Falam kan unau pawl i ralring tein mu!!

Falam Ah Vok Hnarthi Chuahnak In Vok 10 An Thi Cang!
===========================
Chin ramkulh, Falam khua ah Vok zawtnak phunkhat a rak chuak i Vok 10 renglo an thi cang, tiah theih a si. October thla dih khan Vok zawtnak phunkhat a rak chuak i kan zuatmi kan Vok hna cu an hnakhaw le an hnar in thi a chuak i si kan chunh hna zong ah an tha hlei lo i an thi, tiah Falam khuami pakhat nih a chim.

“A tubantuk in Vok an thihnak a ruang hi khuacan thlen ruang zong ah a si kho. Hi Vok zawtnak hi theih khawh a si rih lo zawtnak an i chawnh zong a rang ngai cun an thih zong a awl ngai si kan chunh len hna zong ah ni 2, 3 an rau lo an thi thiam,” tiah saram sibawi pakhat nih cun a chim.

A luanciami zarh chung ah Kalaymyo in Vok an rak phorhmi zong a hnar le a hnakhaw in thi a rak chuak i mawtaw cung ah a rak thi ve, tiah tualchungmi hna nih cun an chim.

Chin miphun nih a bik in pawcawmnak ah kan hman ngaimi pakhat satilzuatnak ah hin a bik in uknak lak hnu in satil raikhamh si chunh awk a harsa i cu ruang ah a tubantuk in kan zuatkhalhmi kan satil an thih khunnak hi a si, tiah zuatkhalhnak lei rian rak tuantu(CDM) pakhat nih cun a chim.

Facebook, Messanger, Instagram le WhatsApp ngeitu Meta Company chung i rianṭuantu minung 11,000 leng cu dinhter an si lai, tiah theih a si. Hi biachahnak tuahmi nih hin atu lio kan hman ngai mi Online Apps- Facebook, Messanger, Instagram le WhatsApp te pawl zong a hnursuan pah lai i, anmah Meta Company chung i an rianṭuannak zong zatuak ah 13 cu a tum kho ding mi thil a si. Cu pin ah Meta’s Team pawl zong a hnursuan pah ngai lai, tiah ruahdamh a si.

Meta Compay’s CEO Mark Zuckerberg nih cun hi thil a cang ding mi a tuartu ca ah a fah lainak kong le a hlei in hi thil cang dingmi nih a hnursuan ding mi rianṭuantu hna cung ah a lung ṭhatlonak bia zong a chim pin ah hi biachahnak kong ahhin ṭuanvo lak ai timhnak bia zong a chim chih.

Chin ramkulh, October thlakhat chung kahdohnak ruang ah ngakchia 2 telh in tualchung mi 8 an nunnak a liam i minung 12 nih hliamhma an tuar, tiah theih a si. Bomb puahnak ruang ah le hriamngan le hriamhme hliamhnak ruang ah tualchungmi an nunnak a liamnak hi a si.
October 11, zaan suimilam 9:30 ah Tedim peng lah-wah-kah zung le ta-mah-wa-ya-mah zung a kangh hnu ah Tedim khuachung ah kahdohnak a rak chuak.

Cu kahdohnak ah SAC ralkap nih an kahmi hriamngan nih kum 31 tluk a simi Daw Vung cu a lu ah a hliamh caah a nunnak a rak liam.
October 19, Hakha peng Buanlung khua ah hriamngan a tla i a puah caah kum 7 ngakchia 2 an nunnak a rak liam. Cu hriamngan khuan cu khoi in rak kahmi a si theih a si lo, tiah min langhter a duhlo mi Buanlung khuami pakhat nih cun a chim.

October 14 ah SAC ralkap hna cu Kalaymyo in Chin ramkulh lei an kal Kalay-Tedim lampi Hingzing khuapawng ah bomb puahhnawh in kahdoh an rak tong, puahkehnak a chuah lio ah SAC ralkap hna he hmunkhat ah aa tel mi Hingzing khuami minung 10 nak tlawmlo nih hliamhma an rak tuar. Khuami hna cu SAC ralkap nih ralphaw caah an tlaihmi hna an si tiah CDF nih cun an chim.

Kahdohnak a chuah tik ah SAC ralkap hna nih tualchung mi hna cu tinhchih in kahdohnak an tuahchih i, tualchung mi hna le CDF kar buainak chuak ding in then aa zuam tiah Chin tualchung hriamtlai phu chungtel tuanvo ngeitu pakhat nih a chim. CHRO in Salai Za Uk Ling nih cun a tu bantuk in SAC ralkap nih tualchung mi hna cung ah tinhchih in kahdohnak an tuahmi cu ramkip nih fak piin an doh cio a herh, tiah a chim.

CHRO cazin ning ah 2021, February 1 in 2022, October 31 tiang Chin ramkulh chung kahdohnak le SAC ralkap nih hriamngan kahnak an tuahmi ruang ah tualchung mi minung 347 nunnak a liam cang tiah an langhter. Buaibainak ruang ah le himnak a umlo ruang ah Chin ramkulh in tualchung mi minung 46,200 nih an umnak hmun kaltak in ralzaam dirhmun an phan tiah UNOCHA nih October 31 ah khan cathanh an rak chuah. Crd-The Chin Post

Be the first to comment

Leave a Reply

Your email address will not be published.


*