Kahdohnak Thawngpang Tha Fonh!!
================
Palaw Ah Rallam A Sialmi SAC Ralkap Cu PDF, KNDO Le KPDF Nih An Kah Hna Caah SAC Ralkap 20 Leng An Thah Hna, Tannitharyi ramṭhen, Palaw pengah rallam a sialmi SAC ralkap motor cu PDF, KNDO le KPDF hna i bawm in kan kah hna caah SAC ralkap 20 leng an thi, tiah anmah ṭangṭi phu nih cathanh an chuah.
Nizaan October 3 zaanlei sml 2:30 hrawngah Myeik in Palaw lei ah a kalmi SAC ralkap motor 2 le lam a him le him lo ral a venpiaktu SAC ralkap motor hna cu, KNDO/PDF ṭangṭi phu hna nih an kah i SAC ralkap 20 leng an thih pinah motor 2 cu a hmun ah a rawk dih, tiah theih a si. Cu hnuah Myeik in a chuakmi SAC ralkap motor 2 cu Palaw Pah Kah Phah chungtel a simi Ayeik(အရိပ်) Guerrilla phu(PSGF) ralkap hna nih bomb in puahhnawh ṭhan hna caah SAC ralkap a thimi a um. Cu kahdohnak voihnih chungah SAC lei in minung 20 leng an thi i, 10 hliamhma an pu. SAC ralkap a thimi ruak cu, October 3 zaan sml 8:30 hrawngah motor 2 nih a lak hna, tiah cathanh an chuah.
October 3, Nikhat Chungah SAC Ralkap 47 An Thi, 11 Nih Hliamhma An Tuar, October 3, nikhat chung a cangmi kahdohnak ah SAC ralkap chungtel 50 hrawng an thi tiah NUG nih cathanh an chuah. Atu langhter mi SAC ralkap a thimi cazin nak in a lengah a thimi an tamdeuh kho i, nikhat chung ah minung 11 nih hliamhma an tuar tiah an langhter. NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah cun an langhter.
Kani Ah SAC Ralkap Thilri Chantu Tilawng Cu Kah An Ton Caah SAC Ralkap 10 Nak Tlawm Lo An Thi, Tilawng Pakhat A Kaang, Sagaing ramṭhen, Kani peng Kanpyu(ကမ်းပြို) hmunram ah SAC ralkap thilri chantu tilawng 13 cu Monywa, Alone tilawng dinhnak hmun in an chuak i, Chin Dwin tiva hrawn in an kai, cu an kal pah ah PDF ṭangṭi phu hna nih nizaan October 3 zaanlei sml 3:30 ah an kah i, SAC ralkap 15 an thi, tilawng pakhat a kaang, tiah Kyauk Lone Gyi PDF sinin theih a si.
“Thilri chantu tilawng 13 chungah pakhat cu a kaang, sniper in ralkap 5 kan thah hna. Ralkap pawl nih an hmanmi pehtlaihnak(phone) chungin kan theih ning ah ralkap 15 an thi. Tilawng hna cu Chaung Wagyi(ချောင်းဝကြီး) khua tilawng dinhnak hmun ah an riak i, tilawng a kaangmi zong an remh cuahmah. Khanti(ခန္တီး) tiang a kal ding a si tiin kan theih,” tiah Kyauk Lone Gyi PDF ralkap pakhat nih a chim. Cu tilawng nih cun mizaw phorhnak motor hna telh in vanlawng Diesel le zen-kuan an phorh, tiah a chim chap. Cu kahdohnak ah KLG PDF, Pyidaungsu Liberation, Moustache phu, Yinmarbin le Kani ṭangṭi phu hna i bawm in an kah hna, tiah theih a si.
Salingyi Peng Ah Bazar A Kalmi Palik 4 Kah Thah An Tong, An Meithal An Zong An Lak, Sagaing ramṭhen, Yinmarbin pengkomh Salingyi(ဆားလင်းကြီး) peng Ngaungpingyi(ညောင်ပင်ကြီး) khua, Nyaungpingyi-Salingyi lam tonnak pawng ah nizaan October 3 chunhnu ah bazar a kalmi palik 4 cu, kah thah an tong i an meithal zong an chuh hna, tiah tualchung mi hna nih an chim.
“Nyaungpingyi palik sakhan in thil cawk dingah a chuakmi palik 4 cu civil motor a raangmi cungin an kah hna,” tiah mithmutu pakhat nih a chim. Yinmarbin pengkomh palik he aa naihniam mi pakhat nih, “Chun hnu sml 1:00 hrawngah Nyaungpingyi palik sakhan in thil cawk ding in a kalmi palik Lieutenant Sergeant simi Ngi Ngi Thwe le Se Thu Soe, palik Aung San Win le palik Zin Ko Phyo cu Alphard motor a raangmi pakhat in an bawh hna i an kah hna caah an 4 ning in an thi. An meithal zong an lakpiak hna,” tiah a chim.
A luancia July 22 zinglei ah thil cawk dingin bazar ah a kalmi palik 4 zong lakphak dawr an ṭhut lioah kahthah an rak tong i, an meithal zong an rak lakpiak cang hna. Salingyi peng chung thla thum chungah palik kahthah an ton hi a voihnihnak a si cang, tiah theih a si.
Karen Ramkulh Ah SAC Ralkap Sakhan Pakhat Cu Drone In Kah A Ton Caah SAC Ralkap 2 An Thi, 4 Hliamhma An Pu, Karen ramkulh Gyia Ing Seikgyi(ကြာအင်းဆိပ်ကြီး) peng Chuang Hnakhuah(ချောင်းနှစ်ခွ) hlei um SAC ralkap sakhan cu, October 2 ah drone in bomb kan thlak caah SAC ralkap 2 an thi, Sergeant 1 le ralkap 3 cu hliamhma fak ngai an pu, tiah Saw Dragon Drone Force – SDDF in ṭuanvo ngeitu pakhat nih a chim.
A luancia September 29 lio zongah Gyia Ing Seikgyi peng Takey(တဂေး) khua pawngah rallam a sialmi SAC ralkap pawl cu SDDF, KNLA Battalion 17 le Red Naga hna i bawm in bomb lung 3 an rak puahhnawh hna caah SAC ralkap 3 an rak thi. SAC ralkap nih khuami an phone an chuh han i artlang in an chiah hna. Khua leng ah an chuahter hna lo i an hrem hna caah kan kah hna hi a si, tiah Saw Dragon Drone Force – SDDF in ṭuanvo ngeitu nih cun a chim. Cu kahdohnak ah SAC ralkap 5 an thi i, 4 cu hliamhma fak ngai an rak pu. PDF ṭangṭi phu lei in a thimi le aa hliammi an um lo.
Banlaw Khua Pawng Umhmun Khuarmi SAC Ralkap Cu PDF Nih An Kah Caah Ralkap 4 An Thi, Tanintharyi ramṭhen, Banlaw(ဘန်လော) khua pawngah umhmun khuarmi SAC ralkap pawl cu PDF ṭangṭi phu hna nih kan kah caah SAC ralkap 4 an thi, tiah Myeik PDF Battalion 2 in nizaan October 3 ah cathanh an chuah. Cu kahdohnak cu October 1 zanlei sml 4:30 hrawng in ai thok i, Myeik Battalion 2, Companny 1 le Betmaleik(ဘက်မလိုက်) Guerrilla le SWDF hna i bawm in an kah hna caah SAC ralkap 4 an thi, 2 hliamhma an pu.
Cu kahdohnak a daih in SAC ralkap nih khua chungah October 2 zaan ah hriamngan in an kah caah tualchung mi hliamhma a pumi an um, asinain hliam pumi mi bel hngalh a si rih lo, tiah theih a si. Kahdohnak hi zeitik caan paoh a chuak khomi a si caah mizapi um kal kongah ralring tein um dingah Myeik Battalion 2 nih cathanh an chuah.
Mon Ramkulh, Karen Ramkulh Le Sagaing Ramṭhen Kahdohnak Ah SAC Ralkap 15 An Thi, Mon ramkulh, Ye peng Khawzar(ခေါဇာ) khua October 3 zanlei sml 5:00 ah Mon ramkulh thlanglei ummi MSDF-S le SAC ralkap Khah Lah Yah 31 kar kahdohnak a chuak i, mins 25 chung hrawng a rau. Cu kahdohnak ah SAC ralkap 3 an thi, tiah cathanh an chuah.
Karen ramkulh, Brigade 6 hmunram Taungni(တောင်နီး) khua pawngah SAC ralkap Khah Mah Yah 104 cu October 1 ah KNLA Battalion sniper nih kan kah hna i, ralkap 1 a thi. Nizaan October 3 ah kan kah ṭhan hna i SAC ralkap 3 an thi chap, tiah Cobra Column nih cathanh an chuah. Sagaing ramṭhen, Khin U peng ah October 3 zinglei ah Mutein(မူးတိမ်) tiva hlei ummi SAC ralkap pawl cu sentari conghnak inn an sak tiin thawng kan theih caah drone in bomb kan thlahnawh hna i SAC ralkap 8 an thi, tiah Khin U peng thawngpang fianternak phu nih cathanh an chuah.
SAC Ralkap Bawi Pakhat Nih Dalan Na Si A Ti I Palik Pakhat A Hngawng A Tan, Magway ramṭhen, Pauk peng Zipyia khua pyusawhṭi training kainak sakhan cu PDF nih an luhhnawh hna, cu lio ah SAC ralbawi nih palik pakhat cu dalan na si tiah a ti i a hngawng a hleh hnu ah a phum tiah theih a si.
Ye Ah SAC Ralkap Thawngpetu A Umnak Inn Lila Ah Kahthah A Tong, Mon ramkulh, Ye peng Kyunelaung(ကျူံလောင်း) khua hlun ah a ummi SAC ralkap sin thawngpetu U Aung Myint cu kan fimhlawm tiah Mon State Revolutionary Organization (MSRO) nih an thanh. Nihin October 4, zinglei suimilam 9:00 hrawng ah, a umnak inn ah MSRO phu nih meithal voi 15 kah in kan fimhlawm tiah an chim.
“A umnak inn ah kan fimhlawm, a chungkhar cu zeihmanh kan ti hna lo, March thla lio MSRO kah an ton lio ah SAC ralkap sin ah thawngpeknak a tuahtu a si, SAC ralkap sin in sing 25 a ngah tiah kan theih” tiah MSRO phu in ṭuanvo ngeitu nih a chim. Kum 40 tluk hrawng a si mi U Aung Mint cu kah a tonnak hmun ah a thi colh, a ngandamnak a ṭhat lo caah inn ah chae(ချဲ) zuar in a um, cun SAC ralkap sin ah thawngpeknak a tuah tiah theih a si.
October 2, chunhnu suimilam ah pyusawhṭi sakhan cu luhhnawh an tong, palik pakhat nih thawngpeknak a tuah an ti caah Pauk le Myaing peng aa tonnak Tayatpinṭaw(သရက်ပင်တော) tiva pawng ah palik pa cu an thah i a ruak cu vawlei ah an phumtak tiah Myaing PDF in ṭianvo ngeitu nih a chim. Sakhan luhhnawhnak cu chunhnu suimilam 1:30 hrawng ah a cang, sinain palik pa thah a ton caan hi zaanlei suimilam 4:00 hrawng ah a si, khah-lah-yiah 258 in ralbawi pakhat nih a thah tiah mit hmutu nih a chim tiah theih a si. Crd-The Chin Post
Leave a Reply