်) peng chung ah AA le SAC ralkap kar kahdohnak voithum a chuak i, cu kahdohnak ah cun SAC ralkap 12 an thi tiah AA nih an thanh. Yangon-Sittwe motor lam, Punnakyun le Kyauktaw ramri Baukdaw(ဗုဒ္ဓေါ) khua pawngah, rawlchan dingin a kalmi SAC ralkap hna cu AA nih lam hruang in an kahdoh hna i, SAC ralkap 2 an thi 5 hliam an tuar tiah theih a si.
Cun, Myauk Oo (မြောက်ဦး) peng, Natan(နားတန်) le Maungshwe(မောင်းဆွဲ) khua kar ah SAC ralkap cu bomb kan puahhnawh hna i SAC ralkap 10 an thi i, SAC lei cu hnu an tolh than tiah AA in chimphuannak nawl ngeitu U Khine Thu Kha nih a chim. Kahdohnak a chuah hnu ah, Myauk Oo SAC hrambunh Khah-Mah-Yah 378 nih hriamngan an kah caah ngakchia 2 hliam an tuar i inn pakhat a rawk tiah theih a si.
Sagaing ramṭhen, Yinmarbin pengkomh Pale khua um penguk zungah umhmun khuarmi SAC ralkap 60 hrawng cu, kan kah hna caah SAC ralkap 2 an thi, 4 hliamhma an pu, tiah Southern YSO PDF nih an thanh. September 28 zaan sml 11:00 hrawngah hriamngan le hriamhme he pehtlai in kan kah hna, tiah Southern YSO PDF in ṭuanvo ngeitu Bawino Ayr Thaung(အေးသောင်း) nih a chim. “Penguk zung velchum in hriamngan, hriamhme le Auto meithal in sml pakhat le cheu chung hrawng kan kah hna. Auto meithal tlaitu PDF ralkap 3 nih hehchet tiin an kah hna hnuah hnu kan kir,” tiah a chim chap.
“Meithal in thlanglei he chaklei he kan kah hna lioah annih lei cu dai tein an um, an kan kap ngam lo. Thlanglei in hriamngan 80mm zun 8 in kan kah hna caah SAC ralkap 2 an thi, 4 hliamhma an pu. Penguk zung chungah ralkap pawl cu an um rih ko,” tiah Pale Battalion 4 No. 10 Peacock Black in Bawino Chit Nge nih a chim. Cu kahdohnak ah Southern YSO PDF le ṭangṭi phu Pale Battalion 4 No.10 Peacock Black phu hna i bawm in an kah hna, tiah theih a si. Crd-The Chin Post
Relchap, Ngaung U Peng In Mandalay Ramṭhen USDP Party MP Hlun Kahthah A Tong, Mandalay ramṭhen, Nyaung U peng in Mandalay ramṭhen MP hmun ah aa zuammi Aung Min Hteik cu, nizaan September 29 ah kan kahthah, tiah Pakanpyi Bilu(ပုဂံပြည်ဘီလူး) PDF in ṭuanvo ngeitu nih a chim. USDP party MP hlun Aung Min Hteik cu nizaan September 29 zing sml 7:40 ah Bilu PDF le ṭangṭi phu hna nih meithal zun 4 in an kah caah a hmun ah a thi colh, tiah theih a si.
Aung Min Htiek cu a luancia kum 2020 rampi thimnak lioah Ngaung U peng mee hmun No.1 in Mandalay ramṭhen MP hmunhma ah aa zuammi a si i a rak sung. Aung Min Hteik cu SAC ralkap he rianṭuanṭi an si i, khuami hna cu hranhram in an tlaih hna. SAC ralkap caah tangka a kawlpiak hna i khuami hna cu a phunphun in harnak a pek hna caah kan thahnak a si, tiah Pakanpyi Bilu PDF in ṭuanvo ngeitu nih cun a chim.
SAC Ralkap Nih Wandwin Khua Sianginn Uktu Sayagyi Kyaw Naing Win An Thah , Mandalay ramṭhen, Wandwin(ဝမ်းတွင်း) khua No.1 Ngaungpin khua ah sianginn uktu sayagyi Kyaw Naing Win cu, SAC ralkap nih ralram hmun pakhat ah an thah, tiah tualchung mi hna nih an chim. Sayagyi Kyaw Naing Win cu Meiktila (မိတ္ထီလာ) pengkomh Wandwin khua No.1 Nyaungpin khua ah sianginn uktu a si i, a luancia September 23 zaanlei sml 6:00 hrawngah SAC ralkap nih an rak tlaih.
A nupi nih a pehtlaih khawh ti lo caah palik sakhan ah a chimh hna i, a chuak zau ko lai tiin palik nih an ti nain an rak thah cang. A ruak cu mei in an khangh i, September 28 ah a ruh lak dingin phone an chawnh hna, tiah tualchung mi hna nih an chim. Sayagyi Kyaw Naing Win le a nupi cu sianginn cachimh rian a ṭuanmi an si i, an pahnih in CDM a tuahtu an si. SAC ralkap nih an tlerhkhawnh tuk hna caah Non CDM an si ṭhan i SAC ralbawi Captain Kyaw Zin nawlpeknak in palik Zin Min le misual phu hna nih an hrem nakin sayagyi Kyaw Naing Win cu a nunnak a liam, tiah theih a si.
Myo U Ah SAC Ralkap Nih Hriamngan An Kah Caah Ngakchia Nu Pahnih Hliamhma An Pu, SAC ralkap nih nnizaan eptember 29 zaanlei sml 3:00 hrawngah hriamngan duh paoh in an kah caah Myo U(မြောက်ဦး) peng Maungshwe(မောင်းဆွဲ) khuami, nu pahnih hliamhma an pu, tiah tualchung mi hna nih an chim. Nizaan sml 3:00 hrawngah Maungshwe khuapawng Myo U-Maungshwe lampi ah, bomb puahkehnak a chuah dihin Myo U hrambunh Khah Mah Yah 378 Battalion nih hriamngan pehtlai in an kah tiah theih a si.
Tualchung mi pakhat nih, “Kan khua pawngah puahkehnak a chuak i kahdohnak a um le um lo cu kan hngal lo. Puahkehnak a chuah hnu caan tlawmpal ah Khah Mah Yah 378 Battalion in zaanlei sml 6:00 hrawng in hriamngan an kah caah khua chungah hriamngan kuan lung 2 a tla i, lung 1 a puah caah khuami pahnih hliamhma an pu,” tiah a chim. Hriamngan kuan in hliamhma a pumi, tang nga a cawng lio Khin Moe Aye(kum 14) cu a ṭaang ah aa hliam i Myin Myat Khine(kum 3) cu a lu ah hliamhma a pu, tiah theih a si.
Shan Ramkulh Takaw Hlei Ah Pistol Zun 30, Meithal Kuan Le RPG Kuan Tam Ngai An Tlaih, Shan ramkulh, Kunhing(ကွန်ဟိန်း) khuapi le Maingpin(မိုင်းပျဥ်း) khua kar Takaw hlei ah nizaan September 29 chun ah pistol le RPG kuan hna cu motor chungah nawlngeitu hna nih an tlaih, tiah theih a si. “Takaw hlei checkgate ah motor pakhat an check i cu chungah pistol zun 30 le RPG kuan hna an tlaih. Motor khaltu pa cu a zam manh i minung pakhat an tlaih. Hriamnam hna cu Tachileik in an phorhmi a si,” tiah mihmutu motor khal pakhat nih a chim.
September 29 zinglei in Mon ramkulh le Pago ramṭhen kar hlei pakhat ah NISSAN Cedric motor pakhat chungah PANZER ARMS GEN 2 BP-12 meithal zun 4, a saumi zun 1, GLOCK pistol zun 2, point 32 pistol zun 1, SIGSAUER pistol zun 2, kuan bawm 27, kuan 150, meithal kuang 1, Sallon motor 1 le zen-kuan phortu minung 2 tlaih an tong, tiah theih a si.
Tikhor Chungah Mobye PDF Ralkap 3 Ruak An Char, Karenni ramkulh, Mobye peng Mingalar khua pawng kahdohnak lioah PDF ralkap 3 a tlaumi an ruak cu, tikhor chungah kan char hna, tiah MBPDF-Eagle phu nih an thanh. A tlaumi PDF ralkap 3 cu MBPDF-Eagle Companny in ralkap 2 le Thein Hnet Companny in ralkap 1 an si i, a luancia September 23 ah SAC ralkap he Mobye peng Mingalar khua kahdohnak ah a rak tlaumi an si, tiah theih a si.
MBPDF ralkap 3 cu nizaan September 29 ah tikhor chungin an chuah hna i ralkap 2 cu, SAC ralkap nih an kah thahmi hna an sinak kong le PDF ralkap 1 cu a phei ah an kah caah kal kho ti loin SAC ralkap nih an hrem i a thimi a si lai ti an zumhnak kong cu MBPDF-Eagle nih cathanh an chuah. SAC ralkap nih an thahmi PDF ruak 3 cu an angki le an tawhhrolh an phoih dih hna i banhla hnah in an tuam hna hnuah pe 35 a thukmi tikhor chungah an thlak hna. MBPDF-Eagle le ṭangṭi phu hna nih an ruak cu an char hna i ṭha tein an ruak cu an vui hna, tiah theih a si.
SSPP Nih SAC Chairman Sinah Burma State Ser Dingin A Chim, SAC Chairman Min Aung Hliang le SSPP hruaitu hna cu September 26 ni ah tonnak an ngei I cu tonnak ahcun SSPP lei nih “Burma State” nan ser hau tiah an chim tiah theih a si. “State cuzah a um lai timi kong kan chim lo, abiapi bik cu ramkhel siningah kan I khat ko tiah kan ti ahcun Burma mi zong nih ruah ding a si, atu ah ramkulh le ramthen hi ai khat ko ti kan chim ahcun Federal puung he ai kaihmi a si ti lo!
Pyine pakhat le pakhat kha tlukruan a hau” tiin an chim tiah theih a si. Asinain SSPP hruaitu hna nih an chimmi cung tu ahcun SAC chairman Min Aung Hlaing nih bia pakhat hmanh lehnak a tuah hna lo tiah theih a si. Tutan tonnak ah hin SSPP lawng siloin UWSP, NDAA hriamtlai phu zong an i tel i an duhmi cio an chim cio tiah theih a si.
India Ram Ah Caw Le Naa Virus Nih A Tlak Hna Caah Sing Khat Dengmang An Thi, Nuai 2 Hrawng An Zaw, India ram ah caw le naa zawtnak virus phunkhat a chuak i an hnuk hang zong a chuakmi a tlawm tuk cang. Caw le naa a zuatu hna caah tangka lutchuak a tlawm ngaingai cang, tiah theih a si. Takvun zawtnak tiah auhmi virus hi fikfa le zuu bantuk in an thi an dawp hna i, zawtnak rungrul a lut. Caw le naa cu an zaw i an takpum ah an bo dih.
A luacia kum India ram ruah a surmi a tlawm tuk i, Jharkhand ramkulh nichuah lei ah cun ruah ti a um lo caah cinthlak mi vialte an car dih. September thla chung ah a hlan ningkel nakin faak tuk in ruah a sur hoi, tiah theih a si. Virus ruangah caw le naa a thimi hi India ram ramkulh 15 chungah a cangmi a si, tiah Press Trust of India News Agency nih an langhter.
“A luancia kum 2 hrawng ah khan hi zawtnak hi aa sem cang. Caw le naa a thimi hi sing khat nakin an tlawm deuh kho,” tiah zualkhalhnak lei thiam sang evinder Sharma nih a chim. Saṭial zawtnak kong a hlathlaitu caṭial thiam Scaria nih, “Hi bantuk zawtnak hi a luancia kum 2 lioah a cangmi a rak si i, zei bantuk zawtnak in dah aa sem i a chuah timi bel ka hngal lo. Hi zawtnak hi ṭha tein kan zulh dawi a herh,” tiah a chim.
Afghanistan ah private sianginn pakhat ah nunnak thap in bomb puah hnawhnak a chuak, minung 19 nunnak liam, Afghanistan khualipi Kabul private sianginn pakhat ah September 30 ah nunnak thap in bomb puahhnawhnak a chuak, cu puahkehnak ruangah cun minung 19 nak tlawmlo nunnak a liam tiah palik phu nih an chim. Cu bomb puahhnawhnak cu Kabul nitlak lei ah a cang i, siangakchia hna exam an tuahlio ah a puak tiah ṭuanvo ngeitu hna nih an chim.
Private sianginn bomb puahhnawh a ton ruangah a nunnak liammi hna hi mi tamdeuh cu nu an si tiah theih a si. Afghanistan ah a luancia kum August thla in Taliban nih nawl ngeihnak a hmuh hnu ramchung ah nu ca cawnnak sianginn tamtuk an phih khar nain, cheukhat private sianginn hna cu an on ṭhiam tiah theih a si.
PDF chungtel minung 4 cu PDF chungtel sinak in chuah an si tiah Tamu-PDF nih thanh, Sagaing ramṭhen, Tamu hrambunh tualchung hriamtlai phu PDF battalion 3 chungtel 4 cu dingrep zulhding phung buar in anmah duh tein an chuak/an zaam caah PDF chungtel sinak in chuah an si cang tiah Tamu-PDF battalion 3 nih nihin September 30 ah cathanh an chuah.
Maung Ngyi Min Khant, Maung Hein Phyo Oo, Maung Ye Htat Paing le Maung Yan Naing Oo hna cu anmah duh tein a luancia zarhkhat luan hrawngah khan battalion in an chuak tiah theih a si.. Battalion nih phungning tein PDF chungtel sinak in chuahmi minung 4 hna kong ah, buainak pakhatkhat a can le a chuahsual a si ahcun zeihmanh ṭuanvo kan la lai lo tiah Tamu PDF battalion 3 nih cathanh an chuah. Myanmar-India ramri Tamu hmunram ah PDF telh in tualchung hriamtlai phu dihlak phu 6 hrawng nih cawlcanghnak tuah a si i, atu le tu titluk in SAC ralkap le tualchung hriamtlai phu kar kahdohnak a chuak tiah theih a si.
·
Myanmar mi siangakchia 6,000 leng Mizoram ramkulh chung ah ca an cawng, India, Mizoram ramkulh hmunkip um cozah le private sianginn hna ah ca a cawngmi Myanmar rammi siangakchia 6,195 an si tiah ramkulh fimcawnnak lei vuanci nih a chim. Siangakchia 5,221 cu cozah sianginn ah an kai i, siangakchia 186 cu cozah nih a bawmhmi sianginn ah an kai, cun siangakchia 790 cu private sianginn ah an kai hna tiah theih a si.
Mizoram ramkulh chung fimcawnnak lei department in director Dr.H Lal Tlang Lian nih ” Myanmar ram lei in a rami siangakchia tamdeuh cu Chin mi an si caah holh lei ah cun harnak tamtuk a um lo, Mizo he nunphun le zulhning tibantuk an i khah leng ah Mizo holh zong an holh kho” tiah a chim. 2021-2022 cacawn kum ah Myanmar rammi siangakchia minung 68 cu tanghra exam caah cazin ah telhchih an si tiah Lalthlangliana nih a chim.
Mizoram ah sianginn a rak kaimi Myanmar rammi hna chung ah chuekhat cu ralzaam chung in an si i, cheukhat cu ramchung sianginn an kai khawhlo caah nu le pa nih Mizoram ah sianginn kaiter mi zong an um, cun cheukhat ramri khuate lei ummi ngakchia hna cu Mizoram lei ah sianginn an kai hna tiah theih a si. A tulio Mizoram university ah Institute of Chin Affairs (ICA) nih Mizoram mino hna caah Burmese language le social studies subjects diploma sianginn on ding in timhtuahnak an ngei tiah theih a si.
Madaya ah mi thil a chut i a firtu misual(damiah) minthang phu pakhat cu Shwebo PDF battalion 18 nih an tlaih hna, Mandalay ramṭhen, Madaya pengchung ah mi thil a fir i a chuttu, voi tamtuk mi thil chuhnak a tuahtu minung 15 an i telnak minthang misual phu pakhat cu an thilri le hriamthil hna he Shwebo pengkomh PDF battalion 18 nih tlaih in hmalaknak an tuah hna tiah Bo Sunyee nih a chim.
Misual(damiah) phu hna cu an i putmi thilri le hriamthil hna he Seinpankone(စိန်ပန်းကုန်း) khua ah Sagaing ramṭhen, Shwebo pengkomh battalion 18 nih September 23 ah an rak luhhnawh hna i, tualchung hriamtlai phu lei hliamhma tuarnak umlo in misual(damiah) phu hruaitu Naing Win le Ngyein Zaw telh in minung 15 cu an thilri tampi he an tlaih hna tiah theih a si. “Tlaih a tongmi misual(damiah) phu hna hi NUG sin ah report pek an si i, hmalaknak cu MOD zulhphung tein tawlrel a si lai tiah theih a si, zei tuahding an kan chimh hlan cu sakhan ah hren chung an si lai” tiah hriamtlai phu chungtel pakhat nih a chim.
Myaing Peng Tualchung Mi Umnak Dumchung Ah SAC Ralkap Hmanhmi Bomb Lamhsualnak In Kum 5 Ngakchia Pakhat Nunnak Liam, Magway ramṭhen, Myaing peng Kyaukkhuat(ကျောက်ခွက်) khua ah a lutmi SAC ralkap hna nih, tualchung mi hna an umnak dum chungah bomb an hmanh caah, cu an hmanhmi bomb i lamhsualnak in kum 5 ngakchiak pakhat a nunnak a liam tiah We Love Myaing nih September 30 ah an thanh.
SAC ralkap hna cu a luancia September 25 ah Kyaukkhuat(ကျောက်ခွက်) khua ah rallam sial in an lut i, tualchung hriamtlai phu hna nih bomb lungthum an puahhnawh hna caah SAC ralkap 2 an rak thi. Cu ralkap hna nih cun Kyaukkhuat(ကျောက်ခွက်) khua nitlak lei tualchung mi hna umnak dumchung ah bomb hi an rak hmanh tiah theih a si.
Rallam sialtu SAC ralkap khuachung in an chuah hnu, nihin September 30 ah tualchung mi hna cu khuachung ah an kir i, kum 5 tluk simi ngakchia pa Sai Wai Yan nih an inn hauchung lente aa celhlio chunhnu suimilam 12:00 hrawngah bomb i lamhsual in hliamhma fakngai a tuar hleiah zaanlei suimilam 3:00 hrawngah a nunnak a liam tiah theih a si.
SAC riahcaw phurtu motor 2 AA nih an tlaih, Rakhine ramkulh, Yataetaung(ရသေ့တောင်) pengah SAC ralkap riahcaw phurtu motor 2 cu September 29 chunhnu ah AA nih an kah hna hnu ah an lak khawh tiah tualchung mi nih an chim. Maungdaw pengah SAC ralkap hna caah riahcaw a phurtu tualchung mi hna motor 2 cu Maunghnamah(မောင်နှမ) khua pawngah AA nih an tlaih tiah theih a si.
Maungdaw khuami pakhat nih cun ” SAC ralkap hna caah riahcaw khat tein a phurtu motor 2 cu Maunghnamah(မောင်နှမ) khua pawngah AA nih an kahdoh i an tlaih, AA ralkap cu an i tel lo, cu motor chungah cun Gangyinṭan(ကညင်တန်း) khuami driver 2 le ṭuanvo latu minung 2 tiin an dihlak minung 4 cu SAC ralkap riahcaw thilri he AA nih an tlaih hna hi a si. SAC ralkap nih cun Maungdaw chaklei um an ralkap hna caah riahcaw chanh dingah anmah tein kal ti loin, tualchung mi hna an fial hna tiah theih a si. Crd-The Chin Post
Leave a Reply