Hakha le Falam Mei A Rawkmi Cu Caan Raulo Ah An Remh Cang Lai
========================================
Hakha le Falam khuachung cu mei a ratlonak zarh thum hrawng a si cang. Mei remh ding ah Mandalay in Engineer minung(17) Kalay anphan cang i Company riantuan tu hna nih an remh khawh ah cun Sikpar(Nov) 15 hlan ah electric mei a ngah lai tiah theih a si.
Mei remhnak ah aherhmi hna cu tung a rawhnak hmun an phan dih cang tiah theih a si. Ref: Zalen
Chin ramkulh, Hakha Cawbuk sang check gate hngak SAC ralkap nih khualtlawng mi hna cu an dirter hna i, anmah an phone battery an tun hnuah an kalter hna, tiah theih a si. Khualtlawng mi pakhat nih, “Ka pi a dam lo ruangah Hakha ah kan kalpi i cawbuk check gate kan phak ah ralkap nih sentari an cawnghnak buk tiang rak kai u an kan ti caah kan kai, sau nawn an kan hren hnuah kan lan kho ṭhan,” tiah a chim.
“Kan phone an kan check hnuah khoika in dah nan rat tiah an kan hal. Nan cycle ah ah kan phone battery kan i tun ta lai an kan ti i, an i tun ko. Minutes 15-20 chung hrawng an i tun hnuah kal cang ko u an kan ti i an kan thlah,” tiah khualtlawng mi pakhat nih The Chin Post ah a chim. Hakha mei a rawh ruang ah a si lai, ralkap zong phone battery an ngei ve lo, an van a sang ngaingai. Ka pi dam lo ruangah hnawhnam ngai in Hakha kan kalpi i, atu bantukin harnak an kan pek i kan cycle ah an phone battery an i tunmi hi cu a poi ngaingai ko, tiah a chim chap.
Cun Cawbuk check gate hngak SAC ralkap le palik nih khualtlawng mi cheukhat cu zu cawkpiak ding in Hakha lei ah an kirter tawn hna, tiah theih a si. Zu cawkter a tongmi pakhat nih, “Khua lei kal ding in kai thawh i check gate hngak ralkap nih zu cawkpiak ding in zu dawr ah an ka kalter caah ka khuallam zong kai i tinh ning in ka phan kho ti lo. Ka cawkmi zu zong ding ve an kan ti ko nain ka duh lo,” tiah tiah The Chin Post ah a chim.
Chin ramkulh, Hakha ah mei a rawknak ni 13 a si cang i, meilul (pha zawng dan) le meihol a dih cang, tiah theih a si. Hakha dawr kip ah meilul kan kawl i cawk awk a um ti lo, an rak cawk dih cang. Hakha dawr ngan bik Pearl Store zong ah a um ti lo. A man zong a kai ngaingai i minung pakhat nih voikhat cawk ah bawm tam pipi in an cawk, tiah theih a si.
Mei hi caan sau nawn a rawk rih kho menmi a si tiah thawngpang a len caah cheukhat cu solar le battery an i cawk cio hna. Mi sifak deuh nih meilul bawm khat hnih te kan i cawk i, cu hmanh cu a dih cang. Meihol cawknak chinchin cu a har ngaingai ko, tiah tualchung mi pakhat nih a chim. Hakha ah Kawl leiin a ra mi meihol tunkhat ah kyats 15,000 le Lai meihol a tlawm bik kyats 18,000 a phan nain cawk ding a um ti lo. Meilul hi bawm khat ah kyats 1,500 in 2,000 kar a phan, tiah theih a si.
Pu Saihmo Thihnak Kong Ah CDF-Lautu Nih Cathanh An Chuah, Pu Saihmo thihnak kong ah CDF- Lautu nih cathanh an chuah i an cathanhmi chung ah “Pu Saihmo kan tlaihnak aruang cu pistol pakhat aa tlaih i Sapaw khuachung pal in khual a tlawngmi hna cu MATC/MDF nih mi thahnak nawl an ka pek tiin a tlerhkhonh hna caah khuami hna nih CDF-Lautu sin ah an rak chim lengmang. Sinain rianrang in tawlrel hmasa lo in kan ngiatziar ko rih.
Ahnu ah khuami hna sin in report nak a rat than caah a inn ah kan va chek i MATC/MDF nih pekmi pistol (1), Walkie Talkie (1) le methal kuan (7) he Tho(Oct) 9 zanlei sml 3:00 ah kan tlaih. Bia kan hal hnu ah MATC/MDF sin in mi kahnaknawl an peknak le hriamnam hna cu MATC/MDF sin in a ngahnak kong a phuan. Cu hnuah a thilri hna cu kan lakpiak i sml(48) chung kan hren hnu ah Tho(Oct) 11 zanlei sml 3:00 ah kan thlah țhan.
Kan thlah hnu inn a țin pah ah a chungkhat hna le a hawile he an i tong. Zarhkhat a rauh ah MATC/MDF sakhan a phan i sakhan ah a um tithawng kan theih. MATC/MDF nih a ruak kan hmuh an tinak hi kan umnak hmunhma he ti-meng in meng (50) nak tam in aa hlaat. Kan thlah ni le a ruak kan char tiah thawng an thanh ni Sikpar(Nov) 1 ni hi ni (22) in aa hlat. Cu caah thah a ton taktak a si hmanh ah MATC/MDF he lawng aa pehtlai mi a si” tiah an cathanh mi chung ah an langhter.
Paletwa Pengchung Kahdohnak Ruang Ah Tualchung Mi 500 Leng Ral An Zaam, Chin ramkulh, thlanglei Paletwa peng Tayakone, Kyaukpalin(ကျောက်ပလ္လင်) le Sattalawa(ဆတ္တလာဝ) khua thum i a um mi tualchung mi 500 leng cu SAC ralkap le AA kar kahdohnak a chuak lai ti an phan caah, October 30 in Paletwa peng Miza khua ah ralhrial dirhmun an phan tiah tualchung mi hna nih an chim tiah theih a si.
Tayakone, Kyaukpalin(ကျောက်ပလ္လင်) le Sattalawa(ဆတ္တလာဝ) khua khatlei ral ah Rakhine ralkap AA nih hmunhma an lak, cun khuachung zong ah SAC ralkap an um caah kan zaamnak a si tiah tualchung mi hna nih an chim. Miza khua ah a zaam mi ralhrial hartong hna caah eiding le um ṭhutdirnak kongah harnak an tong ngai tiah bawmhnak petu hna nih an chim. Paletwa ah ralhrial dirhmun phanmi 20,000 leng an si i, mi tamdeuh cu Paletwa khuachung le Sami khuachung ralhrial sakhan ah an i dor hna, a cheukhat cu India, Mizoram ramkulh chung ah aa dormi zong an um tiah ralzaam bawmhnak a tuahtu hna nih an chim.
Dik Tein Cazin Khumhnak A Tuahlo Mi Phone Simcard Paoh Kan Phih Lai Tiah SAC Nih Thanh, Phone simcard hman tik ah telh dingmi min, hmat-pung-tin number dik tein a hmanglo mi phone sim card paoh kan phih lai tiah SAC ralkap kuttang um department pakhat nih cathanh an chuah tiah theih a si. Kan hmanmi phone sim card hna cu min, hmat-pung-tin number a dik le diklo tha tein zohfelnak tuah hnu ah remh duhmi paoh nih 2023, January thla dih tiang a hnu bik chia in remh cio ding ah an thanhmi ah cun an langhter chih tiah theih a si.
Kalaymyo Ah Kahdohnak Umlo In SAC Ralkap Nih Hriamngan An Kah Caah Rawlruk Pakhat A Rawk, Kalaymyo ah kahdohnak a chuak lo buin SAC ralkap nih November 3 ah tualchung mi umnak hmun hriamngan in an kah caah tualchung mi pakhat ngeih mi rawlruk a tlak i a rawk tiah Kalaymyo peng tualchung hriamtlai phu nih cathanh an chuah tiah theih a si.
Kalaymyo peng thlanglei Htaukkyant(ထောက်ကြန့်) khua cu nihin chunhnu suimilam 11:20 hrawng ah SAC ralkap nih hriamngan in an kah hi a si. Voi thum an kah i voi khat cu khuachung ah a tla” tiah tualchung mi pakhat nih a chim. November 3 zinglei ah SAC ralkap minung thazaang 150 hrawng cu Kalaymyo GTI sianginn ah umhmun an khuar tiah an thanhmi ah an langhter chih.
Philipine Ram Ah Thlichia Nalgae A Hran Ruangah Minung 100 Leng An Thi, Philipine ram laifang ah a luancia October 28 in thlichia Nalgae a hrang i min a cimh pinah ti a lianh caah minung 100 an nunnak a liam i 33 an tlau, tiah Department of Disaster Management nih November 1 ah an langhter tiah theih a si.
Nalgae thlichia cu Tuluk ram thlanglei ah aa ṭhial cang. Aa ṭhial lai ah Philipine ram khualipi Manila zong a pal pah tiah theih a si. Philipine President Ferdinand Jr. Marcos nih, an ram thlanglei i thlichia nih a denmi Maguindanao ramkulh cu November 1 ah vanlawng in a va vehvat hna. Tikulh 76,000 a umnak Philipine ram cu kum khat ah thlichia voi 20 tluk a hrang i, Nalgae thlichia hi a voi 14 nak a si. Khua caan a dik lo chin lengmang caah vawleipi a lum chin lengmang i thlichia hrannak a karh chinchin, tiah Seintist hna nih an langhter.
Myinkin Ah PDF Nih SAC Ralkap Sakhan An Kah Caah 5 An thi, Meithal zun 3 An Lak, Sagaing ramṭhen, Myinkin peng Taymatauh(သေမသောက်) khua luhnak SAC ralkap sakhan cu, Student’s Revolutionary Force(SRF) nih an kah caah SAC ralkap 5 an thi, meithal zun 3 an lak, tiah theih a si. November 1 zing sml 5:00 hrawngah an va kah hna i, sml a cheu chung hrawng kahdohnak a chuak. Teymatauh khua ah SAC ralkap le pyusawhti 50 hrawng an um nain sakhan tu ahcun 15 hrawng an um, tiah theih a si.
“SAC ralkap an sakhan hi lak ding in kan i tim ko nain hliamhma pumi kan um caah meithal zun 3 lawng kan lak i hnu kan kir ṭhan,” tiah SRF ralkap pakhat nih a chim. Cu kahdohnak ah SAC ralkap 5 a hmun ah an thi colh i 7 hliamhma an pu, cun SAC ralkap 2 hi an hliamhma a fak ngai, tiah a chim chap. Cu kahdohnak cu Student’s Revolutionary Force Battalion 1 le 4 hna i bawm in an kah hna, tiah theih a si. Crd-The Chin Post
Leave a Reply