Myaing PDF Nih SAC ralhrang Timhciammam Bak In An Kah Hna
Sagaing ramthen, Myaing pengkulh, Swe Lay Oo pawng ah Mipi ralkap le SAc ralhrang karah kaphnih kahdohnak Suimilam 3:00 leng a chuah i SAC ralhrang lei minung 35 hrawng an nunnak a liam kho tiah, Myaing PDF tuanvo ngeitu nih a chim. ” Timhlamhnak ngeicia in kahdoh an si caah SAC ralhrang a thi mi an tam caah hnu lei ah an kir tthan.
A sinain SAC ralhrang hnu an kir hnu ah kahdohnak tuan tthan kan i timh ko nain khua lei ah a cang mi mipi kan zoh hna, zawn kan ruah hna caah a si. Cu ruangah dam te le teinak hmuh tein hnu lei ah kan kir kho” tiah Myaing PDF tuanvo ngeitu pakhat nih a chim. Mah kahdohnak chung mipi ralkap lei in,
Minung pahnih an hnar le an mit ah hlaim an tuar i, rianrang in thlop khawh an si caah an dam ttha tthan tiah theih a si. Mipi hna nih Myaing PDF pawl cu hlunghlai ngai an dawn hna tiah theih a si. SAC ralhrang hnu an kir hnua hmuhma zohfel nak an tuah i SAC ralhrang nih an zaam tak mi hraimnam tampi an lak piak hna tiah theih a si.
Kumkhat Leng Ah Karenni Ramkulh Ah Kahdohnak Voi 274 A Chuak, Nawlngeihnak laak hnu 1 February 2021 in 30 April 2022 tiang Karenni ramkulh chung ah kahdohnak voi 274 a chuak i, SAC ralkap 1065 an thi. Karenni ralkap phufonh lei in ralkap 116 an thi, tiah PKPF (Karenni People’s Force) nih cathanh a chuah. Kahdohnak chung ah SAC ralkap mawṭaw 3 an rawk i,
SAC ralkap lei nih cunglei in voi 118 an kah hna, tiah an langhter. Kahdohnak ruangah mipi inn 1010 an rawk i biaknak lei inn 17 a rawk, tiah langhter a si. Kahdohnak ruangah civil mi 262 an thi i minung 231 cu a ruang um loin an thi, tiah PKPE cazin ah an langhter. Data for Myanmar nih thanh ning ah cun 2021, February 1 in 2022, April 30 chung ah SAC ralkap hna nih meikhangh in an hrawh mi mizapi inn 11,417 an si. Magwe ramṭhen ah inn 2131, Chin ramkulh ah inn 1147, Kayah ramkulh ah inn 407 meikhangh in hrawh an si, tiah an langhter.
SAC Ralkap Nih Thlakhat Chung Ah Inn 3500 Leng Meikhangh In An Hrawh: SAC ralkap nih nawlngeinak an laak kumkhat leng chung ah SAC ralkap le a kuttang hna nih meikhangh in an hrawh mi inn cu 11,417 tiang an si cang, tih Data for Myanmar nih a thanh. Cu thil a cang mi hna cu Myanmar ramchung hmun 296 hrawng ah a cang mi an si i khuaram hmantlak, ( မြေပုံ , ဂရမ်) hna he zohchih in media nih an langhter mi kahdohnak thawngpang le nifatin inn khanghnak thawngpang hna zohchih in kan laak mi a si, tiah an thanh.
A luancia April 30 tiang cazin ning ah cun Sagaing ramṭhen cu innkhanghpiak tam bik a tong mi an si i, Inn 7503 an ciam cang. Magwe ramthen ah inn 2131, Chin ramkulh ah inn 1147 le Kayah ramkulh ah inn 407 khangh an si. SAC ralkap nih thla hmasa April chung ah inn 3514 an khangh i, January thla ah inn 1059 , February thla ah inn 2882, March thla ah inn 1853 cu meikhangh in an hrawh.
Leave a Reply