Good News; CDF nih thawngpang tha taktak thanhnak an tuah cang!!

Matupi Peng Ah Mizapi Ukhruainak Phu Thar An Dirh Ṭhan +CDF-Thantlang Council Hruainak In Khuate Khuabawi Thimnak An Tuah!
================================
Chin ramkulh, Matupi peng ah mizapi ukhruainak phu a thar in kan dirh khawh ṭhan cang, tiah mizapi ukhruainak phu nih nizan October 31 ah cathanh an chuah tiah theih a si. SAC nih hranhram in nawlngeihnak an lak hnu in mizapi nih duhlonak langhter a si. Cun a luancia 2021 Febuary 27 ah matupi peng mizapi ukhruainak phu dirh a rak si ko nain NUG lamhruainak he a luancia October 6 ah Matupi peng mizapi ukhruainak phu rak dirh ṭhan a si


.
Matupi peng mizapi ukhruainak phu cu ramkomh hluttaw palai 2, ramkulh hluttaw palai 1, zatlangbu aiawh in 4, zungkip ṭuanvo ngeitu 2, Matupi CDF ṭuanvo ngeitu 2, an dihlak minung 10 in an dirh, tiah theih a si.

CDF-Thantlang Council Hruainak In Khuate Khuabawi Thimnak An Tuah! Thantlang peng Khuate 51 ah CDF-Thantlang Council hruainak in Khuabawi thimnak an tuah tiah, theih a si. “CDF-Thantlang Council nih biakhiahnak an tuah bantuk in November ni 27 hlan ah Thantlang peng khuate 51, khuabawi vialte cu mah le khua cio in thimnak ngeih cio ding ah biachah a rak si i a tu bantuk in thimnak kan tuahnak hi a si tiah, Vanzang tlang Public Administration chungtel pakhat nih The Chin Post ah a chim.

Tutan khuabawi thimnak i teinak a hmutu hna cu kum khat chung rian tuan a si lai i cu hnu ah thimnak tuah than a si lai tiah, a chim chap. Thantlang peng khuabawi thimnak ah hin khuatam deuh cu tlamtling tein thimnak an tuah kho cang hna i Council zong nih theihpinak a tuah cang hna. Crd-The Chin Post

Relchap, CNA & CDF: An Hmuitinh Cu Pakhat, Khuapau dohthlennak ah kan hriamtlai hna a simi CNA le CDF an i funtom khawh lomi hi a poi cemmi a si ko rua! Zapi zaran nih kan hmuh khawh tawk hmanh ah an i funtom khawh lonak a lang ngai i a chunglei ah cun a zual ngai lai ti a fiang. CNA hi kum 34 chung hriam a tlai cangmi an si caah raldohnak, hriamnam hmannak le ralkap ukhruainak ah hmuhtonmi tampi an ngei cang. Phungphai fekfuan he an kal kho. Asinain chanthar fimthiamnak ah an chanbau.

Khuapau dohthlennak a chuah hnuin CNA ah mino a thong leng an luh caah CNA ralkap hi a hlan nakin tampi an karh ve. CDF a dirnak cu kan theih cio bang kum 1 fai lawng a si rih. Raldoh le hriamnam kongah an chambau i ukhruainak ah CNA tlukin an fekfuan rih lo. Asinain CNA nakin an tam deuh i chanthar fimthiamnak ah an sang deuh ve. Cu hrawnghrang lawng cu CNA le CDF an i dannak a si ko. A biapi bik a simi an hmuitinh cu pakhat a si. Asinain an i funtom kho lo.

I funtom kho hna seh law zeitlukin dah hmual a ngeih hnga! Chanthar raldohnak hriamnam tam deuh cu chantahr fimthiamnak lo cun hman khawh an si lo. Cu ve bantukin chanthar fimthiamnak ngeih len ko zongah raldoh ningcang thiam lo ahcun a si kho fawn lo. Cu zawn te ah cun CNA le CDF hi an i funtom a herh tuknak a si. An santlaihnak zawn fonh khawh kha ṭhannak cu a si. Cu nih cun santlaihlo nak zawn kha a khuhchih tawn.

CNA le CDF an funtom khawhnak dingah remh a herh tiah ka ruahmi pathum an um. Cu hna cu! PAKHATNAK: Ramleng mipi kan i funtom hmasa a herh. Ramleng mipi kan dirhmun zoh tikah phu 3 in kan um. CNA a ṭanhmi, CDF a tanhmi le CNA he CDF he a ṭanhmi tiin! CNA a ṭanh lomi hna hi Laitlang an rak um lioah CNA cungh lungfahnak, ngaihchiatnak a rak ngeimi hna deuh an si. CNA a tanhmi le CDF lawng a ṭanhmi hna hi CNA he CDF he a ṭanhmi hna sinah kan i funtom a herh.

Hriamtlai he tlailo he kan dihlak in kan duhmi cu uknak ṭhalo tei kha a si ko. Cu uknak ṭhalo kan tei khawhnak dingah cun kan i funtom a herh. PAHNIHNAK: CNA nih an rak ngeih ciami pawlisi (policy) an remh a hau! CNA le CDF an i funtom khawhnak a ruang tampi a um ko lai nain a biapi bik cu CNA pawlisi a si tiah ka ruah. Zei zawn theng dah a si ti cu ka sawh kho lo nain bia ka halmi hna tam deuh nih CNA pawlisi ah CDF an i tlum khawh lonak zeimawzat a um tiah an chim.

I funtom khawhnak dingah a biapi bik cu pawlisi a si. Kan hmuitinh aa khah ko zongah kan pawlisi aa dan tuk ahun hmunkhat ah kalṭi a har. CNA nih an pawlisi ṭha tein an zoh ṭhan i CDF zong an i tlum khawh nakhnga a herh ningin an remh a hau ti hi ka hmuh ning a si.
PATHUMNAK: CDF nih CNA an hmuh hna ning lungput thlen a hau. CNA cu hriam an tlaihnak sau cang hmanh seh law mipi nih kan rak dirkamh khawh hna lo caah fimthiamnak le hriamnam in an thazang a der.

CNA ralbawi zuri pakhat hnih ruangah an limhang a zornak a tampi. Cu zawn ah cun CDF hruaitu hna nih CNA hi fuhpanh awk ṭha in an hmu hna lo ti hi ka hmuhning a si. Cu lungput cu kan thlen a herh. CNA zong an chambaunak a tampi ko lai. An ralbawi lakah zuri le ṭha tein a um duhlomi zong an um ve ko lai. Asinain cu ruangah cun CNA kha niam tuk in hmuh awk an si lo. CDF nih an ngeih lomi ṭhatnak tampi CNA nih an ngeihmi a um ve.

Ramleng mipi kan i funtom lai. CNA nih remh a herhmi an i remh lai. CDF zong nih thlen a herhmi an thlen ve lai. Cuticun kan thazang aa fonh lai i kan hmuitinh a simi uknak ṭhalo cu kan tei lai. Salai CP Lian (CEO, The Chin Post)

Zarhhnih Tluk Mei A Rawh Hnu In Hakha Khua Chungah Sabuti Man A Kai, Chin ramkulh khualipi Hakha ah a luancia October 21 in mei rawh hram ai thok i, November 1 tiang ah mei an remh khawh rih lo caah sabuti man a kai, tiah theih a si. Hakha ah sabuti a zuartu pakhat nih, “Mei a rat lonak a sau tuk cang.

Mei a ṭhat ahcun elctric mei in kan rak chuan tawn i a tlamtling ngai. Atu cu meihol in chuan a si tikah meihol tam tuk a dih. Meihol man zong cu tunkhat ah 15,000 in 18,000 kar lawngte a si tikah a har ngaingai,” tiah The Chin Post ah a chim. Kadang ah cun sabuti kheng khat ah kyats 1,500 lawngte in an rak zuar cang nain kan nih cu kan rak kai duh lo. Asinain mei a rawh caan a sau tuk cang pinah meihol man a kai tuk ruangah sabuti man zong kai lo awk a ṭha ve ti lo i, nizan October 31 in sabuti kheng khat ah kyats 1,500 le sapherh pakhat ah kyats 500 in kan zuar cang, tiah a chim chap.

Hakha khua chungah mei a rawhnak zarhhnih tluk a si cang i, cheukhat cu meihol an ngeih ti lo caah inn pawngkam thinghreu an khawmh in rawl a chuanmi zong an um. Cheukhat cu meihol le thing an ngei lo i, rawldawr le sabuti dawr ah a eimi zong an um, tiah theih a si. Laimi tam deuh nih sabuti cu an tlaihchan ngaimi Lai rawl phun khat a si i, cheukhat sabuti dawr ah cun khengchap(လိုက်ပွဲ) a um ti lo, tiah theih a si. Crd-The Chin Post

Be the first to comment

Leave a Reply

Your email address will not be published.


*