Tilam Phih Piak Mi Chin Ramnkulh , Paletwa Peng Cu An On Piak Than Cang Hna
==================================
August ni khat in SAC ralhrang nih tilam phihkham mi KyaukDaw le Paletwa tilam cu thilphorh rikhiah in tlun kal nak nawl an peek tthan cang hna tiah kan theih. Thil phorh tikah tuanvo ngeitu hna sinah cohlannak ca laak a si lai i, thil cu a zatawk (ခွဲတမ်း) cio in phorh a si lai tiah Chin ramkulh, thil phorhnak lei in tuanvo ngeitu pakhat nih a chim.
“Vok kuanlawng cu kal a ngah rih lo. Hlan bantuk in tilawng (Tinbaw) tu cu kal ter an si. Thil phorh tik ah catlap an lak hmasa lai. Tu thla chungah hi pa nih thil a phorh a si ah cun hmaithla ah cun mi dang pa nih, tibantuk in a zatawk in phorh ter an si lai. Tahchunhnak ah “Paletwa ah chungkhar 1000 an um ti uh sihlaw, tu thla ah kei mah nih facang tun 100 ka phorh lai i, A Hmai thla ah ming dang pa 2 nih tun 300 phorh nak nawl an ngei lai” tiin a zatawk in a kal lai.” tiah a chim.
Paletwa ah SAC ralhrang le AA kahdohnak ruangah Kyaukdaw-Paletwa tilam cu rikhiah in a tu le a tu in phihkham an si leng mang. August ni 1 ah tilam phihkham ruangah Peletwa ah facang tunkhat ah 40000 a si tonmi kha ting (1) hmanh in cawkawk a um lo tiah theih a si. August ni 18 ah lam cu on paik than an si i, a tu hi facang tunkhat ah 80000 ah a tum tiah kan theih.
“Tlawmpal Rikhiat in thilri phorhter cu a si kaw. Facang le a dangdang thilri phorhnak nawl an kan peek than cang caah thilman zong a tum deuh. A tu ah facang tunkhat ah 80000 ah a tum than cang. 80000 a si cang caah cawk zong ah tha a tho deuh cang, Hlan deuh ah cun thilri a piat. Tuan deuh ah tunkhat ah 86000 a si mi facang kha, a tu ah cun 80000 a phan.
Kan hnu zarhah ah cun tunkhat ah ting (1) a phan. A tu ah 80000 a si tikah tlawmpal cu a tum deuh. A si nain hlan deuh bantuk in cun a tum rih lo. Thilman a kai tuk caah facang man zong a kai tuk ve.” tiah Paletwa tualchung mi pakhat nih a chim. Paletwa le Kyaukdaw tilam on piak mi cu zarkhat ah voi 2 thil phornak nawl an peek hna i, AA le SAC ralhrang kahdohnak a chuak than a si ah cun phih piak than an si lai tiah kan theih.
Rakhine Ramkulh, Maungdaw Peng Ah AA Le SAC Ralkap Kar Kahdohnak Fak Ngai A Chuak!, Rakhine ramkulh, Maungdaw peng chaklei Mitait(မီးတိုက်) khua pawng ah nihin August 22, zinglei in AA le SAC ralkap kar fak ngai in kahdohnak a chuak, tiah tualchung mi nih an chim. Mitait(မီးတိုက်) khua pawng, Waila(ဝေလာ) tlangcung in hriamngan le hriamhme hmang in kaphnih in an i kap, tiah Mitait(မီးတိုက်) khuami nu pakhat nih a chim.
“Kahdohnak cu zinglei in an thawk i, hriamngan le hriamhne he kaphnih kar fak ngai in an i kap. Leng chuah awk zong a ṭhat lo caah innchung ah kan i thup ko hna,” tiah a chim. A luancia August 16 ah khan Waila(ဝေလာ) tlangcung ah SAC ralkap le AA kar suimilam 8 leng fak ngai in an rak i kap cang. Kaphnih kahdohnak voi 10 leng a chuak cang i, cu kahdohnak chung ah cun SAC ralkap 41 nak tlawmlo an thi. Palik bawi pakhat telh in SAC ralkap 14 a nung in an tlaih hna i, hriamthil tampi zong kan lak, tiah AA nih cathanh an chuah.
Khin-U Khua Rawldawr Pakhat Ah SAC Bomb Puahnak In Tualchungmi Pakhat Nunnak A Liam!: Sagaing Ramṭhen, Shwebu pengkomh Khin U khua, Kyaw Si Hein rawldawr ah SAC nih nihin August 22 ah bomb an puah caah Shwe Yae Win lakphak dawr ah ummi Yee Win Htun cu bomb nih a hliamh i siizung ah an kalpi lio ah a nunnak a liam, tiah theih a si. Cu pin ah midang pahnih zong hliam an tuar tiah theih a si.
SAC ralkap nih bomb an puahnak Kyaw Si Hein rawldawr hi minung an um lonak kumkhat hrawng a rau cangmi a si i, SAC ralkap le Pyusawhti hna duhpoh in an i dornak a si.
A puahmi bomb cu SAC sermi ft’ 3,000 kulh hrawng tiang a hrawk kho mi a si. Cu puahkehnak cu PDF nih an tuahmi si ti in SAC nih cun mipi sin ah an chim, tiah tualchungmi pakhat nih a chim. Khin-U khua ah SAC duhlonak an langhter hnu in atu bantuk in bomb an puah hi a si, tiah a chim chap.
Pyin Oo Lwin – Mandalay Lampi Ah Alu Phortu Motor Cu Aa Let I, minung 2 Nunnak Liam!, Pyin Oo Lwin-Mandalay lampi mengtung no.25 ah nihin August 22, chunhnu suimilam 1:00 hrawng ah Alu phortu motor ngan pakhat cu lam thlang lei i a tlak caah motor khaltu le a zultu cu an nunnak a liam, tiah theih a si.
Cu ka motor aa lehnak hmunhma cu motor dang zong lam thlang ah an lanh tawnnak hmun a si i, atu le tu khawndennak a cannak hmun a si. Motor a tlaknak hmun ah cun Pyin Oo Lwin peng meithat phu hna le bawmchantu phu hna nih an zuanhnawh hna. Nunnak a liammi 2 cu Pyin Oo Lwin peng general hospital ah an kalpi hna, tiah theih a si.
Gangaw PDF Sakhan Cu SAC Ralkap Nih An Khangh! Magway ramṭhen, Gangaw peng thlanglei ummi PDF-Gangaw Company 12 sakhan cu, SAC ralkap nih nihin August 12 zing sml 10:00 ah an khangh, tiah theih a si. “Ralhrang 70 hrawng nih kan sakhan lei hoih in rallam an sial caah sakhan cu an khangh dih. Kanmah lei in a thimi le aa hliammi cu kan um lo,” tiah thlanglei ummi PDF-Gangaw in ṭuanvo ngeitu pakhat nih a chim.
Kan sakhan an khangh ruangah thilri a rawkmi le facang rawkmi zat cu ṭha tein kan tuak rih lo, tiah a chim chap. SAC ralkap pawl nih Aungmin khua zong hriamngan in an kah caah inn tam ngai a rawk, tiah PDF-Gangaw nih an langhter. Cu pin ah Aungmin khua thlanglei ummi lo-thlam hna zong mei in an khangh hnu ah SAC ralkap pawl cu Gangaw khua chung ah an lut ṭhan, tiah theih a si.
Pauk Peng Khuate Panga Cu SAC Ralkap Nih Nithum Chung An Khangh Caah Khuami A Thong Leng An Zaam!: Magway ramṭhen, Pauk peng Sathein, Ngaungyin, Kwekone, Kepin Ing le Laylan khua cu SAC ralkap nih nithum chung mei in an khangh caah khuami a thong leng cu a himnak hmun ah an zaam, tiah tualchung mi hna nih an chim. August 18 lio in SAC ralkap 150 hrawng cu Magway ramṭhen, khuate panga ah rallam an sial i, inn an khangh caah khuate panga lawng si loin a pawngkam ummi khua hna zong an zaam, dih tiah theih a si.
SAC ralkap nih inn an khangh pin ah khuami hna thilri man sung tampi cu an laak i, motor panga in an kalpi. Vok le an ar hna zong an thah i an ei, tiah an chim. SAC ralkap nih mei khanghnak in Sathein khua inn 7, Ngaungyin khua inn 20, Kwekone kgua inn 6, a dihlak inn 32 a ciam, tiah tualchung mi hna sinin theih a si.
Moreh Khua Ah Assam Rifle Nih Myanmar Rammi Pa Cu Hriamnam He A Inn Ah An Tlaih! India-Myanmar ramri Manipur ramkulh, Moreh khua Kanan sang ummi Myanmar rammi pakhat cu, August 19 zanṭim ah Assam Rifle le ramkulh palik nih a inn ah an luhhnawh i, pistol zung hnih he an tlaih, tiah Assam Rifle nih cathanh an chuah. Tlaih a tongmi Myanmar rammi pa cu Imphal khua lei ah an kuat. Anih hi nikum ah Moreh khua chung ah meithal le kutcheh bomb he an rak tlaih bal cangmi a si, tiah theih a si.
Tamu Khua Chaklei Ah Mi Thilri Chuhnak A Chuak Ṭhan! Sagaing ramṭhen, Tamu khua chaklei ah eidin thilri a zuarmi hna cu, hmai aa hupmi hna nih nihin August 22 zinglei sml 4:30 hrawng ah an thilri an chuh hna i, tangka tlawmpal zong an laak, tiah theih a si. Nihin August 22 ah Tamu khua chaklei khuate ah eidin thilri le nga zuar ding in a kalmi thil zuartu 3 cu Tamu peng Kwintaung khuathar le Chaungnetgyi karah, a nakmi puan in hmai aa hupmi pa 4 nih nam pali in lam an kham hna i, tangka kyats 60,000 hrawng an chuh hna, tiah theih a si.
Cu hnu sml cheu hrawng a rauh ah Tamu khua lei in thil zuar ding ah cycle in a kalmi nuva hna zong an thilri chuh ding in an dawi hna nain an zaam manh, tiah tualchung mi pakhat nih a chim. Puan nak in hmai aa hupmi misual phu hna cu a luancia August 17 ah mi thilri chuttu hna he an umtu ning aa khat ngaimi an si, tiah tualchung mi hna nih an chim. Tamu khua chaklei ah mi thilri chuhnak hi voili nak tam a chuak cang ko nain, SAC ralkap le PDF nih hmalaknak zeihmanh an tuah rih lo, tiah theih a si.
Yangon Ah UG Phu In Ralkap 6 Tlaih An Tong, A Hmun Ah 2 An Thah Hna, Yangon ah umhmun khuarmi UG phu pakhat a simi Burmese Ranger Army-LDF phu umnak inn pakhat cu August 9 ah SAC ralkap nih an rak luhhnawh hna i, an tlaih hna, tiah theih a si. SAC ralkap 30 hrawng nih civil motor pathum le DC Double Cab pakhat in an luhhnawh hna i, UG ralkap 6 an rak tlaih hna, tiah theih a si.
Tlaih a tongmi UG ralkap 6 chung in 2 cu a hmun ah an kah thah hna i, a taangmi 4 cu SAC ralkap nih ralram an kalnak ah ralphaw ah an hman hna, tiah theih a si. “An rak kan luhhnawh lio ah UG ralkap 9 an kan tlaih. Cu chung ah 3 cu kan luat. Dalan nih SAC ralkap thawng a pek hna ruangah a si, tiah kan theih caah hriamnam kan ngeihmi chung in kan si khawh tawk kan kah ve hna. Hriamnam aa dan tuk caah ralkap 6 an tlaih hna, 2 cu a hmun ah an kah thah hna.
“Meithal kuan nih ka ke a khen caah ka zaam kho ti lo. Ka hawile pahnih nih an ka cawi i, an ka zaampi,” tiah tlaih a tong i a luatmi UG, Burmese Ranger Army-LDF phu in ralkap pakhat nih a chim. Dalan nih thawng peknak ruangah Burmese Ranger Army-LDF phu le anmah he ṭhangṭi phu chung in ralkap cheukhat cu SAC ralkap nih an tlaih hna.
Tlaih a tongmi ralkap 6 sinin Glock 19-Gen5 a tawimi zun hnih, Ready Made bomb lung nga, tangka kyats sing 18, 9mm meithal kuan 200 le kutser bomb lung nga cu SAC ralkap nih an rak tlaih, tiah theih a si.
Chaung-U Peng Ah Pyusawhti Sakhan Pakhat Cu PDF Nih Drone In Bomb An Thlak Caah 4 An Thi: Sagaing ramṭhen, Chaung-U peng Kankyikone khua ummi, Pyusawhti sakhan cu drone in bomb kan thlak caah SAC ralkap kuttang Pyusawhti 3 le ralkap 1 an thi, tiah Myaing peng T.G.R phu in Bo Taik Kar nih a chim.
August 20 ah Chaung-U peng Kangyikone khua ah umhmun a khuarmi Pyusawhti sakhan cu, T.G.R women Drone Force le CRA Drone Team i bawm in T.G.R nih a serchuahmi bomb kan thlak hna caah Pyusawhti 3 le SAC ralkap 1 an thi, tiah ṭuanvo ngeitu nih cun a chim. Cu kahdohnak ah cun T.G.R Women Drone Force, CRA Drone Team, Saw Bwar Gyi (MPDF), le Bo Tauk Htun (MBTT) hna i bawm in an kah hna, tiah theih a si.
Leave a Reply