Ramkip zukthaimi hmuhsaknak ah Daw Aung San Suu Kyi zuk zong an tarlangh!
================================
India ram, Mizoram ramkulh Aizawl ah tuahmi ramkip zukthai hmuhsaknak (International Art Exhibition) ah Daw Aung San Suu Kyi zukthaimi zong aa tel tiah theih a si. “Love Revolution” tiah min pekmi ramkip zukthai hmuhsaknak cu Aizawl khuachung Milinium centre ah September 21 in honnak an tuah i September 24 tiang an tarlangh lai tiah theih a si.
Cu zuksuaimi hmuhsaknak ah cun Chin miphun simi C.Puaia nih a thaimi cu Myanmar rampi ruahnak petu Daw Aung San Suu Kyi zuk telh in ram 36 nih thaimi zuk hna an langhter tiah theih a si.
Ramkip zukthaimi hmuhsaknak cu Lalhmingmawii(Amoii) hruainak in tuah a si i, Mizoram ramkulh ah minthang zukthai thiam Tlangrokhuma, Buta, Lalbiaklara, Rohnuna hna telhchihin India ram zukthai lei saya 72 le ramkip in zukthai saya 50 hna nih thaimi zuk hna cu hmuhsaknak an tuah tiah theih a si.
Relchap (CRd-The Chin PosT) Taze Ah Ni 6 Chungah Voi 15 Inn An Khangh Pinah Tualchungmi 10 Thah An Ton, Sagaing ramṭhen Taze peng chungah ni 6 chungah khuate 12 ah voi 15 tiang meikhangh piak kan ton pinah tualchungmi 10 meikhanghnak in an thah hna tiah mipi ukhruainak phu nih cathanh an chuah.
SAC ralkap pawl cu September ni 17 in 22, ni 6 chungah Taze peng khuate hna ah lut in, inn khangh, tualchungmi tlaih i ralphaw ah kalpi le thah tihi nitin ngawt in an tuah theih a si. SAC ralkap pawl cu Taze peng chungah hin a hlannak in rallam an sial caah khuate 30 in tualchungmi minung 17000 hrawng cu a himnak ah ral an zaam hna tiah theih a si.
Naypyidaw um sianginn ca chimtu saya pakhat kum 20 chung though lak a si, Naypyidaw, Laywai peng um private sianginn ah ca chimtu saya Ko Yee Soe (kum 24) cu Naypyidaw biaceihzung nih September 19 ni ah kum 20 thong thlak dingin biakhiahnak an tuahpiak tiah, biaceihzung he neihniam in a ummi hna nih nihin September 22 ah RFA ah an chim.
Phungrelnak caang upadi poh-mah 50(j) he sual puhnak pahnih ṭhen in sualpuhnak pakhat caah kum 10 thong tiin kum 20 thong thlak ding in bia an khiahpiak tiah biaceihzung he aa naihniam mi pakhat nih a chim. ” Nikhat ni ah khan biakhiahnak an tuahpiak, amah cu kum no te lawng a si rih, biakhiahnak an tuahpiak ni ah Yametin(ရမည်းသင်း) thonginn ah an kuat. A mah cu private sianginn pakhat ca a chimh lio ah a luancia January 5 ah khan PDF lei bawmhchanhnak na tuah tiah an puh caah tlaih a rak tong” tiah a chim.
Kyait sakhan lak le kahdoh a si hlan ah SAC ralkap le BGF in minung 6 nih CDM an tuah, Kayin ramkulh, Kawkareik peng SAC ralkap sakhan Kyait(ကြိတ်) sakhan cu September 20 chunhnu suimilam 2:19 ah KNLA le SOG hna nih doh in an lakkhawh tiah theih a si.
SAC ralkap sakhan kahdoh in an lakmi Kyait sakhan cu thlakhat hrawng ngiarcangmi sakhan a si i, cu sakhan lak dingin kahdoh a si hlan ni tlawmpal ai duh ah SAC ralkap le BGF in minung 6 nih CDM cawlcanghnak an rak tuah tiah theih a si. ” Sakhan cu khah-mah-yiah 557 umhmun an khuar, BGF 6 zong an i tel, kan sakhan ngiar in phihkham kan si ah BGF pathum cu an umnak hmun ah an kir, a taangmi pathum nih CDM an tuah, cun an mah khah-mah-yiah 557 in minung 3 nih CDM an tuah ṭhan caah an dihlak minung 6 nih CDM an tuah” tiah tualchung hriamtlai phu leiin ṭuanvo ngeitu nih a chim.
” SAC ralkap Kyait sakhan caah Kyait khuami.hna nih ni khat ah voi thum ti thanpiak an si, cu sakhan lak lio ah hriamthil zong kan lak, SAC ralkap lei 7 an thi, 2 cu an nun buin kan tlaih hna” tiah a chimchap. SAC ralkap lei a thimi hna le tlaihkhih a tongmi hna hi ṭat-kyat-kyi reng zong an i tel i, ralkap reng sangsang nih an sakhan cu an zaamtak tiah theih a si.
Mindat 274 battalion nih hriamngan voinga tiang a thlah caah khuami inn an rawk, Chin ramkulh, Mindat 274 battalion in SAC ralkap hna nih nizaan zinglei ah hriamngan duhtawk in an thlah caah khuami inn an rawk tiah theih a si. Nizaan September 21, zaan suimilam 11:00 luan hnu ah SAC ralkap nih hriamngan le hriamhme hmangin pehtlai thluahmah in an kah caah Mindat khuachung Bawatit sang inn khat hriamngan hliamhnak in a rawk tiah theih a si.
Nihin September 22, zinglei suimilam 7:30 hrawngah 274 battalion in Mindat peng chung Ṭaiṭ-nay (တိုက်နယ်) no. 3 lei ah hriamngan voihnih an kah caah khua pakhat ah inn 2 a rawk i khuami hna zong a himnak hmun ah an zaam hna tiah theih a si. Cun, nihin September 22 zinglei suimilam 10:30 ah 274 battalion in Ṭaiṭ-nay (တိုက်နယ်) no. 3 lei ah hriamngan voithum an kahṭhan tiah theih a si.
Demoso SAC ralkap khah-lah-yiah 102 hriamthil chiahnak hnun puahkehnak a chuak i a kaang, Karenni ramkulh, Demoso SAC ralkap khah-lah-yiah 102 i hriamthil chiahnak cu nihin September 22, chunhnu ah fahkngai in puahkehnak a chuah i mei kanghnak a chuak, cu mei kangh a chuahnak hmun cu tualchung hriamtlai phu hna nih hriamngan in an kahdoh chap tiah KNDF nih cathanh an chuah.
SAC ralkap hriamchiahnak cu an mah ralkap lila nih an kanghmi a si tiah kan zumh tiin KNDF nih an chim. September 22, zinglei in Demoso pengchung KNDF, KA, PDF phufonh hna le SAC ralkap karkahdohnak a chuak, kaphnih kar i kahdohnak ah SAC ralkap lei nih a hlei hluattuk in hriamngan an hman caah Ngwetaung(ငွေတောင်) hrambunh khah-lah-yiah 102 battalion in hriam chiahnak hmun cu chunhnu suimilam 1:30 in puahkehnak a chuak i a kaang tiah theih a si.
SAC ralkap hna nih cun mei hmih dingin an i zuam nain, tualchung hriamtlai phufonh hna nih hriamngan hmangin an kah ṭhan hna caah cu hriam chiahnak hmun cu hmit kho loin puahkehnak pehtlai in a cang i, zaanlei tiang mei cu a kaang, cun cu sakhan in ralkap hna aukhuanthawng zong theih a si tiah KNDF nih an thanhmi ah an langhter.
Yards 1000 Tluk A Kap Khomi Hriamngan PDF Nih Tlamtling Tein An Serchuah, Yards 1000 tluk tiang a kap khomi 60 mm hriamngan cu tlamtling tein kan lim cang tiah Federal Revolution Force (F.R.F) nih cathanh an chuah tiah theih a si. Lamhla kahnak simi 60mm hriamngan le bomb hna cu tlamtling tein kan ser khawh cang tiah an cathanh ahcun an langhter.
Hriamnam sernak lei ah hin phaisa (budget) lei chanbaunak a um ruangah caan kan rau ngai. Mipi sinah bawmh kan hal bantukin nan kan bawmhmi cu man ngei tein ka hman tiah an cathanh ah cun an langhter chih. F.R.F tualchung hriamtlai lawng siloin tualchung hriamtlai phukip nih hriamthil an serchuah mi a phun a tam ngai cang tiah theih a si.
KhinOo dawr chungah palik nu pakhat kahthah a tong, zarhkhat chung ah palik 10 nak tlawmlo an thi, Sagaing ramṭhen, Shwebo pengkomh KhinOo khuachung dawr ah nihin September 22, zinglei suimilam 7:00 hrawngah dawr thil a cawtu palik nu pakhat cu meithal in kah a ton caah a thi tiah dawr thil zuartu hna nih an chim.
“KhinOo peng, pengkulh palik zungah rian ṭuanmi palik Ma Cho kahthah a tong, dawr thil a cawk lio ah a ho si theih lomi hriamtlai pahnih nih an kahthah” tiah palik chungtel hna nih an chim. Sagaing ramṭhen, palik phu hna he naihniam in a ummi pakhat nih ” tutan zarhchung, zarhkhat chungah palik chungtel a thimi hi, nihin zinglei ah khahthah a tongmi palik nu pakhat telhin minung 10 nak tlawmlo an si cang” tiah a chim.
Khuapau dohthlennak caan chungah tualchung minung 2300 leng an nunnak a liam cang tiah AAPP nih thanh, Khuapau dohthlennak caan chungah nunnak liammi tualchung mipi 2303 an si cang tiah ramkhel lei thongtla bawmchantu phu AAPP nih September 21 ah cathanh an chuah. SAC ralkap hna nih hramhram uknak an lak 2021, February thla in 2022, September 21 tiang ah tlaihkhih a tongmi dihlak hi 12,455 an si, cu chung ah thongthlak dingin biakhiah piak a tongmi hi minung 1485 an si.
Thih-dan tiang pek a si i thongah khumhmi dihlak hi minung 84 an si tiah AAPP nih cazin khomhsuatnak an tuahmi cu an langhter. Aa-mah-khan in luatnak a hmutu minung 22 an si i, luatnak a hmutu dihlak in 3114 an si tiah an langhter chih. SAC ralkap hna nih phungning loin an phihkharmi inn dihlak hi SAC nih uknak an lak thawk in 2022, August thladih tiang ah inn 760 nak tlawmlo a si. A tu ah langhtermi cazin hi AAPP nih an khomhsuatmi cazin a si i, a tak le a leng ah a tu i langhtermi nak in a tamdeuh kho tiah an langhter chih.
Russia Sinah Hriamnam Bawmhnak Ka Pe Lo – North Korea, Russia sin ah zeibantuk hriamnam bawmhnak hmanh kan pe lo, hi pin zongah kan pe lai lo tiah, North Korea nih cun a chim tiin KCNA media nih a thanh. Kan ral si a duhmi US nih N.Korea ram nih Russia hriamnam a bawmh UN phung a buar a kan timi cu a dik lo mi a si, Russia cu bawmhnak kan pe bel lo, hi pin zongah pek kan tim hrim lo tiah, N. Korea Ministry of Defense tang um hriamnam sernak in tuanvo ngeitu pakhat nih a chim.
Ukraine tuknak ah hman dingin Russia nih N.Korea sinah Missile le hriamnam tamlak cawk a tim tiah, US nih cun a rak chim. Cu kongah mi ramdang kongah holh lo tein um ding in le mi ramdang kongah a dik lomi chimrel lo ding in N.Korea nih cun US cu ralrin a pek.
Pago ramthen, Paungde ah SAC ralkap minung palhin anmah le anmah an i kap!! Pago ramthen, Pyi pengkomh, Paungde peng khua pakhat ah, nizaan September 21 zaanlei ah, Paungde(ပေါင်းတည်) SAC ralkap le Patikung(ပုတီးကုန်း) SAC ralkap hna cu, PDF ah an i ruah veve caah anmah le anmah an i kap i SAC ralkap 1 cu faak ngaiin hliam a tuar tiah theih a si.
Tharhlapyinsi(သာလှပင်စည်) phungki sianginn ah PDF 15 an phan tiin thawng kan theih caah, Padekung ralkap hna cu kan kal i, cu hnu tlawmpal ah Paungde ralkap 5 cu an rak phan ve, PDF an si tiin kanmah le kanmah kan i kap tiah SAC ralkap pakhat nih a chim tiah theih a si.
Cu an i kahnak ahcun, Padekung SAC ralkap pakhat a taang ah faak ngaiin hliam a tuar, Patekung ralbawi pakhat nih kanmah le kanmah kan si a theih i , cu hnu lawng ah kahdohnak cu kan ngol, cu kan i kahdohnak ruangah phungki sianginn cheukhat cu an rawk tiah SAC ralkap pakhat nih cun a chim chap.
Myanmar Rammi 5 Le India Rammi 2 Cu Hriamnam He Aa Pehtlaimi Thilri He Assam Rifle Nih An Tlaih Hna, India ram, Mizoram ramkulh Saiha pengkomh ah Myanmar rammi 5 le India rammi 2 cu rupees sing 16 man, hriamnam he aa pehtlaimi thilri he Assam Rifle nih nizaan September 21 ah an tlaih hna, tiah theih a si. Runvennak zungin chimphuannak nawlngeitu palik Lieutenant Colonel Mahendra Rawat nih, “Kan tlaihmi hna cu airgun le a kuan, ralthuam, radio thil, raltuknak thuam angki banian, kuthrolh le kedan telh in rupees sing 16 man a si,” tiah a chim.
Kan tlaihmi thilri hna hi Myanmar ram ah kalpi dingin an i timh pinah ralkap le raltuknak he aa pehtlaimi a si i, Myanmar ram chungah hnahnawhnak a pe khotu thilri an si caah kan tlaihnak a si, tiah a chim chap. “Hi thilri kan tlaihmi thawngin Indo-Myanmar ramri ah daihnak, hnangamnak le rualremnak sernak caah a biapi ngaingaimi a si,” tiah India cozah nih cathanh an chuah.
Kyauktaw Peng Nagaya Khua Ah SAC Ralkap Nih Hriamngan An Kah Caah Khuami 4 Hliamhma An Pu, Kahdohnak zeihmanh um loin Kyauktaw pawng Nagaya khua ah SAC ralkap Kyauktaw No.9 Operations Command Headquarters nih September 20 zaanlei sml 4:30 hrawng ah hriamngan an kah caah Nagaya khuami 4 hliamhma an pu, tiah theih a si.
SAC ralkap No. 9 Operations Command Headquarters in hriamngan an kah caah Nagaya khuami U Yin Than(40) a inn hmaiah hriamngan kuan a tla i, amah U Yin Than telh in a fapa Myo Hlaing Win(17), Min Aye Soe(13) le U Yin Than a nu Mya Yin U(65) hliamhma an pu. “Inn chung kan um lioah hriamngan kuan cu kan inn hmaiah a rak tla. Ka fapa cu inn cungah ca a ciah lio a si i a lu, a kut le a keng ah aa hliam. Ka fapa hniang cu a phei le a kut ah aa hliam, kei cu ka kutdong le ka kiu ah kaa khawng,” tiah U Yin Than nih a chim.
SAC ralkap nih tilam an phih caah Kyauktaw sii-inn kal khawh a si lo. An lu ah hliamhma pumi hna cu Kyauktaw sii-inn ah va zohter cu kan duh tuk ko nain kal khawh a si lo,” tiah hliamhma pumi chungkhar Aung Kyaw Min nih a chim. Kyauktaw ah umhmun khuarmi SAC ralkap No.9 Operations Command Headquarters in hriamngan an kah ruangah Hkawngtauk(ခေါင်းတုတ်) khuami nu pakhat zong hriamngan thawngpang ruang ah a nunnak a rak liam.
Pakokku Peng Ah SAC Ralkap Nih Khuate An Khangh Caah A Tlawm Bik Inn 10 A Ciam, Khuami 2,000 Leng An Zam, Magway ramṭhen, Pakokku peng Kawunlay(ဂဝံလေး) khua ah SAC ralkap pawl rallam an sial i, inn an khangh tiah theih a si. SAC ralkap 90 hrawng cu nizaan September 21 chun ah Kawunlay khua ah rallam an sial i, nihin September 22 zinglei ah Kawunlay khua cu an khangh caah inn 10 a ciam, tiah Pakokku peng mizapi uknak phu in ṭuanvo ngeitu nih a chim.
“Pauk peng leiin rallam a sialtu SAC ralkap 91 nih nihin zing sml 6:00 hrawngah Kawunlay khua cu an khangh. Khua khat hnu khuakhat an luh paoh ah meithal an puah,” tiah a chim chap. SAC ralkap nih rallam an sial caah Kawunlay le Myinthpia khuami 2,000 leng cu a himnak hmun ah an zam, tiah theih a si.
Myanmar Rammi 3 Sinah Mizoram Palik Nih Bing Rang An Tlaih, India ram, Mizoram ramkulh, Aizawl peng chungah nihnih chungah Myanmar rammi 3 hna sinah bing kan tlaih, tiah Mizoram palik nih cathanh an chuah tiah theih a si. Aizawl peng Tuirial khua ah September 20 lioah Van Cung Bia(32) cu gram 202 a ritmi bing he kan tlaih. Anih hi Sagaing ramṭhen, Kalay peng Haikhawl-Tuingo khua ah a ummi a si, tiah an langhter.
Nizan September 21 ah Tuirial khua ah Tha Sui(32) le Duh Nei Mawi(25) cu gram 147 a ritmi bing he Mizoram palik nih an tlaih than hna. Annih hi Kalaymyo Tahan(C,B) sang ah a ummi an si i, ralhrial in aa dormi kan si, tiah Tha Sui le Duh Nei Mawi nih cun an chim.
Mizoram ramkulh ah rithaisii dohtu phu le Mizo mino phu hna nih an dirhmi Central Anti-Drugs Squad (CADS) nih rithaisii fak piin an doh cuahmah i, September 10-21 tiang ah bing kilo 1 leng an tlaih cang, tiah theih a si.
Ukraine Tuk Dingin Reserve Ralkap Kawhmi Duh Lo Ruangah Russia Ah Dulonak An Langhter! Ukraine ram do ding in Russia President Putin nih reserve ralkap a kawhmi ruangah ramchung hmun tampi ah duhlonak an langhter i minung 1300 renglo palik nih an tlaih hna, tiah a ngiathlaitu OVD phu nih an chim. President Putin nih bia a chim dihin Russia ram khuapi 38 ah mipi nih duhlonak an langhter colh i a tlawmbik minung 1332 an tlaih hna, Russia nih Ukraine a tuk hnu in a ngan bikmi duh lo langhternak a chuah a si, Palik nih cun an tuk velh leen hna tiah, Interfax media nih cun a tarlangh.
Ukraine tuknak ah a lamkip kan hman lai tiah Putin nih a chim hnuin Russia Defense Minister Sergei Shoigu nih Ukraine tu dingin Reserve ralkap Sing thum kan kawh lai tiah, nizaan september 21 ah a chim ve. Ralkap singthum lak chap ding thawngthanh a si hnu in a ralaimi caan chung Russia ram in ramleng a chuak ding vanlawng ticket cu an i cawk cia dih hna i cawk awk a um ti lo tiah, theih a si.
Leave a Reply