Karenni Ramkulh, Shiataw Hmunram Kahdohnak Ah SAC Ralkap 7 An Thi – KNDF (Thawngdang SAC Ralhrang 32 Thah An Si)
=============================
Karenni ramkulh, Shiataw(ရှားတော) hmunram chung ah August 7 le 9 ah khan voi li tiang kahdohnak a chuak i, kahdohnak ah SAC ralkap 7 hrawng an thi, tiah KNDF battalion 17 nih nihin August 12 ah an thanh. Shataw(ရှားတော)khua, Tangusuu(တငူးဆို) sakhan in a chuakmi SAC ralkap hna cu August 7 in KA le KNDF B-17, B-12, B-14 nih an kahdoh hna. Kaphnih kar ah kahdohnak voi 3 tiang a chuak i, SAC ralkap lei 2 an thi, hliamhma tuar zong an tam, tiah an langhter.
August 9 ah Shiataw(ရှားတော) khua ah kahdohnak a chuak ṭhan i, SAC ralkap 5 an thih leng ah hliamhma tuar an tam, tiah KNDF battalion 17 nih an thanh. Kaphnih kar kahdohnak chung ah KA le KNDF phufonh lei hliamhma tuar an um lo, tiah an langhter. Kaphnih kar kahdohnak ruang ah Karenni ramkulh, Loikaw-Shiataw(ရှားတော) lampi cu mipi nih zulh rih lo ding in KNDF nih August 10 ah khamnak an tuah.
Watlet Ah SAC Ralkap Mawtaw Bomb Puahhnawh An Tong I, Ralkap 10 An Thi: Sagaing Ramṭhen, Watlet peng ah nihin August 12 zaanlei sang ah Mawṭaw pali in a rami SAC ralkap cu bomb puahhnawh an si i 10 an thi, tiah PDF phufonh nih cathanh an chuah. August 12 zaanlei sumilam 2:45 ah Sagaing ramṭhen, Shwe Bo in Ralkap Mawṭaw ngan pali cu Watlet peng, Hlahtaw (လှတော်) khua lei an kal lio ah Shwe Bo pengkomh battalion 23, tatkhuai 1, Shwe Bo Defense Force, Daung PDF nih bomb lung 30 hrawng kan puah hnawh hna i 10 nak tlawm lo an thi, tiah Shwe Bo pengkomh Battalion 23 nih an cathanh ah an langhter.
KNU Brigade 3 Hmunram Kahdohnak Ah SAC Ralkap 12 An Thi! KNU Brigade 3 hmunram, Nguanglaypin pengkomh, Mung peng chung ah SAC ralkap le KNLA Battalion 8 cu a luancia August 5, 6 le 10 ah kahdohnak voi li a chuak i, SAC ralkap 12 an thi, hliamhma pumi zong an tam, tiah KNU nih cathanh an chuah.
Mung peng, Teypaw(တယ်ပေါ) le Karen Myatye(ကရင်မြက်ရဲ) khua kar ah SAC ralkap le KNLA Battalion 8 cu, August 10 zing sml 9 le 10 hrawng ah voi hnih kan i kap. SAC ralkap 9 an thi, tiah an langhter. August 5 le 6 ah kahdohnak voi hnih a chuak i, SAC ralkap Warrant Officer pakhat telh in ralkap 3 an thi, KNLA lei in a thimi le aa hliammi an um lo, tiah theih a si.
Sagaing -Monywa Motor Lampi Ah SAC Ralkap Bomb Puahhnawh An Tong I Ralbawi 2 An Thi! Sagaing ramthen, Pale peng, Inmahtee (အင်မထီး) khua i a ummi, Phyosawthi sakhan cu August 10 zinglei sml 7:30 hrawng ah tualchung hriamtlai phu nih an kah hna i kahdohnak a chuak, tiah tualchung hriamtlai phu nih an thanh. Phyosawhti sakhan cu CIATHIT PIOHCIA, Pale battalion 1, 2, 3, Guerilla Ranger Pale Bataillon 6, Black God piohcia (myaing) le Myaing PDF phufonh hna i bawm in hriamngan le hriamhme in an kahdoh hna. Kahdohnak ah SAC ralkap a thimi zat cu fiang in kan thei kho rih lo tiah an chim.
August 10 zaanlei sml 3:55 hrawng ah Sagaing in Monywa lei ah a kalmi SAC ralkap motor Pajero 1 cu lampi ah tualchung hriamtlai phu hna nih bomb an puahhnawh hna i, SAC ralbawi 2 an thi, tiah Myaing PDF le CDSOM hna nih an thanh. Cu bomb puahhnawhnak ah cun People’s Defense Force – Myinmu(MMU PDF), Myinmu Civil Revolution Force(CRF Myinmu), Myinmu Lighting Guerilla Force hna nih Pa-de-ta bomb lung 3 an puahhnawh hna, tiah theih a si.
Cu bantuk ṭhiam in nizaan August 11 chun sml 12 :30 hrawng ah Mandalay ramthen, Nganyun (ငန်းဇွန် ) in Nganmyia (ငန်းမြာ) lei ah a kalmi SAC ralkap motor 14 a dongtu, ralkap 5 hrawng nih zulh mi Mark-2 motor cu a kir lei ah PDF nih bomb an puahhnawh hna. Cu kahdohnak ah cun hliamtuar mi an um i, a thi mi an um le um lo fiang in theih a si rih lo tiah an thanh. Cu bomb puahnak ah cun CDSOM, M2W, Ngayunpyi (ငါန်းဇွန်ပြည်) PDF, Mansuaikyia(မာန်ဆွယ်ကျား) le Special Force hna an i tel, tiah theih a si.
Shan Ramkulh Ah SAC Ralkap lmLe KIA Kar Kahdohnak A Chuak I, SAC Ralkap 3 An Thi: Shan ramkulh thlanglei, Kutkai(ကွတ်ခိုင်) peng, namhpatkar(နမ့်ပတ်ကာ) khuakomh, Khumong (ခိုမုန်း) khua pawng ah nizaan August 11 zaanlei sml 3 hrawng ah khan SAC le KIA kar kahdohnak a chuak i, SAC ralkap 3 hrawng an thi, tiah theih a si.
SAC ralkap lei cu hliam tuarmi an tam caah Namhpatkar ah umhmun a khuarmi khah-lah-yah (ခ.လ.ရ)(123) in SAC ralkap nih KIA Bataillon 9 umnak lei cu hrimangan in an kah bawmh hna, tiah khuami pakhat nih media ah a chim. Kahdohnak a chuahnak hmun cu Namhpatkar khua in meng 7 a hlatnak Khumong khua pawng ah a si i cu khuami hna chung in hliam tuarmi an um lo, tiah khuami hna sinin theih a si. Khumong khua telh in Namhpatkar khuakomh cu minung 1600 hrawng umnak a si.
Shan ram thlanglei, Muse peng, Namhpatkar khuahlun ah a luancia August 1 lio zong ahkhan SAC ralkap le KIA kar kahdohnak a rak chuak, tiah khuami hna nih cun an chim.
Relchih; Russia Cu A Lo Hoi Ko!, August 9, 2022 i Saki, Crimea Russia air base cu Ukraine long range missiles nih a den ciammam i Russia raltuknak Vanlawng thatha ceilak an hrawh piak. An hrawhmi Russia raltuknak vanlawng pawl cu; Su-27s pariat, Su-30SMs pali, Su-24s panga, Mi-8s paruk le II-20 pakhat an hrawhmi hi asi.
Mon Ramkulh, Ye Peng Ah SAC Ralkap Motor 6 Bomb Puah An Ton Caah Ralkap 4 An Thi, Mon ramkulh, Ye peng Pinetaw(ပိန္နဲတော) khua pawng ah nizan August 11 zanlei sml 2:30 hrawng ah, SAC ralkap motor 6 cu bomb kan puahhnawh hna i, ralkap 4 an thi, tiah Taung Ngio Guerrilla phu nih an thanh. “Ralkap an ra ti thawng kan theih caah kan bawh hna i, kan kah hna. SAC ralkap lei in 2 cu faak ngai in hliamhma an pu. Ralkap 4 cu a hmun ah an thi. Kanmah lei in a thimi le aa hliammi kan um lo,” tiah Taung Ngio Guerrilla phu in ṭuanvo ngeitu nih a chim.
SAC ralkap motor cu, Ye in Thanphyo Zayet lei a kal lio ah Pinetaw le Wyatharaye(ရွာသားအေး) khua karah bomb puahhnawh an tong tiah theih a si. Ye- Thanphyo Zayet lam cu SAC ralkap nih ralkap ṭhialkamnak, riahcaw phorhnak le zen-kuan phorhnak ah an hman ngaingaimi lam a si, tiah theih a si.
Fordes nih a man a tuak i US $380 million man asi ati. Hi Saki airbase ah Russia vanlawng a ummi dihlak hi US $650 million in $850 million kar man vanlawng a um ti asi. A zatceo cu an hrawh piak ko rua hi. Russia nih a sunghmi hriamnam hi US $ trillion tamtuk man asi cang.
Nihin cun Russia nih Ukraine a kah Ni 170 nak a tling cang, Russia ralkap 43,200 an nunnak a liam cang, tiin Ukraine nih cun a chim. US lei nih an zumh ning ahcun a tlawmbik Russia ralkap thimi, hluamtuar, a zaam mi le tlaihmi hi 80,000 renglo an tling cang lai a ti.
Soviet–Afghan War (1979–1989) kum 10 chung ahkhan Russia (Soviet) ralkap 14,000 tluk lawng an rak thi, tutan Ukraine ral cu thla 6 te lawng asi rih nain Russia ralkap thimi lawng thong sawm nga tluk deng an nunnak an liam manh. Hi tining tein thil a kal ko ahcun Russia nih zeitilam hmanh in a celh cawk te lai lo, hmasawnnak lian ngaingai le tuhi a ngei fawn lo caah a kir zau ahhin a caah a damnak thabik asi ko lai dah.
Rili ah a Tla mi an Raltuknak Vanlawng US Navy nih an Char, Hi vanlawng hi dollar million tampi man a si i, kan hnung zarh ah khan, kan vanlawng phurtu tilawng (Carrier) nih meng 2 tluk a thuhnak Mediterranean Rili ah a thlak sual i, a tu cu kan char khawh than cang, tiah Monday ah khan US Navy nih a chim. Italy ah hmunhma a khuarmi US Sixth Fleet (tilawng run) nih an chim ningah, ruahlo piin nikhua a chiattuk caah, Nimitz-class Carrier USS Harry S.
Truman i chiahnak hmun in F/A-18E Super Hornet vanlawng hi July 8 ah tili chung a tlak hi a si. August 3 ah khan thatein kan char than i, Europe i vanlawngkawrawn pakhat ah an chiah cang. Duhsah in US lei ah an kirter te lai, tiah theih a si. Pe 9,500 a thuhnak Mediterranean Rili tawne chungin F/A-18E cu kan char. CURV-21 tilawng kan i hman i vanlawng cu kan cawi. Sio bantuk thir ai kuaimi cu hri ah an thlaih i, vanlawng cu an sio. Bahamas-flag ai tarmi phuntampi rian a tuan khomi tilawng nih a char a kan bomh, tiin the Sixth Fleet nih an chim.
Kan i timhmi can chung te ah rian thatein lim kho dingin kan team pawl an cawlcang hna. Vanlawng umnak kawl le char hi suimilam 24 chungah kan lim. Kan team hna an thazaang chuahmi le thiltikhawhnak thawngin a si, tiin Lt. Miguel Lewis, Sixth Fleet officer, nih a chim. Vanlawng a tlak nak in kan char than karlak hi ni 27 a rau. A thukmi rili chung hmanh ah US Navy nih kawlhawlnak thatein a tuah khawh ko, vawleicung pumpi zongah kawlhawlnak rian a tuan khawh ko, timi hi tutan kan dirhmun nih a langhter, tian Sixth Fleet nih an chim.
F/A-18E hi 2021 December lio tein khan Harry S. Truan Carrier Strike Group ah an hman cang i, Carrier Air Wing One, timi mission ah telh ve mi vanlawng a si. A hramthok ah cun Harry S. Truman carrier hi Middle East kongkau he pehtlaiin rian an fialmi a si nain, Russia le Ukraine an buai hnu in Europe ah an thial than hi a si. Eastern Europe i ral a thawh hnu in cun, NATO sentariconghnak ah punghmangtein ai tel.
July i vanlawng tic hung a tlaknak a ruang hi Sixth Fleet nih an hlathlai lio pi a si. Punghman in cun hi vanlawng hi tilawng a tuangphah cungah cincik in thatein hren tawn peng a si ko. Cuaah tutan thil a cangmi hi punghman thil cu a si ruam lo, tiah mifim nih an chim. January zongah khan, F-35C Lightning II vanlawng zong South China Sea ah a tla bal. USS Carl Vinson carrier i an chiahmi a si ko nain, amahtein rili chungah a tla, tiah theih a si.
The Pacific Fleet le Naval Sea System Command nih zarh nga lenglo chung char an zalh hnu ah, March ah khan pe 12,400 a thukmi rili tawne in the 5th Generation fighter (F-35C) cu an char khawh. Asinain, cu kong cu rili ralkap (US) 5 nih a thli in hman an thlak i online ah an tar ruangah dantat an i huah, tiah theih a si.
Leave a Reply