Good News; Min Aung Hlaing cu a kehlei kuat chiah he aa khat cang ko!!

Madaya Ah SAC Ralkap Bomb Puahhnawh An Tong, 4 An Thi+Gyainsaitkyi Peng SAC Ralkap Sakhan Pakhat KNLA Phufonh Nih An Lak, Ralkap 17 Nih An Hriam An Chiah + Kahdohnak Thawngpang Tha Fonh!!
========================
Mandalay ramthen, Tadaphyu khua hleidonh cung ah checkhlatnak a tuahtu SAC ralkap phu hna cu October 26, zinglei suimilam 7:30 hrawng ah bomb puahhnawh an ton caah SAC ralkap 4 an thi tiah theih a si. SAC ralkap hna cu Naga Ngyinaung tualchung hriamtlai phu, Natsoe phu, MDY PDF((Mongoose Squadron) , Taitthein(တိုက်သိမ်း) phu, NUG: FF phufonh hna nih an kahdoh hna tiah theih a si.

Madaya ni chuahlei ah mipi hna umnak inn cu mei khangh in a hrawktu le tlaihkhihnak tuah in hramhram in tualchung mi a thattu SAC ralkap hna cu Tadaphyu khua hleidonh ah mi chawklet hna cu lam kham in checkhlatnak an tuah lio ah bomh puahhnawh in kan doh hna tiah Naga Ngyinaung phu nih an chim. Kayin ramkulh, Gyainsaitkyi peng Kyaitdune(ကျိုက်ဒုံ) peng SAC ralkap khah-mah-yiah 339 hrambunh sakhan pakhat cu October 26, zinglei ah KNLA phufonh nih kahdoh ah tuah hnuah an lak khawh tiah KNLA brigade 6 in tat-hmu-kyi pakhat nih a chim.

SAC ralkap hna tat-mah pakhat si mi no.13 Operations Command Headquaters kuttang um khah-mah-yiah 339 hrambunh Kuilungtai(ကွီးလုံးတိုင်) sakhan cu kahdoh in an lak khawh, SAC ralkap 17 nih an hriam an chiah i, meithal 43 le hriamnam thil tampi zong an lak khawh tiah theih a si. SAC ralkap sakhan laknak ah SAC lei nih hriamngan le helicopter hmang in bawmhnak an pek leng ah van lei kahdohnak zong an tuah nain SAC ralkap sakhan cu hlawh tlinnak he kan lakkhawh tiah KNLA nih an chim.

India-Myanmar ramri Chin ramkulh, Falam peng Rihkhawdar khua pawng ah SAC ralkap hna cu bomb puahhnawh in doh an ton caah SAC ralkap 5 an thi, hliamhma tuar an tam tiah Mountain Eagle Defence Force (MEDF) hna sin in theih a si. October 26, zinglei suimilam 8:30 ah Rihkhawdar no.2 sang tlangcung ah umhmun khuarmi SAC ralkap hna cu khuachung ah eiding riahcaw an lak i an kir lei ah bomb puahhnawh in doh an ton hi a si tiah theih a si.

“Padeta bomb kan hmanhmi cu a hlatnak hmun in kan puahhnawh hna, a thimi SAC ralkap ruak cu an pawngkam ah an hmuhmi bawm ah khumh in mei an khangh hna” tiah MEDF in ṭuanvo ngeitu pakhat nih a chim. SAC ralkap bomb puahhnawh in kahdoh an ton hnu ah, meithal tamtuk an thlah na in tualchung hriamtlai phu lei hliamhma tuarnak umlo in hnu an tolh kho tiah theih a si. Rihkhawdar cu Myanmar-India ramri ah a ummi a si i, India, Mizoram ramkulh le Myanmar Chin ramkulh kar ramri ah a ummi khua a si.

Sagaing ramṭhen, Monywa-Ayartaw motor lampi cungah SAC ralkap phurtu thir in khammi motor pakhat cu, PDF nih nizan October 25 zinglei ah bomb in an puahhnawh caah SAC ralkap 3 an thi, tiah theih a si. Monywa in a chuakmi SAC ralkap motor cu Black Dragon Special Task Force nih bomb lung 6 in an puahhnawh caah ralkap 3 an thi, hliamhma pumi zong an um. Bomb puahhnawh nak tlamtling tein an lim hnu ah hnu an tolh kho, a thimi le aa hliammi um lo tiah theih a si.

RELCHAP, Indonesia Nichuah Lei Rili Ah Tilawng A Kang, A Nunnak Liammi 17 Tiang An Phan, Indonesia ram nichuah lei rili ah tilawng mei kanghnak a chuakmi ruang ah a thi mi hi minung 17 tiang an phan tiah cozah lei in ṭuanvo ngeitu hna nih October 25 ah an chim tiah theih a si. KM Express Cantika 77 tilawng cu East Nusa Tenggara ramkulh Timor a lonh ah October 24 ah tilawng cu mei kanghnak a chuak i, tilawng chung cuangmi hna cu lautuk in an um caah tichung ah cun an zuang hna tiah theih a si.

Cu tilawng cu Kupang in Alor, Kalabahi lei an kal ah mei kanghnak a chuah hi a si. Rili chung ah cun mi ruak kawlnak an tuah i, tilawng mei kanghnak a chuah ruang ah a thimi ruak 17 tiang hmuh an si cang tiah mi bawmhchanhnak a tuahtu phu in Putu Sundayana nih a chim. Rili chung ah tilawng mei kanghnak a chuah ruang ah nun bu in an chanhchuh mi hna hi minung 312 an si tiah theih a si. Tilawng a kanghnak kong ah zei ruang ah a kangh theih fian a si rih lo. A luancia 2018 lio ah Sumatara tiva a thuhbiknak hmun ah tilawng pakhat a rak pil bal i, culio ah cun minung 150 leng an rak thi.

Myanmar Hrambunh Joom Application Software Deu Hmang In Tangka Kyats Sing Thong Tam Tuk An Hlen Cang Hna, Vawleicung minthang Online Companny pakhat a simi Joom Companny min le Logo hmang in website deu, software deu le application deu hmang in MLM phun in tangka an rawnter hna i, mi an kawl hna caah kyats sing thong tam tuk an hlen cang hna, tiah hlen a tong mi hna nih Khit Thit Media ah an chim.

Myanmar ram chungah Joom Companny le Logo deu hmang in minung 19,000 leng hlen an tong cang hna, tiah theih a si.
“Joom Software in hlen a tongmi an tam tuk cang. Cheukhat cu harsat tuk ruangah do an cawi i a lutmi zong an um. Cheukhat cu rian an hmuh lo caah a lutmi zong an um. Joom Software ah tangka chuah kan duh kan ti len zong ah a ngah rih lo an kan ti lengmang,” tiah hlen a tong vemi pakhat nih a chim.

Joom Software ah chungtel pakhat in luh ahcun $ fang 3 nan co lai i mithar nan hmuh chap khawh hna ahcun nan rian a kai lai, tiin an hlen hna. Chungtel sinak in luh duh ahcun $70 pek a si. Thilri zong order deu in ṭin ahcun ni fatin tangka a lut lai tiah an rak hlen hna i, Kpay in tangka cu chuah a ngah lai an rak ti hna i, nihin tiang minung tam tuk an hlen cang hna, tiah theih a si.

Myanmar hrambunh Joom Software deu cu a luancia September thla lioah ngiathlaitu hna nih ralrin peknak ca an rak ṭialhnawh cang hna. Vawleicung minthang online company Joom cu thil dik thil hman tein thil a zuartu a si. Joom Software min deu hmang in minung 19,000 leng a hlengtu hna phone number cu a tanglei langhtermi hna hi an si. 09- 670048290 ၊ 09 686547123 ၊ 09 686074205 ၊ 09 674089529 ၊ 09 665758024 ၊ 09 699323483 ၊ 09 670623721 ၊ 09 683063206 ၊ 09 689495943 ၊ 09 691939818 ၊ 09 675892933 ၊ 09 686334027 ၊ 09 691752239 ၊ 09 774691325 ၊ 09 965077891 hna an si.

Pale PDF Sakhan Cu SAC Ralkap Nih Jet Fighter Le Helicopter In An Kah, Anmah Lei Ṭang Dalan An Tlaih Hna, Sagaing ramṭhen, Pale peng um PDF sakhan cu SAC ralkap nih vanlawng hmang in an kah, tiah theih a si. SAC ralkap nih Phalanpin(ဖလံပင်) khua pawng um PDF sakhan cu, vanlawng 5 in nizan October 25 zanlei sml 1:00 hrawngah an kah i an lak. PDF ralkap lei nih an sakhan an chuahtak nain anmah cu an him dih. Dalan an tlaihmi an hrenmi hna lawng an tan caah SAC ralkap nih dalan cu an tlaih hna, tiah theih a si.

“Jet Fighter 2 nih an kan kah hmasa hnuah Helicopter 2 nih ralkap a chiah hna. A hlankan in thawng kan theih cia cang caah a himnak hmun ah kan hrial cang. Kanmah nih kan tlaihmi dalan lawng an taang i, cu hna cu an tlaih hna. Hriamnam kan serchuahnak sakhan le kan zungkhan pakhat cu SAC ralkap nih an khangh,” tiah PDF hruaitu pakhat nih a chim.

Kum 50 Leng Tak Aa Kholh Ti Lomi Kum 94 Tarpa A Nunnak A Liam, Kum 50 leng tak aa kholh ti lomi vawlei cungah a caak bik le a thurhnawm bikmi kum 94 tarpa cu nizan October 25 ah a nunnak a liam cang, tiah theih a si. Iran rammi Amuharji cu ka tak kai kholh cun ka zaw lai a ti i, tak kholh loin kum 50 leng a um cangmi a si.

Iran thlanglei Phas ramkulh ah khua a sa mi Harji cu khuami nih tak kholh ding in an lem lengmang ko nain a cohlang duh lo. A luancia thla tu ah khan tak kholh ding in an lem lengmang caah a rak cohlan hna. Kum 50 leng tak aa kholh ti lo hnuah a voikhatnak tak aa kholh i, a zawt beh caah a luancia zarh ahkhan Harji cu a nunnak a liam, tiah theih a si.

Kum 2014 lioah Tehran Times nih Harji cu biahalnak an rak tuah i, saram a raangmi sa ka duh tiah a rak leh hna. Harji cu vawlei khur pakhat ah tlakrawh in a rual i cu chungah khua a sami a si. A ruang cu midang nih hnahnawhnak an ka pek sual lai ti a phan caah amah lawng in a um hi a si.

Kum 50 leng tak aa kholh ti lomi Harji cu a takvun ah a chah pipi in an bo i an kak dih cang. A ei dinmi zong a hnawmmi lawngte a si. Khuami hna nih Harji cu tak kholh ding le a thianghlim mi tirawl pek ding in an i timh paoh ah a thin a hung i, a lung a rawk tawn. Cu hnuah khuami nih amah duh ning tein an chiah, tiah theih a si.

Cyclone Thlichia A Hran Ruangah Bangladesh Rammi 16 An Nunnak A Liam, Sing 5 Hrawng An Zam, Bangladesh ram ah Cyclone thlichia a hran caah rammi 16 nak tlawm lo an nunnak a liam i, sing 5 hrawng a himnak hmun ah kan ṭhialkam hna, tiah ṭuanvo ngeitu pakhat nih a chim. Rili kam ummi pengkomh 15 chungin rammi sing 10 leng cu electric mei a rawh ruangah sianginn an khar, tiah theih a si.

Cyclone thlichia a hran lengmang nak a ruang hi khua caan aa thlen ruangah Pacific rili ah atu le atu Cyclone thlichia a hrannak hi a si, tiah Seintist hna nih cun an langhter. “Cyclone thlichia cu nizan October 25 ah Bangladesh ram a phan i, rammi sing 5 hrawng cu a himnak ah kan ṭhialkam cang hna,” tiah an thanh.

Bangladesh ram chaklei Jamuna tiva ah tilawng pakhat a pil i minung 2 an nunnak a liam. Thingkung cungin minung 14 an tla i an nunnak a liam, an dihlak 16 an nunnak a liam, tiah Bangladesh cozah nawlngeitu Jibon Naha nih a chim. Bangladesh rammi sing 5 hrawng a himnak hmun ah cozah nawlngeitu hna nih ṭhialkamnak an tuah hna nain, Myanmar ram in a zammi Rohingyia 33,000 leng cu an umnak ralzam camp ah an chiah ko hna, tiah theih a si.

Thantlang Peng Ah Thlichia Le Ruah Nih Tlanglo Facang Le Nelrawn Facang A Hrawh Dih Hna Chin ramkulh, Thantlang peng ah a luancia zarh ruah a surmi le thli ahrang mi nih facang tam tuk a hrawh hna, tiah theih a si. Thantlang peng mi pakhat nih, “A luancia zarh ah ruah a surmi le thli a hrang mi nih hleh a za cangmi tlanglo facang le nelrawn facang a hrawh dih hna. Thli le ruah nih a choih i a naan hna caah an kiak i an ṭil dih,” tiah The Chin Post ah a chim.

Tukum cu kum dang bantuk a si lo, Rakhine lei in thlichia a hrang mi nih an kan phak ve caah a si kho men. Ruah fak ngai in a sur pinah thli a hrang tuk. Facang hleh a za deng cangmi hna cu an rawk dih ko, tiah a chim chap. Ral le kokek ral he an kan den tikah zapi zaaran laihlum khuate mi kan caah ahcun mangṭam a tlung ti awk a si ko.

Pipu hna nih mangṭam a tlung an rak ti tawnmi hi, atu kan tonmi harnak bantuk a si ko lai, tiah laihlum pakhat nih The Chin Post ah a chim. A luancia zarh ah fak tuk le pehtlai in ruah a sur caah Hakha khua chung, Falam khua chung le Tedim-Kalay kalnak lam zong an chim, tiah theih a si. Crd-The Chin Post

Be the first to comment

Leave a Reply

Your email address will not be published.


*