Boruak linh tuk ruangah Northwestern Spanish, Zamora State ram tuhmawngpi cu a kangh caah 61,000 acres hrawng a rawk dih tiin nawlngeitu nih June 19 ah an thanh.
Germany zong ah meikanghnak a chuak i, thlichia a hran tuk fawn caah Berlin khuapi in Southwest Kilometer 50 a hlatnak ram tuhmawngpi cu mei nih a kangh caah nawlngeitu hna nih June 18 ah khan emergency in thawng an thanh. Meikaang cu a zual chin lengmang caah Berlin khuapi pawngkam khua 3 in mizapi hna cu a himnak hmun ah kan zaamter hna tiah Germany nawlngeitu nih an chim.
Ramchung boruak khua caan zohtu hna nih June 19 ah khan hmun cheukhat ah cun temperature 38 degree celcius tiang a phan, tiah an thanh. Spain ramchung dihlak ah zarhkhat chung cu temperature 40 leng tiang a kai i, tukum hi ruahti a tlawm pinah thlichia a hran pah lengmang caah meikanghnak a chuak, tiah an chim.
Thlichia cu suimilam pakhat ah kilometer 70 faak in a hran caah thlitu kalnak lampi ningin kal ti loin lamdang in a kal i, boruak lin he aa fonh caah mei phalhtu hna nih harnak an tong ngai, tiah an chim. Mei phalhtu minung 650 lengah helicopter hmang in cunglei zongin mei an phalh.
Israel Ah Ramkhel Buainak A Chuah Ruangah Thimnak An Tuah Ṭhan Lai! Israel Coalition Cozah nih parliament hrawh an timh caah tukum dongh lei ah thimnak an tuah ṭhan lai. Cuti thimnak ngei ding an si ṭhan caah Israel cozah cu kum 3 chung ah thimnak voi 5 an ngei lai tinak a si. Hi kongkau hi Prime Minister Naftali bennett le foreign minister Yiar Lapid nih June 20 ahkhan thawnglatu hna sin ah an chim.
Coalition Cozah cu a liamcia Kumkhat ah khan rak dirh a si i, Kum 15 tluk Israel ram hruaitu Prime Minister Benjamin Netanyahu uknak cu hrawh a si. Sihmanhsehlaw Coalition Cozah nih Palestine kong ah buainak a tawlrel ning le ramchung a ukhruainak ah party dangdang hna cu an lung a tling lo ngai, tiah theih a si. Cred : The Chin Post
Leave a Reply