Magway ramṭhen, Gangaw peng Nguanglay(ညောင်လယ်) khua ah SAC ralkap nih khuami 6 an thah hna. Cu chung ah minung 5 cu an ban an leh hna i hri in an ṭem hna hnuah mei in an khangh hna, tiah Gangaw mizapi uknak nih June 17 ah cathanh an chuah.
SAC ralkap pawl nih June 3 ah Nguanglay khua ah an thah hna hi a si i, minung 6 chung ah 2 hi Nguanglay khuami an si. A dang 4 hi mi zeidah an si ticu kan hngal kho lo, tiah an langhter.
Minung 4 cu SAC ralkap nih hmundang in an rat pimi hna a si kho, tiah an cathanh ah an langhter chih.
SAC ralkap nih Gangaw peng chung ah mizapi inn an khangh, sualnak ngei lo khuami an tlaih lengmang hna caah rallam an sial nan theih ahcun, a himnak hmun ah zam ding in mizapi cu Gangaw mizapi uknak nih ralrin an pek hna.
Leave a Reply