Falam Kan Unau Le Ralkap i khnak thawng

CNDF nih SAC Ralhrang an Kah hna, Ralhrang Pakhat Thi –Nihin zinglei sml. 11:00 ah CNDF nih SAC ralhrang pawl an kah hna i ralhrang pakhat a thih pin ah a dang pakhat hliam a pu, tiah CNDF nih thawngpang an chuah. “Falam peng, Tibual SAC ralhrang sakhaan ah a ummi ralhrang pawl le CNDF ralkap pawl cu suimilam cheu chung kan i kap i, ralhrang lei in minung pakhat a thi, a dang pakhat hliam a pu,” tiah thawngthanhnak ah an langhter. SAC ralhrang lei nih miakpi in an kah bawmh len hna nain hliampu le mithi um loin CNDF ralkap pawl cu himnak hmun ah an kir kho tthan. [Burmese] CNDF

NCA Kum 6 Tlin Camtuak ah CNF le KNU an Kai Lo U Thein Sein cozah chan (2015) ah minsen an rak thutmi rampi kahdaih hnathlaknak kum 6 tlin camtuak cu nihin ah Naypyidaw ah a tawinak in tuah a si nain CNF le KNU an kai lo, tiah theih a si. CNF an kai lonak kong he pehtlai in CNF Vice President-2 Dr. Lian Hmung Sakhong nih, “NCA timi cu tlangcungmi hriamtlai bu hna le Myanmar ramkomh cozah karlak ah rak thutmi hnatlaknak a si. Kum 6 tlin camtuak hi mipi thimmi cozah nih an tuahmi si sehlaw kan kai ko hnga.

Sihmanhsehlaw, SAC nih uknak an chuh hnu in NCA hi sullam a ngei lomi bantuk ah aa chuah cang. Cucaah, kan kai lo,” tiah Irrawaddy thawngzamhnak ah a chim. “Myanmar ram daihnak kong a tawlreltu Peace Process Steering Team-PPST chungtel ka hawile hna zong nih atu kan ram sining hi fiang tein an hmuh a herh. Min Aung Hlaing zaanmang ah khuasa len ve hna hlah seh ti ka duh. Rammipi an duhnak zong upatpiak hna u. Rammipi he ttan tti loin ramkhel biaruahnak hna tuah timh lengmang hi tuanbia ah ro a ling dingmi palhnak a si.

A caan a um lio ah dirhmun an i thlen lo ahcun tuanbia dantatnak an tuar te ko lai,” tiah a chim chap. KNU nih nihin ah cathanh an chuah ve i, “SAC nih uknak a lak ruang ah Myanmar rammi dihlak namneh le hrem an tuar. Myanmar rampi a tlu dingmi dirhmun ah a phan cang. Federal Democracy rampi sernak kong he pehtlai in SAC nih phungning in ca a chuah a herh i, Myanmar ramkhel chumtual in a chuah zong a herh,” tiah an langhter. Nihin NCA kum 6 tlin camtuak ah RCSS, NMSP, ABSDF, KNLA-PC, DKBA, LDU, ALP le PNLO hna hi an kai hna. The Chin Journal October 15, Yangon