Ralzam Hna Cu Kan Si Khawh Chung In Kan Bawmh Peng Hna Lai – Mizoram Education Minister
========================
Chin Community USA(CCUSA) nih hruainak in tuahmi Chin kumthar puai ah khuallian in sawmmi Pu Lalchandama Ralte, Minister of Education Mizoram nih cun, “Myanmar ram in humhimnak duh ruang ah Mizoram ramkulh chung ah a rak zam mi ralzam hna cu Mizoram cozah nih siseh, MZP, YMA, Zatlang Bu hna le Khrihfa Bu kip hna nih kan zohkhenh hna i bawmhchanhnak kan pek hna,” tiah a chim.
“Inn a hlang kho lo mi ralzam hna ca ah umnak inn Refugee camp kan sakpiak hna, ralzam hngakchia 6000 renglo cu sianginn an kai kho i sianginn uniform, cauk, chuncaw le an herhmi thil dangdang hna zong kan pek hna, zei ruang ah nan bawmh hna tiah kan hal u law, kan leh ding mi hna cu unau kan si ruang ah kan bawmh hna tiah kan leh hna lai,” tiah a chim. Mizoram chung ah rak rat nan duh poh ah cun innka kaupi kan hon peng ko kan nih cu zei tik poah ah bawmchantu si ding in timhcia kan si peng ko, tiah a chim chap.
Kan nih miphun hi kan vun a chia; ram ramthum ah ṭhenṭhek in ramri nih a kan dan. Sihmanhsehlaw thisen nih ramri a ngei lo, kan i unaunak cu a kan ṭhen kho lai lo.1966 kum ah Mizoram nih Zalennak kan rak sual lio ah mizo mipi hna cu Chin kan unau hna nih nan rak kan zohkhenh, tu cu kanmah caan a si cang, tiah Education Minister Pu Lalchandama nih US ah tuahmi Chin Kumthar puai ah cun a chim.
Relchih, Sagaing Ramṭhen Myaung Pengchung ah Zarhkhat Chung Ah Ralzaam 8,000 Leng An Karh! Sagaing ramṭhen, Myaung pengchung ah SAC ralkap nih nitin ngawt in rallam an sial caah zarhkhat chung ah mah umnak hmun kaltak in ralzaam dirhmun a phanmi minung 8,000 leng an phan, tiah pengkulh Public Defense and Security Organization in ṭuanvo ngeitu pakhat nih media ah a chim.
Kahdohnak a rak chuah ruang ah ralzaam dirhmun a phanmi a thong renglo an rak um cia i, a luancia ni tlawmpal chung lawng ah mah umnak hmun kaltak in ralzaam dirhmun a phanmi 5,000 renglo an karh caah umṭhutnak le eidin ah harnak an tong, atu lio rih ah cun bawmchantu hna nih bawmhnak an pek hna, tiah \uanvo ngeitu nih cun a chim.
SAC ralkap hna cu khuachung ah lut in rallam an sial caah tualchung mi hna cu an tlaih hna i an hrem hna leng ah bia an halnak, cheukhat cu an thah hna i, an inn lo zong an khanghpiak hna, tiah tiah theih a si. Nizaan September 4 ni zong ah Bukai(ဘူးကိုင်း) khua ah SAC ralkap nih rallam an sial lio ah tualchung mi pakhat cu an tlaih i, an hrem lio ka hmuh, tiah tualchung hriamtlai phu chungtel pakhat nih a chim.
“Bukai(ဘူးကိုင်း) ah tlaihkhih a tongmi pakhat cu fak tuk in an tukvelh caah SAC ralkap nih ambulance an auh i, a thih le a nun kong cu kan thei kho rih lo,” tiah nihin September 5 ah a chim.
Karen Ramkulh, SAC Ralkap Le KNDO Kar Kahdohnak Ah SAC Ralkap 3 An Thi, Karen ramkulh, Kyondoe(ကျုံဒိုး) peng Taunggyainn (တောင်ကြာအင်း) le Myaukgyainn (မြောက်ကြာအင်း) ah SAC ralkap le KNDO kar kahdohnak a chuak i SAC ralkap 3 an thi, tiah Duplaya peng in ṭuanvo ngeitu nih September 5 ah an thanh.
September 4 ah SAC ralkap khah-lah-yiah 12 kuttang um ṭat-mah 22 le KNDO battalion 6 kar kahdohnak a chuak i, SAC ralkap lei ṭat-khuai-hmu telh in minung 3 an thi, 2 hliamhma an tuar, tiah theih a si. Kahdohnak a dih hnu, chun hnu ah SAC ralkap ṭat-mah 22 in minung thazaang 50 hrawng cu Myaukgyainn(မြောက်ကြာအင်း) khua lei ah thazaang an i chap, tiah theih a si.
Kahdohnak ah a thimi le hlianhma tuarmi hna cu KNLA-PC battalion 773 in Bu Bih(ဗိုလ်ဘိ) phu nih an thiar hna, tiah theih a si. SAC ralkap nih 120mm hriamngan an kahnak ruang ah phungki pakhat le Gawphaung (ကော့ဖေါင်း) khuami pakhat cu hliamhma an pu, tiah theih a si.
Matupi Peng, Lay Khua Hleidonh Pawng Vawlei a Cimh Ruang Ah Khualtlawngmi Harnak An Tong, Chin ramkulh, Matupi peng, Lay khua hleidonh pawng cu September 2 zaan ah vawlei a cim nain, atu tiang an remh khawh rih lo caah khualtlawng mipi hna cu khuapi chung in kee thum ngei(tung-bing) le motor in an don hna, tiah theih a si.
Vawlei a cimh ruang ah cycle cu nam chom in a kal kho nain, motor cu a kal kho ding a si lo. Cu caah Matupi in Mindat lei kal aa timmi khualtlawng mi hna le Matupi khuachung luh aa tim mi khualtlawng mi hna cu lam a cimhnak hmun ah kal khawh a si lo caah an thlah/don hna tiah theih a si. “SAC ralkap lei nih lam cu ser an duh nain tualchung hriamtlai phu hna nih remhnak nawl an pek hna lo caah a si lai,” tiah tualchung mi pakhat nih a chim.
SAC Chairman Min Aung Hlaing Cu Russia Ah A Tlawng, SAC chairman general Min Aung Hlaing cu nizaan September 4 zaanlei ah Russia ram a phan, tiah SAC Ministry of Information nih September 5 ah cathanh an chuah. Tutan a khualtlawnnak hi SAC ralkap nih uknak an lak hnu ah a voi thumnak Russia a tlawn a si.
Russia media nih cun tutan khualtlawnnak kong ah general Min Aung Hlaing telh in Chairman of the Standing Committee of the National People’s Congress of China, Armenia prime minister le Mongolian prime minister hna cu September 7 ah Russia pressident Putin he tonbiaruahnak an ngei lai, tiah an ṭial. Tutan ahhin SAC chairman Min Aung Hlaing le Russia president Vladimir Putin cu a dang tein tonbiaruahnak an ngei lai, tiah fiang tein an langhtermi a um lo.
SAC Ministry of Information nih cathanh an chuahning ah cun tutan SAC chairman a khualtlawnnak ah Russia cozah rianṭuannak ṭuanvo ngeitu hna he tonbiaruahnak an ngei lai. Russia ram hmun minthang, university le sehzung le rianṭuannak hmun hna ah kherhhlainak a tuah lai, tiah an langhter.
Pakokko Hleidonh SAC Ralkap Gate Cu PDF Nih An Kah Hna I SAC ralkap 3 An Thi, Magway ramṭhen le Mandalay ramṭhen aa tonnak Ayeyarwaddy hleidonh gate ah a ummi SAC ralkap hna cu September 4 chunhnu ah Pakokko PDF phuhnih fonh in nu pakhat le pa pathum nih an kahdoh hna i, SAC ralkap 4 an thah hna pinah hriamnam zomg an lakpiak hna, tiah theih a si. Pakokko PDF a simi nu ralkap May Po Toe le a hawile pa pathum nih cun meithal 2 an lak khawh, tiah Pakokko hriamtlai phu nih cathanh an chuah.
SAC Ralkap Sin Ah Meithal A La Khotu PDF Chungtel Pakhat Cu Ks. Sing 5 An Pek: Kahdohnak chung ah SAC ralkap sin in meithal a la khotu PDF pakhat cu bawmchantu pakhat nih Ks. sing 5 laksawng a pek, tiah ṭuanvo ngeitu pakhat nih a chim. “Tanintharyi ramṭhen chung kahdohnak ah PDF nih SAC ralkap hna sin in an meithal pakhat a lak khawh ahcun Ks. Sing 5 pek khawh ding in i zuam a si. Atu tan hi Taningtharyi ramṭhen chung ah a voikhatnak pekmi a si, cu zong cu bawmchantu pakhat bawmhnak thawng in kan pek,” tiah ṭuanvo ngeitu pakhat nih a chim.
Boatpin (ဘုတ်ပြင်း) ah SAC ralkap ralbawi nih zulhmi motor 3 cu September 1 ahkhan PDF nih bomb an puahhnawh hna i, cu lio ah cun PDF pakhat nih meithal cu a lak khawh. Motor 3 chung ah pakhat cu bomb nih a khenh caah a rawk dih, SAC ralkap 2 an thi i, 2 hliamhma an tuar tiah Boatpin(ဘုတ်ပြင်း) peng tualchung hriamtlai phu nih cathanh an chuah.
Leave a Reply